Радуйтесь, ибо Господь грядет судить

	Кредо	Переписка	Календарь	Устав	Аудио
	Имя Божие	3000 вопросов	Богослужения	Школа	Видео
	Библиотека	Проповеди	Тайна ап.Иоанна	Поэзия	Фото
	Публицистика	Дискуссии	Эра Духа Святого	История	Фотокниги
	Апостасия РПЦ МП	Свидетельства	Иконы	Стихи о.Олега	Стримы
	Жития святых	Книги о.Олега	Исповедь	Библия	Избранное
	Молитвы	Слово батюшки	Новомученики	Пожертвования	Контакты

Богослужения мирянским чином

Служба святому апостолу и евангелисту Иоанну Богослову

Утреня

Богослужение Утрени состоит из четырех частей:

1. Шестопсалмие, утренние молитвы священника, великая ектения, "Бог Господь и явися нам..."
2. Кафизмы с полиелеем и Евангелием.
3. Канон.
4. Хвалитные псалмы и великое славословие с ектениями и отпуст.

- 1 -

Братия:

Слава в вышних Богу, и на земли мир, в человецех благоволение (Трижды).
Господи! устне мои отверзеши, и уста моя возвестят хвалу Твою (Дважды).

Чтец читает псалом 3-й:

Господи, что ся умножиша стужающии ми!
Мнози востают на мя; мнози глаголют души моей: несть спасения ему в Бозе его.
Ты же. Господи, заступник мой еси, слава моя и возносяй главу мою.
Гласом моим ко Господу воззвах, и услыша мя от горы святыя Своея.
Аз уснух и спах, востах, яко Господь заступит мя.
Не убоюся от тем людей, окрест нападающих на мя.
Воскресни, Господи, спаси мя, Боже мой, яко Ты поразил еси вся враждующия ми всуе; зубы грешников сокрушил еси.
Господне есть спасение, и на людех Твоих благословение Твое.
Аз уснух и спах, востах, яко Господь заступит мя.

Чтец читает псалом 37-й:

Господи! да не яростию Твоею обличиши мене, ниже гневом Твоим накажеши мене:
Яко стрелы Твоя унзоша во мне и утвердил еси на мне руку Твою.
Несть исцеления в плоти моей от лица гнева Твоего, несть мира в костех моих от лица грех моих:
Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего.
Пострадах и слякохся до конца; весь день, сетуя, хождах, яко лядвия моя наполнишася поруганий, и несть исцеления в плоти моей.
Озлоблен бых, и смирихся до зела: рыках от воздыхания сердца моего.
Господи! пред Тобою все желание мое, и воздыхание мое от Тебе не утаися; сердце мое смятеся, остави мя сила моя, и свет очию моею, и той несть со мною.
Друзи мои и искренние мои прямо мне приближишася и сташа;
И ближнии мои отдалече мене сташа, и нуждахуся ищущии душу мою; и ищущии злая мне - глаголаху суетная, и льстивным весь день поучахуся.
Аз же, яко глух, не слышах, и яко нем - не отверзаяй уст своих;
И бых яко человек не слышай и не имый во устех своих обличения.
Яко на Тя, Господи, уповах; Ты услышиши, Господи, Боже мой.
Яко рех: да некогда порадуют ми ся врази мои, и внегда подвижатися ногам моим, на мя велеречеваша;
Яко аз на раны готов, и болезнь моя предо мною есть выну.
Яко беззаконие мое аз возвещу, и попекуся о гресе моем.
Врази же мои - живут, и укрепишася паче мене, и умножишася ненавидящии мя без правды.
Воздающии ми злая возблагая оболгаху мя, зане гонях благостыню.
Не остави мене, Господи, Боже мой, не отступи от мене.
Вонми в помощь мою. Господи спасения моего!
Не остави мене, Господи, Боже мой, не отступи от мене.
Вонми в помощь мою, Господи спасения моего!

Чтец читает псалом 62:

Боже, Боже мой, к тебе утреннюю, возжада тебе душа моя, коль множицею тебе плоть моя, в земли пусте и непроходне и безводне.
Тако со святем явихся тебе, видети силу твою и славу твою.
Яко лучши милость твоя паче живот, устне мои похвалите тя.
Тако благословлю тя в животе моем, о имени твоем воздежу руце мои.
Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя:
Яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.
Тии же всуе искаша душу мою, внидут в преисподняя земли.
Предадятся в руки оружия, части лисовом будут.
Царь же возвеселится о Бозе: похвалится всяк кленыйся им, яко заградишася уста глаголющих неправедная.
На утренних поучахся в тя, яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.

Слава Отцу и Сыну и Святому Духу.

Братия:

И ныне и присно и во веки веков.
Аминь.

Братия:
Аллилуиа, Аллилуиа, Аллилуиа. Слава Тебе Боже. (Трижды – без поклонов)

Старший:

Слава Отцу и Сыну и Святому Духу.

Чтец читает псалом 87-й:

И ныне и присно и во веки веков.

Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему:
Яко исполнися зол душа моя и живот мой аду приближися.
Привменен бых с нисходящими в ров, бых яко человек без помощи, в мертвых свободь;
Яко язвении спящии во гробе, ихже не помянул еси ктому, и тии от руки Твоея отриновени быша.
Положиша мя в рове преисподнем, в темных и сени смертней.
На мне утвердися ярость Твоя, и вся волны Твоя навел ecu на мя.
Удалил еси знаемых моих от мене, положиша мя мерзость себе, предан бых, и не исхождах.
Очи мои изнемогосте от нищеты, воззвах к Тебе, Господи, весь день: воздех к Тебе руце мои.
Еда мертвыми твориши чудеса? или врачеве воскресят и исповедятся Тебе?
Еда повесть кто во гробе милость Твою, и истину Твою в погибели?
Еда познана будут во тме чудеса Твоя, и правда Твоя в земли забвенней?
И аз к Тебе, Господи, воззвах, и утро молитва моя предварит Тя.
Вскую, Господи, отрееши душу мою, отвращаеши лице Твое от мене?
Нищ есмь аз, и в трудех от юности моея, вознесжеся, смирихся и изнемогох.
На мне преидоша гневи Твои, устрашения Твоя возмутиша мя.
Обыдоша мя яко вода, весь день, одержаша мя вкупе.
Удалил еси от мене друга и искренняго и знаемых моих от страстей.
Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему!

Чтец читает псалом 102-й:

Благослови душе моя Господа, и вся внутренняя моя имя святое Его.
Благослови душе моя Господа, и не забывай всех воздаяний Его;
Очищающаго вся беззакония твоя, исцеляющаго вся недуги твоя;
Избавляющаго от истления живот твой, венчающаго тя милостию и щедротами;
Исполняющаго во благих желание твое: обновится яко орля юность твоя.
Творяй милостыни Господь, и судьбу всем обидимым.
Сказа пути Своя Моисеови, сыновом Израилевым хотения Своя;
Щедр и милостив Господь, долготерпелив и многомилостив.
Не до конца прогневается, ниже во век враждует;
Не по беззаконием нашим сотворил есть нам, ниже по грехом нашым воздал есть нам.
Яко по высоте небесней от земли, утвердил есть Господь милость Свою на боявшихся Его.
Елико отстоят востоцы от запад, удалил есть от нас беззакония наша.
Якоже щедрит отец сыны, ущедри Господь боящихся Его.
Яко Той позна создание наше, помяну, яко персть есмы.
Человек, яко трава дние его, яко цвет сельный, тако оцветет;
Яко дух пройде в нем, и не будет, и не познает ктому места своего.
Милость же Господня от века и до века на боящихся Его.
И правда Его на сынех сынов, хранящих завет Его, и помнящих заповеди Его творити я.
Господь на небеси уготова Престол Свой, и Царство Его всеми обладает.
Благословите Господа вси Ангели Его, сильнии крепостию, творящии слово Его, услышати глас словес Его.
Благословите Господа вся силы Его, слуги Его, творящии волю Его.
Благословите Господа вся дела Его, на всяком месте владычества Его.

Благослови, душе моя, Господа. На всяком месте владычества Его, благослови, душе моя. Господа!

Чтец читает псалом 142-й:

Господи! услыши молитву мою, внуши моление мое во истине Твоей, услыши мя в правде Твоей,
И не вниди в суд с рабом Твоим! яко не оправдится пред Тобою всяк живый;
Яко погна враг душу мою, смирил есть в землю живот мой; посадил мя есть в темных, яко мертвыя века.
И уны во мне дух мой, во мне смятеся сердце мое.
Помянух дни древния, поучихся во всех делех Твоих, в творениих руку Твоею поучахся.
Воздех к Тебе руце моя, душа моя - яко земля безводная Тебе.
Скоро услыши мя, Господи: исчезе дух мой; не отврати лица Твоего от мене, и уподоблюся нисходящим в ров.
Слышану сотвори мне заутра милость Твою, яко на Тя уповах.
Скажи мне, Господи, путь, воньже пойду, яко к Тебе взях душу мою.
Изми мя от враг моих, Господи; к Тебе прибегох, научи мя творити волю Твою, яко Ты еси Бог мой.
Дух Твой благий наставит мя на землю праву!
Имене Твоего ради, Господи, живиши мя; правдою Твоею изведеши от печали душу мою;
И милостию Твоею потребиши враги моя, и погубиши вся стужающия души моей, яко аз раб Твой есмь.
Услыши мя, Господи, в правде Твоей, и не вниди в суд с рабом Твоим (дважды).
Дух Твой благий наставит мя на землю праву!

Слава Отцу и Сыну и Святому Духу.

Братия:

И ныне и присно и во веки веков.
Аминь.

Братия:
Аллилуиа, Аллилуиа, Аллилуиа. Слава Тебе Боже. (Трижды – без поклонов)

Братия:
Господи, помилуй. (12 раз) – читается вместо великой ектеньи -поклон-

В соответствии с Уставом зажигаются свечи в ознаменование того, что с явлением в мир Господа воссиял людям свет велий (Исаия).

Старший:
Бог Господь и явися нам, благословен Грядый во имя Господне.

Братия:
Бог Господь и явися нам, благословен Грядый во имя Господне.

Старший:
Исповедайтеся Господеви, яко благ, яко в век милость Его.

Братия:
Бог Господь и явися нам, благословен Грядый во имя Господне.

Старший:
Обышедше обыдоша мя, и именем Господним противляхся им.

Братия:
Бог Господь и явися нам, благословен Грядый во имя Господне.

Старший:
Не умру, но жив буду, и повем дела Господня.

Братия:
Бог Господь и явися нам, благословен Грядый во имя Господне.

Старший:
Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

Братия:
Бог Господь и явися нам, благословен Грядый во имя Господне.

Братия:

Апостоле Христу Богу возлюбленне, / ускори избавити люди безответныя: / приемлет тя припадающа, / Иже падша на перси приемый. / Егоже моли, Богослове: / и належащую мглу языков разгнати, / прося нам мира и велия милости. –дважды-

Старший:
Слава Отцу и Сыну и Святому Духу. И ныне и присно и во веки веков.

Братия поет Богородичен:
Вся паче смысла,/ Вся преславная Твоя, Богородице, таинства,/ чистоте запечатанной, и девству храниму,/ Мати позналася еси неложна,/ Бога рождши истиннаго;/ Того моли спастися душам нашим.

- 2 -

Стихословие Псалтири – кафизмы 16 и 17

Чтец читает 16-ю кафизму.:
Псалом 108: Рече Господь Господеви моему: седи одесную мене, дондеже положу враги твоя подножие ног твоих. Жезл силы послет ти Господь от сиона, и Господствуй посреде врагов твоих. С тобою начало в день силы твоея, во светлостех святых твоих: из чрева прежде денницы родих тя. Клятся Господь и не раскается: ты иерей во век по чину мелхиседекову. Господь одесную тебе сокрушил есть в день гнева своего цари: судит во языцех, исполнит падения, сокрушит главы на земли многих. От потока на пути пиет: сего ради вознесет главу.

Псалом 109: Исповемся тебе, Господи, всем сердцем моим в совете правых и сонме. Велия дела Господня, изыскана во всех волях его: исповедание и великолепие дело его, и правда его пребывает в век века. Память сотворил есть чудес своих: милостив и щедр Господь. Пищу даде боящымся его: помянет в век завет свой. Крепость дел своих возвести людем своим, дати им достояние язык. Дела рук его истина и суд, верны вся заповеди его, утвержены в век века, сотворены во истине и правоте. Избавление посла людем своим: заповеда в век завет свой: свято и страшно имя его. Начало премудрости страх Господень, разум же благ всем творящым и: хвала его пребывает в век века.

Псалом 110: Блажен муж бояйся Господа, в заповедех его восхощет зело. Сильно на земли будет семя его, род правых благословится: слава и богатство в дому его, и правда его пребывает в век века. Возсия во тме свет правым: милостив и щедр и праведен. Благ муж щедря и дая: устроит словеса своя на суде, яко в век не подвижится. В память вечную будет праведник. От слуха зла не убоится: готово сердце его уповати на Господа: утвердися сердце его, не убоится, дондеже воззрит на враги своя. Расточи, даде убогим: правда его пребывает во век века: рог его вознесется в славе. Грешник узрит и прогневается зубы своими поскрежещет и растает: желание грешника погибнет.

Слава Отцу и Сыну и Святому Духу.

Старший:
И ныне и присно и во веки веков.

Братия:
Аминь.

Братия:
Аллилуиа, Аллилуиа, Аллилуиа, слава Тебе, Боже –трижды-

Господи, помилуй. (12 раз) – читается вместо малой ектеньи -поклон-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает седален, глас 8-й:
Ты сын назвался еси Божественнаго грома, / во еже оглушити ушеса злочестивых, / и трубы сладчае возгласив, о всемудре! в правая сердца, Слова воплощения, / и яко искренний друг на перси возлегий. / Отонудуже почерпл еси разума явление, / всем проповедал еси Отцу Собезначальнаго, Иоанне апостоле: / молися Христу Богу, прегрешений оставление даровати / празднующим любовию святую память твою. –дважды-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает Богородичен:
Премудрость и Слово в Твоем чреве заченши неопально, Мати Божия, / миру родила еси мир Содержащаго / и в объятиих имела еси вся Содержащаго, / Пищедателя всех, и Творца твари. / Темже молю Тя, Всесвятая Дево, и верою славлю Тя, / избавитися мне прегрешений, / и в день суда, егда предстати имам пред Лицем Создателя моего, / Владычице Дево Чистая, / Твою помощь тогда подаждь ми: / вся бо можеши, елика хощеши, Всепетая.

Старший:
Слава Отцу и Сыну и Святому Духу

Чтец читает 17-ю кафизму.:
И ныне и присно и во веки веков. Аминь.
Блажени непорочнии в путь, ходящии в законе Господни. Блажени испытающии свидения его, всем сердцем взыщут его. Не делающии бо беззакония в путех его ходиша. Ты заповедал еси заповеди твоя сохранити зело: дабы исправилися путие мои, сохранити оправдания твоя. Тогда не постыжуся, внегда призрети ми на вся заповеди твоя. Исповемся тебе в правости сердца, внегда научитимися судбам правды твоея. Оправдания твоя сохраню: не остави мене до зела. В чесом исправит юнейший путь свой? внегда сохранити словеса твоя. Всем сердцем моим взысках тебе: не отрини мене от заповедий твоих. В сердцы моем скрых словеса твоя, яко да не согрешу тебе. Благословен еси, Господи: научи мя оправданием твоим. Устнама моима возвестих вся судбы уст твоих. На пути свидений твоих насладихся, яко о всяком богатстве. В заповедех твоих поглумлюся, и уразумею пути твоя. Во оправданиих твоих поучуся: не забуду словес твоих. Воздаждь рабу твоему: живи мя, и сохраню словеса твоя. Открый очи мои, и уразумею чудеса от закона твоего. Пришлец аз есмь на земли: не скрый от мене заповеди твоя. Возлюби душа моя возжелати судбы твоя на всякое время. Запретил еси гордым: прокляти уклоняющиися от заповедий твоих. Отими от мене понос и уничижение, яко свидений твоих взысках. Ибо седоша князи и на мя клеветаху, раб же твой глумляшеся во оправданиих твоих: ибо свидения твоя поучение мое есть, и совети мои оправдания твоя. Прильпе земли душа моя: живи мя по словеси твоему. Пути моя возвестих, и услышал мя еси: научи мя оправданием твоим. Путь оправданий твоих вразуми ми, и поглумлюся в чудесех твоих. Воздрема душа моя от уныния: утверди мя в словесех твоих. Путь неправды отстави от мене и законом твоим помилуй мя. Путь истины изволих и судбы твоя не забых. Прилепихся свидением твоим, Господи, не посрами мене. Путь заповедий твоих текох, егда разширил еси сердце мое. Законоположи мне, Господи, путь оправданий твоих, и взыщу и выну: вразуми мя, и испытаю закон твой и сохраню и всем сердцем моим. Настави мя на стезю заповедий твоих, яко тую восхотех. Приклони сердце мое во свидения твоя, а не в лихоимство. Отврати очи мои еже не видети суеты: в пути твоем живи мя. Постави рабу твоему слово твое в страх твой. Отими поношение мое, еже непщевах: яко судбы твоя благи. Се, возжелах заповеди твоя: в правде твоей живи мя. И да приидет на мя милость твоя, Господи, спасение твое по словеси твоему: и отвещаю поношающым ми слово, яко уповах на словеса твоя. И не отими от уст моих словесе истинна до зела, яко на судбы твоя уповах: и сохраню закон твой выну, в век и в век века. И хождах в широте, яко заповеди твоя взысках: и глаголах о свидениих твоих пред цари и не стыдяхся: и поучахся в заповедех твоих, яже возлюбих зело: и воздвигох руце мои к заповедем твоим, яже возлюбих, и глумляхся во оправданиих твоих. Помяни словеса твоя рабу твоему, ихже упование дал ми еси. То мя утеши во смирении моем, яко слово твое живи мя. Гордии законопреступоваху до зела: от закона же твоего не уклонихся. Помянух судбы твоя от века, Господи, и утешихся. Печаль прият мя от грешник, оставляющих закон твой. Пета бяху мне оправдания твоя на месте пришелствия моего. Помянух в нощи имя твое, Господи, и сохраних закон твой. Сей бысть мне, яко оправданий твоих взысках. Часть моя еси, Господи: рех сохранити закон твой. Помолихся лицу твоему всем сердцем моим: помилуй мя по словеси твоему. Помыслих пути твоя и возвратих нозе мои во свидения твоя. Уготовихся и не смутихся сохранити заповеди твоя. Ужя грешник обязашася мне, и закона твоего не забых. Полунощи востах исповедатися тебе о судбах правды твоея. Причастник аз есмь всем боящымся тебе и хранящым заповеди твоя. Милости твоея, Господи, исполнь земля: оправданием твоим научи мя. Благость сотворил еси с рабом твоим, Господи, по словеси твоему: благости и наказанию и разуму научи мя, яко заповедем твоим веровах. Прежде даже не смиритимися, аз прегреших: сего ради слово твое сохраних. Благ еси ты, Господи: и благостию твоею научи мя оправданием твоим. Умножися на мя неправда гордых: аз же всем сердцем моим испытаю заповеди твоя. Усырися яко млеко сердце их: аз же закону твоему поучихся. Благо мне, яко смирил мя еси, яко да научуся оправданием твоим. Благ мне закон уст твоих паче тысящ злата и сребра.

Слава Отцу и Сыну и Святому Духу.

Старший:
И ныне и присно и во веки веков.

Братия:
Аминь.

Братия:
Аллилуиа, Аллилуиа, Аллилуиа, слава Тебе, Боже – трижды -

Господи, помилуй. (12 раз) – читается вместо малой ектеньи -поклон-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает седален, глас 8-й:
Глубину ловления оставив, / Креста тростию вся яве в вере уловил еси, яко рыбы, языки; / ибо якоже тебе рече Христос, / показался еси ловец человеков, к благочестию уловляя. / Темже насеял еси и слова разум во всем Патме, / и Ефес приобрел еси словесы твоими, Богослове Апостоле; / моли Христа Бога, прегрешений оставление даровати / празднующим любовию святую память твою. –дважды-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает Богородичен:
Пречистая Дево Мати Божия, / души моея страсти лютыя исцели, молюся: / и прощение даруй мне моих прегрешений, яже безумне содеях, / душу и тело оскверних окаянный. / Увы мне, что сотворю в час оный, / внегда ангели душу мою разлучат от страстнаго моего телесе? / Тогда Помощница мне буди и Предстательница теплейшая: / Тя бо имам надежду, раб Твой.

Полиелей

Посреди храма устанавливается аналой, на него возлагается икона святого. Во время полиелея весь храм должен быть освещен свечами. Старший во время пения кадит храм и молящихся:

Старший:
Хвалите имя Господне, хвалите раби Господа.

Братия:
Аллилуиа. – 3 раза

Старший:
Благословен Господь от Сиона, живый во Иерусалиме.

Братия:
Аллилуиа. – 3 раза

Старший:
Исповедайтеся Господеви, яко благ, яко в век милость Его.

Братия:
Аллилуиа. – 3 раза

Старший:
Исповедайтеся Богу небесному, яко в век милость Его.

Братия:
Аллилуиа. – 3 раза

Старший:
Слава Отцу и Сыну и Святому Духу.

Чтец читает седален, глас 8-й:

Возлег на перси Иисусовы, дерзновение получил еси, яко ученик вопрошая: кто есть предатель Твой, Господи? И яко возлюблену зело сущу всехвальне, хлебом сего яве тебе показа. Темже яко таинник неизреченных быв, Слова воплощения научаеши концы. Богослове апостоле, моли Христа Бога, согрешений оставление даровати, празднующим любовию святую память твою. –дважды-

Старший:
И ныне и присно и во веки веков.
Аминь.

Чтец читает Богородичен:
Небесную дверь и кивот, всесвятую гору, / светлый облак воспоим, неопалимую купину, словесный рай, / Евы воззвание, вселенныя всея великое сокровище, / яко спасение в Ней соделася миру, и оставление древних согрешений. / Сего ради вопием Ей: / молися Сыну Твоему, прегрешений оставление даровати / благочестно покланяющимся Всесвятому Рождеству Твоему.

Величание поется многократно, пока не закончится каждение храма.

Братия:
Величаем тя, / апостоле Христов и Евангелисте Иоанне Богослове/ и чтим болезни и труды твоя, / имиже трудился еси / во благовестии Христове.

Чтец глаголет избранный псалом:
Небеса поведают славу Божию, творение же руку Его возвещает твердь. Пс 18:2
Исповедят небеса чудеса Твоя Господи. Пс 88:6А
Вместо отец Твоих быша сынове Твои. Пс 44:17А
Поставиши я князи по всей земли. Пс 44:17Б
Бог богов Господь глаголя и призва землю. Пс 49:1А
От восток солнца до запад, хвально имя Господне. Пс 112:3
Осветиша молния Твоя вселенную. Пс 96:4
Возвестиша небеса правду Его.
И видеша вси людие славу Его. Пс 96:6
Князи Иудови владыки их. Пс 67:28Б
Воцарися Бог над языки. Пс 46:9А
Бог, прославляем в совете святых.
Велий и страшен есть над всеми окрестными Его. Пс 88:8
Рцыте во языцех, яко Господь воцарися. Пс 95:10А
Возвестите во языцех славу Его, во всех людех чудеса Его. Пс 95:3
Во всю землю изыде вещание их.
И в концы вселенныя глаголы их. Пс 18:5
Покори люди нам, и языки под ноги наша. Пс 46:4
Велий Господь наш, и велия крепость Его. Пс 146:5А
Той даст силу и державу людем Своим: Благословен Бог. Пс 67:36

Слава Отцу и Сыну и Святому Духу.

Старший:
И ныне и присно и во веки веков.

Братия:
Аминь.

Братия:
Аллилуиа, Аллилуиа, Аллилуиа, слава Тебе, Боже – трижды -

Братия:
Господи, помилуй. (12 раз) – читается вместо малой ектеньи - поклон -

Степенна

Антифон 1-й (например 1-го гласа):

Братия:
От юности моея мнози борют мя страсти, но Сам мя заступи и спаси, Спасе мой! Ненавидящий Сиона посрамитеся от Господа: яко трава бо огнем будете изсохше!

Старший:
Слава Отцу и Сыну и Святому Духу. И ныне и присно и во веки веков.

Братия:
Святым Духом всяка душа живится и чистотою возвышается, светлеется Тройческим единством священнотайне.

Прокимен

Прокимен поется на 4-й глас; Поэтому существует практика на утрени не возглашать глас прокимна, кроме воскресных дней.

Чтец:
Прокимен, Псалом Давидов.

Чтец:
Во всю землю изыде вещание их, / и в концы вселенныя глаголы их.

Братия:
Во всю землю изыде вещание их, / и в концы вселенныя глаголы их.

Чтец:
Небеса поведают славу Божию

Братия:
Во всю землю изыде вещание их, / и в концы вселенныя глаголы их.

Чтец:
Во всю землю изыде вещание их.

Братия:
И в концы вселенныя глаголы их.

Стаpший:
От Иоанна Святаго Евангелия чтение.
Братия:
Слава Тебе, Господи, слава Тебе. -поклон-

Старший :
Вонмем.

Старший читает Евангелие :
"Во время оно глагола Симону Петру Иисус: Симоне Ионин, любиши ли Мя паче сих? Глагола Ему: ей, Господи, Ты веси, яко люблю Тя. Глагола ему: паси агнцы Моя. / Глагола ему паки второе: Симоне Ионин, любиши ли Мя? Глагола Ему: ей, Господи, Ты веси, яко люблю Тя. Глагола ему: паси oвцы Моя. / Глагола ему третие: Симоне Ионин, любиши ли Мя? Оскорбе же Петр, яко рече ему третие: любиши ли Мя? и глагола Ему: Господи, Ты вся веси: Ты веси, яко люблю Тя. Глагола ему Иисус: паси oвцы Моя. / Аминь, аминь глаголю тебе: егда был еси юн, поясался еси сам, и ходил еси, аможе хотел еси: егда же состареешися, воздежеши руце твои, и ин тя пояшет, и ведет, аможе не хощеши. / Сие же рече, назнаменуя, коею смертию прославит Бога. И сия рек, глагола ему: иди по Мне. / Обращься же Петр виде ученика, егоже любляше Иисус, вослед идуща, иже и возлеже на вечери на перси Его и рече: Господи, кто есть предаяй Тя? / Сего видев Петр, глагола Иисусови: Господи, сей же что? / Глагола ему Иисус: аще хощу, да той пребывает, дондеже прииду, что к тебе? ты по Мне гряди. / Изыде же слово се в братию, яко ученик той не умрет. И не рече ему Иисус, яко не умрет, но: аще хощу тому пребывати, дондеже прииду, что к тебе? / Сей есть ученик свидетельствуяй о сих, иже и написа сия: и вем, яко истинно есть свидетельство его. / Суть же и ина многа, яже сотвори Иисус, яже аще бы по единому писана быша, ни самому мню всему миру вместити пишемых книг. Аминь."

Братия:
Слава Тебе, Господи, слава Тебе. -поклон-

Братия:
Воскресение Христово видевше,/ поклонимся Святому Господу Иисусу,/ единому Безгрешному./ Кресту Твоему покланяемся, Христе,/ и святое Воскресение Твое поем и славим:/ Ты бо еси Бог наш, разве Тебе иного не знаем,/ имя Твое именуем. Приидите вси вернии, поклонимся Святому Христову Воскресению:/ се бо прииде крестом радость всему миру,/ всегда благословяще Господа,/ поем Воскресение Его: /распятие бо претерпев,/ смертию смерть разруши. - 3 поясных поклона –

Чтец глаголет псалом 50-й:
Помилуй мя Боже, по велицей милости Твоей и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих, яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица Твоего, и Духа Твоего Святаго не отими от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы.

Старший:
Слава Отцу и Сыну и Святому Духу.

Братия:
Молитвами апостолов, Милостиве, очисти множества согрешений наших. И ныне и присно и во веки веков, аминь.

Старший:
И ныне и присно и во веки веков, аминь.

Братия:
Молитвами Богородицы, Милостиве, очисти множества согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое!

Братия поет стихиру (глас 2):
Богослове девственниче, / учениче возлюбленне Спасов,/ молитвами твоими нас спасай, молимся, от всякаго вреда, / яко твое есмы стадо.

Старший:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго пророка, Предтечи и Крестителя Иоанна, святаго Апостола Иоанна Богослова и прочих святых славных и всехвальных апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николая, архиепископа Мир Ликийских, чудотворца: святых равноапостольных Мефодия и Кирилла, учителей Словенских: святаго равноапостольнаго великаго князя Владимира: иже во святых отец наших всея России чудотворцев, Михаила, Петра, Алексия, Ионы, Филиппа и Ермогена: святых славных и добропобедных мучеников, преподобных и богоносных отец наших, святых и праведных Богоотец Иоакима и Анны (и святаго, имя рек, егоже есть храм и егоже есть день) и всех святых: молим Тя, многомилостиво Господи, услыши нас, грешных, молящихся Тебе, и помилуй нас.

Братия:
Господи, помилуй. (12 раз)

- 3 -

Каноны (Богородицы со ирмосом на 6, и Апостола оба канона на 8)

Песнь 1-ая (Канона Богородицы, глас 2-й)

Ирмос 1-й: Во глубине постла иногда, / фараонитское всевоинство преоруженная сила, / воплощшееся же Слово всезлобный грех потребило есть, / препрославленный Господь, славно бо прославися.

Припев: Пресвятая Богородице, спаси нас!

Тропарь: Яко красную, яко Предобрую всю, / яко Непорочную в женах, Бог Тя избрав, / во утробу Твою вселися непорочную: / Егоже моли, Всенепорочная, порока грехов избавити вся поющия Тя.

Тропарь: Псаломски, Чистая, одесную якоже Царица, / от Твоея утробы возсиявшаго Царя предстала еси: / Егоже моли, Всенепорочная, / да деснаго предстателя покажет мя в день воздаяния, Богоневесто.

Тропарь: Пресохшее естество человеческое всякими безместии, / Рождшая Дождь Небесный, вся обновила еси: / но молюся, и души моея бразду изсохшую / покажи плодоносну, Богоневесто.

Тропарь: Умертвившеся садом разума, / Древом же Жизни, Чистая, к жизни вечной призвани быхом, / от Тебе, Богородице, процветшим паче смысла, Христом Богом, / Егоже со дерзновением моли, спастися душам нашим.

Песнь 1-ая (Канона Апостола, Феофаново, глас 2-й)

Ирмос 1-й: Во глубине постла иногда, / фараонитское всевоинство преоруженная сила, / воплощшееся же Слово всезлобный грех потребило есть, / препрославленный Господь, славно бо прославися.

Припев: Святый Апостоле и Евангелисте Иоанне Богослове, моли Бога о нас.

Тропарь: Царство Небесное блаженне, еже проповедал еси восприим, / и Слову собеседник быв Небесному, / верующия честному твоему проповеданию и богословию / твоими молитвами сохрани.

Тропарь: Крепок смысл являя, / о всех небрегл еси сущих на земли и уз естества: / и Слову, всемудре, словесне же и умне сопребывая, / от безсловесия безсловесне живущия свободил еси.

Тропарь: Небесных разум приим, богословеснейше, / Бога Слова проповедал еси: / в начале бе Слово, и Слово бе к Своему Родителю, и Бог бе Слово, / благовествуя научил еси.

Богородичен: Отроковиц божественных лик / божественнейше в женах Тя добрую воспевают, Богородице Владычице, / добротами украшену Божества: / добротворительное бо Слово паче слова родила еси.

Песнь 1-ая (другого Канона Апостола, Иосифово, глас 6-й)

Ирмос 1-й: Яко по суху пешешествовав Израиль, / по бездне стопами, / гонителя фараона / видя потопляема, / Богу победную песнь поим, вопияше.

Припев: Святый Апостоле и Евангелисте Иоанне Богослове, моли Бога о нас.

Тропарь: Во глубины духа мыслию озарився приник, / и Рождество страшное нам ясно сказал еси, вопия, Богослове: в начале бе Слово Божие.

Тропарь: Приклоняеми множеством напастей, и страстей, и скорбей, и лютых нахожденьми, / верою прибегаем к тебе, Богослове, помощник буди рабом твоим.

Тропарь: Душ наших страсти лютыя, / яко врач изряден, уврачив мудре, / вечнаго избави ны осуждения и огня, ходатайством твоим.

Богородичен: Бога заченшая нас ради бывшаго Человека, / Того умоли, Чистая, / в День Суда нас ущедрити, многая согрешивших Ему.

Катавасия 1-я: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Песнь 3-ая (Канона Богородицы, глас 2-й)

Ирмос 3-й: Процвела есть пустыня яко крин, Господи, / языческая неплодящая Церковь, пришествием Твоим, / в нейже утвердися мое сердце.

Припев: Пресвятая Богородице, спаси нас!

Тропарь: Облечеся в мя человека, от чрева Твоего прошед Творец, Всенепорочная, / нетления одежду даруя, / обнажшемуся многими безместии.

Тропарь: Пречестное родила еси Бога Слово, Владычице, / Егоже прилежно моли, ущедрити смиренную мою душу, / сладостей безчестии сетующую.

Тропарь: Язвы исцели души моея, Пречистая, / и смиренное сердце мое, огорченное ядом змииным, / действенною Твоею лечбою уврачуй.

Тропарь: Яко Мати, имущи дерзновение, Владычице, к Сыну Твоему, / проси помощи озлобленным людем, / беззаконных же низложи шатание.

Песнь 3-ая (Канона Апостола, Феофаново, глас 2-й)

Ирмос 3-й: Процвела есть пустыня яко крин, Господи, / языческая неплодящая Церковь, пришествием Твоим, / в нейже утвердися мое сердце.

Припев: Святый Апостоле и Евангелисте Иоанне Богослове, моли Бога о нас.

Тропарь: Троицы явил еси Богословным языком твоим / юже паче ума тайну, Иоанне Богоблаженне: / в нейже утвердися мое сердце.

Тропарь: Язык твой бысть / писменника трость Всесвятаго Духа, / Богописанно знаменующий честное твое и Божественное Евангелие.

Тропарь: Мудрости ты бездну почерпл еси всемудре, . возлег богомудренным дерзновением на премудрости Источнице: / и Сего богопроповедник был еси.

Богородичен: Едину Девствующую и Матерь чтим, / яко спасения ходатаицу бывшу нам, Всенепорочная, / и мир избавльшую молитвами Твоими.

Песнь 3-ая (другого Канона Апостола, Иосифово, глас 6-й)

Ирмос 3-й: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени исповедания Твоего.

Припев: Святый Апостоле и Евангелисте Иоанне Богослове, моли Бога о нас.

Тропарь: Умом светлым и чистым беседовав к Слову, Богослове треблаженне, / тайнонаучился еси от Него, сущим вышше слова яве, / и всю тварь просветил еси.

Тропарь: Уз мя избави лютых греха, треблаженне, / любовию связуя мя Владыки и Бога, / Егоже возлюбил еси тепле, и Богослов Того нареклся еси.

Тропарь: Дался еси защитник нам, и ходатай, и избавитель, / и ко Господу молебник, и чудес самоделатель, и источник исцелений, Богослове. / Темже тя почитаем.

Богородичен: Егда Слово, Еже из Тебе воплотившееся неизреченно, Богородице, / на Древо вознесеся Креста, / девственнику ученику, яко Деву Отроковицу, Тебе вручи.

Братия:
Господи, помилуй. (12 раз) – читается вместо ектеньи

Седален, глас 8. Подобен: Премудрости:

Премудрости на перси возлег, и разуму сущих научився, / Божественно возгремел еси: / в начале бе Слово, добре написав первый безначальное Рождество, / и проповедал еси всем Слова воплощение. / Темже и языком яко мрежею уловив языки, / благодатию Духа изучаеши концы, / и просвещаеши чудесы, Богослове Апостоле, моли Христа Бога грехов оставление даровати / празднующим любовию святую память твою. Дважды.

Слава Отцу и Сыну и Святому Духу. И ныне и присно и во веки веков.

Богородичен:В напасти многоплетенныя впад, от враг видимых и невидимых, / бурею одержим безчисленных согрешений моих; / и яко к теплому Твоему заступлению и Покрову моему, Чистая, / ко пристанищу притекаю Твоея благости. / Темже, Пречистая, из Тебе воплощенному безсеменно / молися прилежно о всех рабех Твоих, / непрестанно молящихтися, Богородице Пречистая, / молящи Его присно согрешений оставление даровати / воспевающим достойно славу Твою.

Песнь 4-ая (Канона Богородицы, глас 2-й)

Ирмос 4-й: Пришел еси от Девы, не ходатай, ни Ангел, / но Сам, Господи, воплощься, / и спасл еси всего мя человека. / Тем зову Ти: слава силе Твоей, Господи.

Припев: Пресвятая Богородице, спаси нас!

Тропарь: Каплю ми умиления одожди, Владычице, / отъемлющи весь сердца моего вар, и печаль мою / и пакостныя прилоги отгоняющи.

Тропарь: Оружием мя сладости уязвлена, и лежаща в ранах, / Пречистая, не презри, но исцели / копием и кровию распеншагося Сына Твоего и Бога нашего.

Тропарь: Обогатившаяся владычеством всякаго здания, / люте мя обнищавша, благодати Божественныя удостой, / яко да величаю Тя, яко благую мою Предстательницу, Всенепорочная.

Тропарь: Возсия из утробы Твоея, Отроковице неискусобрачная, Отчая заря, Христос, / и просвети вселенную распинаемь, / и бесовскую тьму потреби.

Песнь 4-ая (Канона Апостола, Феофаново, глас 2-й)

Ирмос 4-й: Пришел еси от Девы, не ходатай, ни Ангел, / но Сам, Господи, воплощься, / и спасл еси всего мя человека. / Тем зову Ти: слава силе Твоей, Господи.

Припев: Святый Апостоле и Евангелисте Иоанне Богослове, моли Бога о нас.

Тропарь: Слово тя Богослова достойно показа, / того Божества тайнонаучив преизящнейше / и еже по человеку строению научив неизреченному.

Тропарь: Ум Божествен и девственно тело стяжав, / храм был еси, живый же и одушевленный славне, / и жилище всепетыя Троицы священнейшее.

Тропарь: Сыновством Пречистыя Девы почествовался еси, девственниче блаженне, / и брат показался еси Избравшему тя, / и ученика Богослова совершившему.

Богородичен: Исцеляя Евы древнее преступление, / в Тя, Всенепорочную и Пречистую, вселися Пребожественный, / всего мя человека вообразити падша.

Песнь 4-ая (другого Канона Апостола, Иосифово, глас 6-й)

Ирмос 4-й: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени исповедания Твоего.

Припев: Святый Апостоле и Евангелисте Иоанне Богослове, моли Бога о нас.

Тропарь: Христос моя сила, / Бог и Господь, / честная Церковь / боголепно поет взывающи, / от смысла чиста о Господе празднующи.

Тропарь: Каплями напоил еси Слова, славне, подсолнечную всю, / мутныя нечестия воды изсушил еси благочестне: / сего ради тя почитаем.

Тропарь: Крепостию опояши и державою, молюся, / разслабленную всякими нанесенми душу мою, всемудре, / от нечистых врагов, прибегающую в кров твой.

Тропарь: Храм быв Божественнаго Духа, / в храме твоем божественнем верою приседящия, / храмы покажи Божия, Богослове, ходатайством твоим.

Богородичен: Божественный храм Божий воспоим, / Святую Деву ясне вси блажим, / обожени бывше Ею и от лютых избавляеми.

Песнь 5-ая (Канона Богородицы, глас 2-й)

Ирмос 5-й: Ходатай Богу и человеком был еси, Христе Боже: / Тобою бо, Владыко, к Светоначальнику Отцу Твоему, / от нощи неведения, / приведение имамы.

Припев: Пресвятая Богородице, спаси нас!

Тропарь: Путь жизни рождшая, Пречистая, / путевождствуй мя ныне на путь правый, / в безпутие и пропасть лютых падений безсловесно низриновеннаго.

Тропарь: Устранився без ума от разума Божия, / блудно пожих во стране дальней страстей заблудив: / но возврати, Дево Чистая, спаси Твоими мя утешенми.

Тропарь: Водами Твоими животочными напой раба Твоего, / пламенем сожигаемаго грехов, и палимаго прилоги демонскими, / Дево Мати Пречистая.

Тропарь: Се во чреве, Богородице Пречистая, / Христа Бога паче слова имела еси, якоже Исаиа провозгласи, / и паче естества Сего, Богородительница, родила еси.

Песнь 5-ая (Канона Апостола, Феофаново, глас 2-й)

Ирмос 5-й: Ходатай Богу и человеком был еси, Христе Боже: / Тобою бо, Владыко, к Светоначальнику Отцу Твоему, / от нощи неведения, / приведение имамы.

Припев: Святый Апостоле и Евангелисте Иоанне Богослове, моли Бога о нас.

Тропарь: Небесный ум, Богослове, явился еси Благодатию, / весь свет быв, еже к Началосвету приближением, / и чистым твоим зрением, еже к Нему, обожаемь.

Тропарь: Умом чистым, и святыми устнами Богодохновенне, / и пречистыми усты твое Евангелие проповедал еси: / и общее спасение всем верным предложил еси.

Тропарь: Со Христом живый от младенства, орган благодати от Него предложен был еси, / Богословии изобучаемь, / и Троичестей славе паче естества научаемь.

Богородичен: Глаголы Твоя поминающе, Тя ныне блажим: / Тобою, Всенепорочная, блаженство неизреченное, / и жизнь нестареющуюся истинно прияхом.

Песнь 5-ая (другого Канона Апостола, Иосифово, глас 6-й)

Ирмос 5-й: Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, / Истиннаго Бога, / от мрака греховнаго взывающа.

Припев: Святый Апостоле и Евангелисте Иоанне Богослове, моли Бога о нас.

Тропарь: Яко утро просиял еси сущим на земли, / Восток мысленный ясно проповедуя, апостоле, миру, / во плоти пришедший, и многобожия тьму разоривший.

Тропарь: Богословии твоими священными всяку напоил еси душу, / священнопроповедниче апостоле. / Темже ти зову: изсохшее сердце мое грехми, все напой.

Тропарь: Уранихся стрелами вражиими, всего мя уздрави, мудре, / предстательством твоим, молюся: / и на пути мя Божия управи, присно в беззакониих заблуждаема.

Богородичен: Егда предстала еси со возлюбленным учеником, у Креста Сына Твоего, Всенепорочная, / стенала еси плачущи, / и дивилася еси Того, еже к человеком многому состраданию.

Песнь 6-ая (Канона Богородицы, глас 2-й)

Ирмос 6-й: В бездне греховней валяяся, / неизследную милосердия Твоего призываю бездну: / от тли, Боже, мя возведи.

Припев: Пресвятая Богородице, спаси нас!

Тропарь: Не яви мене демоном в радость на Судищи будущем, Владычице: / но благосердно воззревши на мя, / Судию и Сына Твоего умоли.

Тропарь: Помыслы прогневах Тя, Господи, и лукавыми и беззаконными моими деяньми: /в молитву привожду Ти Матерь Твою, / ущедрив, спаси мя.

Тропарь: Осуждения избави мя, Владычице, самоосужденна суща прегрешенми, / яко Судию рождшая / и Бога всяческих, Всепетая.

Тропарь: Иисуса Спаса моли, / Егоже паче естества плотию родила еси, Дево Мати Пречистая, / избавитися от бед рабом Твоим.

Песнь 6-ая (Канона Апостола, Феофаново, глас 2-й)

Ирмос 6-й: В бездне греховней валяяся, / неизследную милосердия Твоего призываю бездну: / от тли, Боже, мя возведи.

Припев: Святый Апостоле и Евангелисте Иоанне Богослове, моли Бога о нас.

Тропарь: Иисус, Бог мой и Господь, / твою чистоту приим и всесовершенную святость, / брата тя, Богослове, прият.

Тропарь: Венчав свято житие твое, / сице уповав, Мудрости возлегл еси на перси, славне, / и благодать оттуду извлекл еси.

Тропарь: Великая и божественная сияния Богословия твоего, / всю просветиша, славне, вселенную / и светом Трисолнечным озариша.

Богородичен: Небо прострый волею, / небо земное иное распростре Тя, Богомати Чистая, / и из Тебе возсияв явися.

Песнь 6-ая (другого Канона Апостола, Иосифово, глас 6-й)

Ирмос 6-й: Житейское море / воздвизаемое зря напастей бурею, / к тихому пристанищу Твоему притек вопию Ти: / возведи от тли живот мой, / Многомилостиве.

Припев: Святый Апостоле и Евангелисте Иоанне Богослове, моли Бога о нас.

Тропарь: Бысть яко трость скорописца, истинно Богословный язык твой, / добропишущий разумение истинное, / и закон зело новейший, / на скрижалех, Богослове, сердец наших.

Тропарь: Увядивый искоренно нечестия отрасли, / яко возделатель всеизряднейший: / в души же мой страх Божий насади, славне, / добродетелей благоплодие процветающее.

Тропарь: Сына Девы Тя, из Тоя прошедый преявленно именова: / с Неюже молися, / положением всем сыном Божиим быти, всеприснопамятне, / творящим благоугодная Ему.

Богородичен: В подобии плоти познася человеком Бог / из Тебе, Всепепорочная: / Егоже моли всегда, / плоти нашея мудрования, Всечистая, умертвити пагубная.

Братия:
Господи, помилуй. (12 раз) – читается вместо ектеньи

Кондак: Величия твоя, девственниче, кто повесть? Точиши бо чудеса, и изливаеши исцеления, / и молишися о душах наших, / яко Богослов и друг Христов.

Икос: Высоты небесныя уведети, и моря глубины испытати дерзостно есть и непостижно: / якоже бо звезды исчислити, и приморский песок невозможно отнюд, / сице ниже яже богословова рещи довольно, / толицеми того венцы Христос, егоже возлюби, венча: / Емуже и на перси возлег, и на Тайней Вечери с Ним яде, / яко Богослов и друг Христов.

Песнь 7-ая (Канона Богородицы, глас 2-й)

Ирмос 7-й: Богопротивное веление беззаконнующаго мучителя, / высок пламень вознесло есть: / Христос же простре Богочестивым отроком росу духовную, / Сый благословен и препрославлен.

Припев: Пресвятая Богородице, спаси нас!

Тропарь: Крепость моя, и пение, и спасение, и твердое заступление, / и стена непобедима сущи, Владычице, / борющия мя демоны побори, / присно ищущия умертвити мя.

Тропарь: Бога воплощши, девственными Твоими кровьми обожила еси, Дево, человечество. / Темже молюся Тебе: / страстми оскверненнаго мя, и растленнаго вражиими коварствы, / избави молитвами Твоими.

Тропарь: Пещь прообразоваше рождество Твое, Всенепорочная: / отроки бо не опали, яко ниже ложесна Твоя огнь нестерпимый. / Темже молим Тя: / избави рабы Твоя огня вечнаго.

Тропарь: Пречистое зачатие, нетленное рождество / Ты едина показала еси, Дева пребывши: / Бога бо зачала еси над всеми сущаго, Чистая, Человека бывша, / верных на спасение и избавление.

Песнь 7-ая (Канона Апостола, Феофаново, глас 2-й)

Ирмос 7-й: Богопротивное веление беззаконнующаго мучителя, / высок пламень вознесло есть: / Христос же простре Богочестивым отроком росу духовную, / Сый благословен и препрославлен.

Припев: Святый Апостоле и Евангелисте Иоанне Богослове, моли Бога о нас.

Тропарь: Божественным сияя светолитием, / Духа Святаго ясно богословил еси, / исходяща из Безначальнаго Отца, и почивающа в Сыне неотходно, / яко Единосущна.

Тропарь: В тебе, блаженне, положи правды Солнце селение: / небо приснодвижимо тя соделавый, / и Богословным твоим языком проповедуемый Христос, / возлюбленне, препрославленный.

Тропарь: Глагол твоих сила, божественное вещание изыде, / всеблаженне досточудне, / и премирное твое Евангелие всю объяше землю / догматов величеством.

Богородичен: Пречистое зачатие, нетленное рождество / Ты едина показала еси, Дева пребывши: / Бога бо зачала еси над всеми сущаго, Чистая, Человека бывша, / верных на спасение и избавление.

Песнь 7-ая (другого Канона Апостола, Иосифово, глас 6-й)

Ирмос 7-й: Росодательну убо пещь содела Ангел / преподобным отроком, / халдеи же опаляющее / веление Божие, мучителя увеща вопити: / благословен еси, Боже отец наших.

Припев: Святый Апостоле и Евангелисте Иоанне Богослове, моли Бога о нас.

Тропарь: Гром разшумевший во вся концы воспоим Богослова: / имже всяк истинно слух огромлен взятся от земли, / и величается Христос всех Творец.

Тропарь: Обзорно дому твоего благолепие всяку просвещает мысль: / в немже всегда собирающеся, боголепне поем всяческих Творца / и благохвалим тя верно, суща предстателя нашего.

Тропарь: Яко звезду тя светлосияющую вемы, / светоносными сиянии твоими просвещатися, учениче, молимся, Христов, / избавляющиися от тьмы страстей и напастей всеразных, ходатайством твоим.

Богородичен: Благословим Тя, Всенепорочная, рождшую благословеннаго Господа: / благословенми разоршаго Божескими проклятое естество человеческое, / и обновившаго ны, обветшавшия тлею.

Песнь 8-ая (Канона Богородицы, глас 2-й)

Ирмос 8-й: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите вся дела Господня, Господа.

Припев: Пресвятая Богородице, спаси нас!

Тропарь: Ревнуй добрым, злых удалившися, попечением Божественных деяний, душе моя, / молящуюся о тебе Богоматерь, / и всех непостыдную имущи Предстательницу, / яко милостиву и человеколюбиву.

Тропарь: Разрешила еси уз человечество древняго осуждения, Богородительнице. / Темже молю Тя: / разреши всяк соуз злобный сердца моего, / связавши мя, Пречистая, Божественною любовию Зиждителя.

Тропарь: Славы Отчую зарю рождши, Богородице, / безславием прегрешений сетующее сердце мое уясни: / и славы присносущныя покажи мя причастника, / яко да верою славлю Тя.

Тропарь: Явися нам из Тебе, Богородительнице, правды истинное Солнце, / просвещая всяческая лучами Божества, / воплощься Вышний: / Егоже песнословим.

Песнь 8-ая (Канона Апостола, Феофаново, глас 2-й)

Ирмос 8-й: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите вся дела Господня, Господа.

Припев: Святый Апостоле и Евангелисте Иоанне Богослове, моли Бога о нас.

Тропарь: Якоже молния светлая проходящи, вселенней, блаженне, явился еси / чистоты светлостию, девства же блистанием / и благочестия догматы, мир просвещая, / возлюбленне, Христу Богу.

Тропарь: Тело и душу и ум очистив, / благовестил еси Небесное Христово Евангелие: / и Ангелом единожитель на небесех быв зовеши ныне: / благословите вся дела Господня, Господа.

Тропарь: Столп светел, возложение же Божественно небеснаго храма был еси, / и престол чувствия, и мудрости приятелище, / Богословия орган, поя: / благословите вся дела Господня, Господа.

Богородичен: Да клятву первую истребиши / и смертное осуждение древле праматере, / из Девы Богоматере, Слове Божий, родился еси, / всем даровав безсмертие негиблемо.

Песнь 8-ая (другого Канона Апостола, Иосифово, глас 6-й)

Ирмос 8-й: Из пламене преподобным росу источил еси, / и праведнаго жертву водою попалил еси: / вся бо твориши, Христе, токмо еже хотети. / Тя превозносим во вся веки.

Припев: Святый Апостоле и Евангелисте Иоанне Богослове, моли Бога о нас.

Тропарь: Риторствующим языком, блаженне, благообильствовал еси, / и умершия злобою, вся живоуловил еси, / священную твою приемшия проповедь. / Темже тя чествуем, яко таинника неизреченных.

Тропарь: Яко иный рай Божественный дом твой показася, / чудесы якоже цветы, / всех души веселя, апостоле, / и страстей прогоняя зловоние.

Тропарь: Боже, Боже мой, вонми ми / и избави мя от врагов, на кийждо день находящих мне / и смиренное сокрушающих сердце мое, / имея молящагося Тебе божественнаго ученика Твоего.

Богородичен: Иисуса Спаса, / Егоже воплотила еси от чистых кровей Твоих, Богорадованная, / испроси ущедрити ны, рабы Твоя, / и от вечныя муки изъяти.

Старший став пред иконою Божией Матери, кадит, возглашая:
Богородицу и Матерь Света в песнех возвеличим!

Песнь Пресвятыя Богородицы

Братия:
Величит душа Моя Господа,/ и возрадовася дух Мой о Бозе, Спасе Моем.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Яко призре на смирение рабы Своея,/ се бо отныне ублажат Мя вси роди.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Яко сотвори Мне величие Сильный/ и, свято имя Его, и милость Его в роды родов боящимся Его.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Сотвори державу мышцею Своею,/ расточи гордыя мыслию сердца их.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Низложи сильныя со престол, и вознесе смиренныя;/ алчущия исполни благ и богатящияся отпусти тщи.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Восприят Израиля, отрока Своего,/ помянути милости, якоже глагола ко отцем нашим, Аврааму и семени его даже до века.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Песнь 9-ая (Канона Богородицы, глас 2-й)

Ирмос 9-й: Безначальна Родителя Сын, / Бог и Господь, воплощься от Девы нам явися, / омраченная просветити, собрати расточенная. / Тем всепетую Богородицу величаем.

Припев: Пресвятая Богородице, спаси нас!

Тропарь: Вкусив Адам от древа снеди неподобающия, / смерть от древа горько обра: / на Древе пригвоздився Сын Твой, Пречистая, / сладость безсмертия источи: / сего ради Тя почитаем.

Тропарь: Царица еси, / Царя Христа и Господа, паче слова рождши, / разорившаго адова царства: / Егоже прилежно моли, Отроковице, / Вышняго Царствия удостоити вся чествующия Тя.

Тропарь: Ублагости, Владычице, смиренное сердце мое, / озлобленное сладостными потопленми, / яко Благаго рождшая, и благая сущи вся: / и к покаянию мя благих дверей введи.

Тропарь: Мертв быв на Крест возносимь, сим уморивый змия. / Темже зову Ти: / умерщвленную душу мою лукавыми делы / помилуй, Слове, и оживи молитвами Рождшия Тя.

Песнь 9-ая (Канона Апостола, Феофаново, глас 2-й)

Ирмос 9-й: Безначальна Родителя Сын, / Бог и Господь, воплощься от Девы нам явися, / омраченная просветити, собрати расточенная. / Тем всепетую Богородицу величаем.

Припев: Святый Апостоле и Евангелисте Иоанне Богослове, моли Бога о нас.

Тропарь: Ныне не в гаданиих, но лицем к лицу / сладости поток зрети удостоился еси: / и реку мира, и источник безсмертия: / имже ныне напаяемь, / наслаждаешися обожения.

Тропарь: Наземное просил еси седалище прияти от Христа, / но Он тебе перси Своя дарует: / на няже возлег, Богослове, / твердым и пребывающим седением добрым обогатился еси, / апостолов украшение.

Тропарь: Мудрости погасил еси еллинския безбожное, / в начале бе Слово, мудре, провещав, / и к Богу бе Слово, / и истинно Бог бе Слово, / Имже вся быша, видимая же и невидимая.

Богородичен: Яко утро обрелася еси утреннее в нощи жития, / девства зарями облистающи, / восток Солнца мысленнаго правды нам явльшая, / Богомати Всечистая.

Песнь 9-ая (другого Канона Апостола, Иосифово, глас 6-й)

Ирмос 9-й: Бога / человеком невозможно видети, /на Негоже не смеют чини Ангельстии взирати: / Тобою бо, Всечистая, явися человеком / Слово воплощенно. / Егоже величающе, / с Небесными вои Тя ублажаем.

Припев: Святый Апостоле и Евангелисте Иоанне Богослове, моли Бога о нас.

Тропарь: Часов и времен Господь сый / Избавитель, в преполовении дне на Кресте висяше / и тебе предаде, якоже девственнику, блаженне, Приснодеву, / славу неотъемлему дая, еже величати тя.

Тропарь: Сый с горними Божественными Силами / и с ними Божественное восклицая песнопение, / яже в дому твоем святом поющия и песнословящия Преблагаго, / спасай ходатайствы твоими честными, / Христов апостоле.

Тропарь: Верою просящия тя, спасай ны от всякия беды, / Богослове блаженне, / шествия наша, яже ко Господу, духом направляя, / и путевождствуя ны на путь мира заповедей Вседержителя.

Богородичен: Глас приносим Ти благодарствен, Божии Матери, светло и возопием: / радуйся, престоле Божий превысочайший, / радуйся, света облаче, / радуйся, раю, Еюже райския сладости сподобихомся.

Братия:
Господи, помилуй. (12 раз) – читается вместо малой ектеньи - поклон -

Старший:
Свят Господь Бог наш!

Братия:
Свят Господь Бог наш!

Старший:
Яко свят Господь Бог наш!

Братия:
Свят Господь Бог наш!

Старший:
Над всеми людьми Бог наш.

Братия:
Свят Господь Бог наш!

Ексапостиларий (светилен) Апостола.

Чтец :
Яко душею девственна тя и телом, блаженне, Слово избра, / Богослове девственниче, / и того Божества чудна показа писца и слугу, / иже и от земли преставился еси, не умер, / но в Бозе жив, и безсмертен пребывая.

Старший:
Слава Отцу и Сыну и Святому Духу

Чтец
Громов сын быв, человеком Богословил еси, / еже в начале бе Слово, апостоле Иоанне: / возлегий бо на перси верно Владыки твоего, / и оттуду почерп богословия струи, / тварь всю напаяеши.

Старший:
И ныне и присно и во веки веков. Аминь.

Чтец
Богородичен: При Кресте Сына Твоего и Бога / стоящи, Всечистая, со учеником девственником, / се, глаголет, сын Твой, услыша Создавшаго: / ученику же, се, глаголет, Мати твоя. / С нимже Тя вси поем, Богородительнице Дево.

- 4 -

Хвалитны псалмы

Старший:
(150-й) Всякое дыхание да хвалит Господа!
(148-й) Хвалите Господа с небес, хвалите Его в вышних!
Припев: Тебе подобает песнь, Богу!
Хвалите Его вси ангели Его, хвалите Его вся силы Его.
Припев: Тебе подобает песнь, Богу!

Чтец:
Хвалите его солнце и луна, хвалите его вся звезды и свет. Хвалите его небеса небес, и вода яже превыше небес. Да восхвалят имя господне: яко той рече, и быша: той повеле, и создашася. Постави я в век и в век века: повеление положи, и не мимо идет. Хвалите Господа от земли, змиееве, и вся бездны: огнь, град, снег, голоть, дух бурен, творящая слово его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да восхвалят имя господне, яко вознесеся имя того единаго: исповедание его на земли и на небеси. И вознесет рог людей своих: песнь всем преподобным его, сыновом исраилевым, людем приближающымся ему.
(149-й) Воспойте Господеви песнь нову, хваление его в церкви преподобных. Да возвеселится Исраиль о сотворшем его, и сынове Сиони возрадуются о царе совем: Да восхвалят имя его в лице, в тимпане и псалтири да поют ему. Яко благоволит Господь в людех своих, и вознесет кроткия во спасение. Восхвалятся преподобнии во славе, и возрадуются на ложах своих. Возношение божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

На 4

Старший:
1.Хвалите Его на силах Eгo!

Братия:
Хвалите Его по множеству величествия Его!

Братия поет стихиру:
Блаженне Иоанне всемудре, / обильною теплотою Христовы любве, / множае всех был еси учеников любим Всевидцу Слову / и судящему правыми мерами всей вселенней, / чистоты и девства добротами озарився, / телом и помыслом, Богоблаженне.

Старший:
2.Хвалите Его во гласе трубнем.

Братия:
Хвалите Его во псалтири и гуслех!

Братия поет стихиру:
Девства процветение, / честных добродетелей приятное жилище, / мудрости орган, Духа храм, светоносная уста благодати, / Церкве светлейшее око, / всечестнаго Иоанна песньми духовными ныне восхвалим, / яко служителя Христова.

На 2

Старший:
1.Хвалите Его в тимпане и лице.

Братия:
Хвалите Его во струнах и органе.

Братия:
Богословия воды, / на перси возлег, мудрости почерпл еси, / и мир напоил еси, / Иоанне всеизящнейше, / Троицы ведением море изсушил еси безбожия, / столп быв и облак одушевлен, / наставляя ны к небесному наследию.

Старший:
2.Хвалите Его в кимвалех доброгласных, хвалите Его в кимвалех восклицания.

Братия:
Всякое дыхание да хвалит Господа.

Братия поет стихиру:
Евангелисте Божественне, / благих источник, Царство недвижное, / жизнь вечную, и радость неизглаголанную, / и зрения Божественнаго наслаждение, и богатодатно Христова дарования, / ум превосходяй и человеческий помысл, / сыне громов, благовествуяй миру уяснил еси.

Старший:
Слава Отцу и Сыну и Святому Духу

Чтец
Благовестниче Иоанне, / равноангельне девственниче, Богослове, богонаученне, / православно миру пречистое ребро, / кровь и воду источившее проповедал еси, / имже вечную жизнь обретаем душам нашим.

Старший:
И ныне и присно и во веки веков. Аминь.

Чтец
Богородичен: Владычице, приими молитвы раб Твоих, / и избави нас / от всякия нужды и печали.

Великое славословие

Слава в вышних Богу,/ и на земли мир,/ в человецех благоволение. /Хвалим Тя, благословим Тя,/ кланяем Ти ся, славословим Тя, благодарим Тя/ великия ради славы Твоея.
Господи, Царю Небесный, Боже, Отче Вседержителю,/ Господи Сыне Единородный, Иисусе Христе, и Святый Душе./ Господи Боже, Агнче Божий, Сыне Отечь,/ вземляй грехи мира, помилуй нас.
Вземляй грехи мира, приими молитву нашу./ Седяй одесную Отца, помилуй нас./ Яко Ты еси Един Свят;/ Ты еси Един Господь, Иисус Христос, в славу Бога Отца, аминь.
На всяк день благословлю Тя и восхвалю имя Твое во веки, и в век века.

Сподоби, Господи, в день сей без греха сохранитися нам!/ Благословен еси, Господи Боже отец наших,/ и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим (трижды).
Господи! прибежище был еси нам в род и род./ Аз рех: Господи! помилуй мя, исцели душу мою, яко согреших Тебе.
Господи! к Тебе прибегох: научи мя творити волю Твою, яко Ты еси Бог мой,/ яко у Тебе источник живота,/ во свете Твоем узрим свет./ Пробави милость Твою ведущим Тя!
Святый Боже, Святый Крепкий, Святый Безсмертный, помилуй нас! (трижды).
Слава Отцу и Сыну и Святому Духу, и ныне и присно и во веки веков, аминь.
Святый Безсмертный, помилуй нас. Святый Боже, Святый Крепкий, Святый Безсмертный, помилуй нас!

Братия творит поясной поклон и после этого поет тропарь:
Апостоле Христу Богу возлюбленне, / ускори избавити люди безответны: / приемлет тя припадающа, / Иже падша на перси приемый. / Егоже моли, Богослове: / и належащую мглу языков разгнати, / прося нам мира и велия милости.

Старший:
Слава Отцу и Сыну и Святому Духу, и ныне и присно и во веки веков, аминь.

Братия:
Богородичен:Вся паче смысла,/ Вся преславная Твоя, Богородице, таинства,/ чистоте запечатанной, и девству храниму,/ Мати позналася еси неложна,/ Бога рождши истиннаго;/ Того моли спастися душам нашим.

Братия:
Господи, помилуй. (12 раз) – читается вместо сугубой ектеньи - поклон -

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем!

Слава Отцу и Сыну и Святому Духу, и ныне и присно и во веки веков, аминь. Господи, помилуй, Господи, помилуй, Господи, помилуй. Благослови.

Старший говорит отпуст:
Воскресый из мертвых, Христос, истинный Бог наш, молитвами Пречистыя Своея Матере, Святаго Апостола и Евангелиста Иоанна Богослова, святых славных и всехвальных апостол, святых праведных богоотец Иоакима и Анны и всех святых помилует и спасет нас, яко Благ и Человеколюбец.