Крест
Покайтесь, ибо Господь грядет судить
Проповедь Всемирного Покаяния. Сайт отца Олега Моленко - omolenko.com
  tolkovanie.com  
  omolenko.com  
  propovedi.com  
  Избранное Переписка Календарь Устав Аудио
  Имя Божие Ответы Богослужения Школа Видео
  Библиотека Проповеди Тайна ап.Иоанна Поэзия Фото
  Публицистика Дискуссии Библия История Фотокниги
  Апостасия Свидетельства Иконы Стихи о.Олега Вопросы
  Жития святых Книга отзывов Исповедь Архив Карта сайта
  Молитвы Слово батюшки Новомученики Пожертвования Контакты
Главная страница сайта Печать страницы Ответ на вопрос Пожертвования Видеоканал проповедей Вниз страницы Вверх страницы К предыдущей странице   К вышестоящей странице   К следующей странице Перевод
YouTube канал отца Олега   YouTube канал проповедей отца Олега   YouTube канал стихотворений Олега Урюпина   Facebook страничка  


ВКонтакт Facebook Twitter Blogger Livejournal Mail.Ru Liveinternet

Богослужения мирянским чином

Служба святителю Николаю, архиепископу Мир Ликийских, чудотворцу

Богослужебные указания

• Малая и Великая Вечерня

• Утреня

Святитель Николай, архиепископ Мир Ликийский чудотворец




Малая и Великая Вечерня

На Малей вечерни, на Господи воззвах , стихиры: глас 4. Подобен: Яко добля:

Миром Божественным тя помаза Божественная благодать Духа, миряном председательствовавша, и мироблагоухавша добродетельми священнейше мира концы, сладкодохновенными же твоими молитвами злосмрадная прогоняща страсти всегда, сего ради тя верою благохвалим, и память твою всесвятую совершаем Николае.

Яко осиятеля тя незаходимаго, яко светильника всемирнаго, на тверди возсиявша церковней Николае, и мир просвещающа, и бед лютых мглу отгоняща, и изымающа печалей зимы, и тишину соделовающа глубокую, по долгу ублажаем.

И зде сый, и являяся в сониих Николае, иже неправедно имущия умрети спасл еси, яко сострадателен, яко благолюбивый, яко избавитель теплейший, яко предстатель истинный, верно просящих твоего защищения, священнейший отче, ангелов согражданине, апостолов и пророков равностоятелю.

Преславное житие твое всюду предивна тя показа, богомудре отче священнейший, святителей благолепие, преподобных украшение: и яко солнце на земли лучи распростер, озарил еси верных сердца, совершающих светоносную твою и божественную память, всеблаженне Николае.

Слава, глас 6:

Возсия якоже солнце, твоя святителю память, верных сердца мысленно просвещающи, юже и мы светло совершающе днесь, молебно тебе вопием: радуйся державо целомудрия, непорабощенно души соблюд достояние, воздержания щитом обложився. Радуйся пастырю и учителю христоименитых людей твоих. Радуйся церковное украшение, архиереев доброто, монашествующих похвало: Николае пресвященне, всеблаженне отче, Христа Бога моли непрестанно, мир подати вселенней, и спасти души наша.

И ныне, Богородичен.

Никтоже притекаяй к Тебе, посрамлен от Тебе исходит, Пречистая Богородице Дево, но просит благодати, и приемлет дарование к полезному прошению.

На стиховне стихиры, глас 6. Подобен: Тридневен воскресл еси:

Николае блаженне, припадающа мя ущедри, молюся тебе: и очи, премудре, просвети души моея, да чисте узрю Светодавца и Щедраго.

Стих: Честна пред Господем смерть преподобных Его.

Врагов ищущих злосотворити мне, святе, изми мя, дерзновение к Богу яко имея, иерарше Николае всеблаженне, и от мужей кровей спаси мя.

Стих: Священницы Твои облекутся в правду, и преподобнии Твои возрадуются.

Пристанище тя небурное и стену необоримую иерарше, тя стяжахом вернии, и столп утверждения, и дверь покаяния, и наставника душ, и поборника.

Слава, и ныне, Богородичен:

Возревновав соперник противу стаду Твоему Пречистая, на кийждо день ищет лукавый снедь сотворити: но Ты Богородице, того вреда изми ны.

Тропарь, глас 4:

Правило веры, и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашим.

Слава, и ныне, Богородичен:

Еже от века утаеное, и ангелом неведомое таинство, Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

На Велицей вечерни, Блажен муж, первый антифон. На Господи воззвах: стихиры на 8, глас 2. Подобен: Егда от древа:

В Мирех пожив чувственно, миро воистинну явился еси, миром помазався умным, святе Николае, святителю Христов: и благоухаеши лица, верою и любовию твою всеславную память совершающих присно, разрешая бед и напастей и скорбей сих отче, к Богу твоими молитвами.

Победы тезоименит воистинну верным людем яви: везде бо призываемь быстро предваряеши, любовию притекающих под кров твой: ты бо во дни и нощи верным являяся, спасаеши от напастей и обстояний.

Явился еси Константину царю, и Авлавию во сне, и сим страх вложив, сице тем рекл еси: разрешите убо вскоре, яже держите связанныя в темнице, неповинни бо суть беззаконнаго заколения. Обаче аще преслушаеши мене, мольбу сотворю Царю на тя, ко Господу моляся.

Велий заступник и теплый в бедах обретающимся еси славне, святе Николае, священнопроповедниче Христов: сущим на земли и плавающим, сущим далече и близ обретающимся, яко зело милостивнейший и молебник крепкий. Темже сошедшеся вопием: молися ко Господу, яко да всякаго избавимся обстояния.

Ины стихиры, глас тойже: Подобен: Киими похвальными:

Киими похвальными венцы увязем святителя, плотию в Мирех суща, и духовно всем достизающа, чисте того любящим, всех предстателя и заступника, и всех скорбных утешителя: и всех сущих в бедах прибежище, благочестия столпа, верных поборника? Егоже ради шатания врагов Христос низложи, имеяй велию милость. [Дважды.]

Киими песненными пении похвалим святителя, нечестия противоборца, и благочестия поборника: Церкве первостоятеля, великаго заступника же и учителя, вся злославныя посрамляюща: потребителя Ариева, и того пособников? Егоже ради сих шатание Христос низложи, имеяй велию милость.

Киими пророческими песньми похвалим святителя, иже далече сущая провидяща, и отстоящая яко близ суща пророчествующа неложно, и всю вселенную назирающа, и вся обидимыя избавляюща, во сне явльшася царю богомудрому, и древле связанныя заколения неправеднаго избавльша, и дарующа велию милость?

Слава, глас 6:

Святителей удобрение, и отцев славу, источника чудес и верных заступника великаго, сошедшеся о празднолюбцы! песненными похвалами воспоим, глаголюще: радуйся, миряном хранителю, и первоседателю честный, и столпе неподвижный. Радуйся, светильниче всесветлый, иже мирския концы просвещая чудесы. Радуйся, скорбящих божественная радосте, и обидимых теплый предстателю. И ныне, всеблаженне Николае, не престай моляся Христу Богу, о верою и любовию чтущих приснорадостную и всепразднственную память твою.

И ныне, предпразднства, глас тойже:

Вертепе благоукрасися, Агница бо грядет чревоносящи Христа: ясли же подымите словом разрешившаго от безсловеснаго деяния нас земнородных. Пастырие свиряюще свидетельствуйте чудеси страшному: и волсви от Персиды, злато и ливан и смирну Царю принесите, яко явися Господь из Девы Матере. Емуже и приникши рабски Мати поклонися, и привещаше к держимому на объятиих Ея: како всеялся еси Мне, или како прозябл еси во Мне, Избавителю Мой и Боже?

Вход. Прокимен дне. Чтения три. Притчей чтение. [Главы 3 и 8.]

Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней, и лета живота в деснице ея: в шуйце же ея богатство, и слава. От уст ея исходит правда, закон же и милость на языце носит. Послушайте убо мене, о чада! честная бо реку: и блажен человек, иже пути моя сохранит: исходи бо мои, исходи живота, уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно: Вся права суть разумевающим, и проста обретающим разум. Научу бо вас истине, да будет о Господе надежда ваша, и исполнитеся Духа.

Притчей чтение. [Главы 10 и 11.]

Уста праведнаго каплют премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение: тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их: Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, и в погибели нечестивых радование: Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение. [Глава 4.]

Праведник аще постигнет скончатися, в покои будет. Старость бо честна не многолетна: ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихира храма. Таже стихиры Николаа, глас 2, самогласны. Византиево:

Правило веры, и образ кротости, яви тя стаду твоему Христос Бог, святителю Николае: в Мирех убо благоухающу ти, всюду сияют светло божественная твоя исправления, сирых и вдовиц предстателю. Темже молися непрестанно, спасти души наша.

Отче Николае, мироположница мощей твоих Миры обогащает, в нихже и связанныя неправедно осужденныя, во сне царю видением твоим явився, свободил еси от смерти, и уз, и темницы. Но и ныне, якоже тогда, и присно видением твоим явися, моляй о душах наших.

Отче Николае, аще и Мирская страна молчит, но мир весь иже тобою просвещенный, мира же благоухании, и чудес множества, взывает благохвальными песньми: и спасшиися тобою осужденнии, с сущими в Мирех, и мы поюще вопием: моли спастися душам нашим.

Глас 4:

Отче Николае, Пресвятаго Духа мироположница сый, яко в Мирех благоухаеши божественными ароматы. Христовым бо апостолом подобник быв вселенную обходиши словесы чудес твоих. Темже и дальним яко близ, во сне являяся от смерти избавляеши, иже неправедным судом умрети имущия, спасая преславно от бед многих призывающия тя. Темже и нас от находящих лютых свободи твоими молитвами, присно восхваляющх тя.

Глас 8.

Доблестей твоих преподобне отче плод, просветил есть верных сердца: кто бо слыша безмерное твое смирение, терпению не удивися, еже к нищим тихости, к скорбящим утешению? Вся боголепно научил еси святителю Николае, и ныне неувядаемым венцем увязлся еси, молися о душах наших.

На хвалу потекл еси Господню, Николае, во временней жизни, и Той тя прослави на Небесней и истинней жизни. Темже дерзновение стяжав к Нему, моли спасти души наша.

Слава, глас 6:

Благий рабе верный, делателю винограда Христова, ты и тяготу дневную понесл еси, ты и данный тебе талант возрастил еси, и по тебе пришедшим не завидел еси, темже врата Небесная отверзошася тебе: вниди в радость Господа твоего, и моли о нас, святе Николае.

И ныне, глас тойже:

Сионе торжествуй, Иерусалиме веселися граде Христа Бога, подыми Зиждителя в вертепе и яслех вмещаемаго: отверзите ми врата, и вшед в ня, узрю яко Младенца пеленами повиваемаго, дланию же содержащаго тварь: Егоже поют ангели непрестанным гласом, Жизнодавца Господа, спасающаго род наш.

На стиховне, стихиры, глас 5: Подобен: Радуйся:

Радуйся, священная главо, честый добродетелей доме, Божественнейшаго священства правило, пастырю великий, светильниче светлейший, иже победы нося имя, и молящимся милостивен преклонитель, приницаяй к немощных прошениям, избавителю готовейший, хранителю спасительный, всем верою чтущим всеславную память твою, Христа моли преблаженне, низпослати миру велию милость.

Стих: Честна пред Господем смерть преподобных Его.

Радуйся, священнейший уме, Троицы чистое обиталище, столпе церковный, верных утверждение, побеждаемым помощь. Звездо, яже сияньми благоприятных твоих молитв, разоряя напастей же и скорбей тьму всегда, святителю Николае. Пристанище тихое в неже притекающе треволненьми жития одержимии спасаются: Христа моли, душам нашим дати велию милость.

Стих: Священницы Твои облекутся в правду, и преподобнии Твои возрадуются.

Радуйся ревности Божественныя исполнивыйся, и наведения зла избавль неправедно хотящих умрети, предстанием страшных и сна запрещеньми, источниче источаяй в Мирех Николае, мира богатно, и души напояющее, смрады же страстей отгоняющее, меч, плевелы прелести посекающий, лопата развевающая Ариева плевельная учения. Христа моли, низпослати душам нашим велию милость.

Слава, глас 6. Иоанна монаха:

Человече Божий, и верный рабе, слуго Господень, мужу желаний сосуде избранный, столпе и утверждение Церкве, Царствия наследниче, не премолчи вопия за ны ко Господу.

И ныне, глас тойже: Византиево:

Безневестная Дево, откуду пришла еси? Кто родивый Тя? Кто и мати Твоя? Како Зиждителя носиши на руку? Како не растлилася еси утробою? О великих преславных на Тебе страшных таинств, на земли совершаемых зрим Всесвятая! И предуготовляем достойный Тебе долг, на земли вертеп, и от Небес просим подати звезду, и волсви же приходят от востоков земли к западом видети человеческое спасение, во яслех пеленами повиваемое.

На благословении хлебов тропарь: Правило веры: дважды и Богородице Дево: единожды.

А идеже несть всенощнаго бдения: на Велицей вечерни, по Ныне отпущаеши: глаголем тропарь единожды: Слава, и ныне, Богородичен воскресен.





Утреня


На Утрени на Бог Господь: тропарь: Правило веры: дважды: Слава, и ныне, Богородичен: Еже от века утаеное: По 1-м стихословии седален, глас 2: Подобен: Гроб Твой:

В Мирех живый чувственне, иерарше, миром разумно духовным явился еси помазан отче Николае. Темже миры чудес твоих мир облаговонил еси миро приснотекущее проливая, мирными твоими благовонными словесы, и памятию твоею.

Слава:

Облиставаеши на земли чудес лучами, Николае мудре, и движеши всяк язык, на славу же и хвалу на земли тя Прославльшаго: Егоже моли всякия нужды избавитися, память твою верою и любовию почитающим, отцев избрание.

И ныне, Богородичен:

Всех Творца, Бога же и Содетеля, Всенепорочная Чистая, Духом Божественным в ложеснах, зачала еси, и тления кроме родила еси: Егоже славяще, Тя воспеваем Дево, яко палату Всецаря, и мира защищение.

По 2-м стихословии седален, глас 4. Подобен: Явился еси:

Верным предстательствуеши, покрывая, соблюдая тыя, блаженне, всякия скорби избавляя яве, иерархов краснейшая славо и хвало, Николае преподобне.

Слава, глас 8: Подобен: Премудрости:

Источник чудес отче мудре приемь от Господа, всем верным источаеши блаженне медоточныя воды: яко бо пастырь сый и проповедник веры, истиннаго Пастыря словеса соблюл еси. Темже дерзновение к Нему имея, человеки спасл еси от смерти, Николае иерарше блаженне: моли Христа Бога, грехов оставление подати чтущим любовию святую память твою.

И ныне, Богородичен:

В тину впад грехов, и несть мне постояния, люте потопи мя буря прегрешений: но яко рождшая Слово, единаго Человеколюбца, на мя раба Твоего призри, и избави мя всякаго греха, и страстей душетленных, и всякаго озлобления лукаваго убийцы, Богородице Неискусомужная: моли Христа Бога, грехов оставление дати мне: Тя бо надежду имам раб Твой.

По полиелеи седален, глас 5. Подобен: Собезначальное Слово:

Премудраго иерарха восхвалим, яко тепла в бедах и в скорбех суща от Бога помощника и защитника, вси Николая вернии богоноснаго благочестно: молится бо Господу, о верою творящих и поющих божественную память его.

Слава, глас 4: Подобен: Скоро предвари:

Предстатель теплейший Церкве Христовы показался еси Николае. И ересей безбожная разрушая со дерзновением, и правило показался еси всем православия, о всех моляся последующих твоим божественным учением, и наказанием.

И ныне, Богородичен:

Скоро приими Владычице молитвы наша, и сия принеси Твоему Сыну и Богу, Госпоже Всенепорочная: избави обстояний к Тебе притекающия: сокруши коварства, и низложи дерзость вооружающихся безбожных Пречистая, на рабы Твоя.

Степенна, первый антифон 4-го гласа. Прокимен, глас 4:

Честна пред Господем смерть преподобных Его.

Стих: Что воздам Господеви о всех, яже воздаде ми?: Всякое дыхание:

Евангелие Иоанна, зачало 36. (Ин.10,9–16.)

Во время оно, рече Господь Своим учеником: Аз eсмь дверь: Мною аще кто внидет, спасется: и внидет и изыдет, и пажить обрящет. / Тать не приходит, разве да украдет и убиет и погубит: Аз приидох, да живот имут и лишше имут. / Аз eсмь пастырь добрый: пастырь добрый душу свою полагает за oвцы: / А наемник, иже несть пастырь, eмуже не суть oвцы своя, видит волка грядуща, и оставляет oвцы, и бегает: и волк расхитит их, и распудит oвцы: / А наемник бежит, яко наемник eсть, и нерадит о oвцах. / Аз eсмь пастырь добрый: и знаю Моя, и знают Мя Моя: / Якоже знает Мя Oтец, и Аз знаю Oтца: и душу Мою полагаю за oвцы. / И ины oвцы имам, яже не суть от двора сего: и тыя Ми подобает привести, и глас Мой услышат: и будет eдино стадо и eдин Пастырь.

По 50-м псалме cтихира, глас 6:

Наследниче Божий, сопричастниче Христов, служителю Господень, святе Николае, по имени твоему тако и житие твое: спросия бо седине разум, свидетельствоваше светлость лица твоего душевное незлобие, извествоваше кротость слова молчаливое. Жизнь твоя славна, и успение со святыми: моли о душах наших.

Канон Богородицы со ирмосом на 6, и святаго два канона на 8.
Канон Богородицы, глас 1.

Песнь 1. Ирмос:

Песнь победную поим вси Богу, сотворшему дивная чудеса мышцею высокою, и спасшему Израиля, яко прославися.

Премудрости бездну рождшая, капли мудрости ми, источник благодатно точащий, Чистая низпосли, песнословити благодатей Твоих пучину.

Пою Тя Всепетая, Юже воспевают ангелов чини, яко Бога рождшую препетаго, Егоже вся тварь воспевает: яко прославися.

Канон святаго первый, егоже краестрочие: Тебе, Николае, воспеваю божественное пение. Творение Феофаново. Глас 2.

Песнь 1. Ирмос:

Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.

Венценосец престолу Христову премудре Николае, предстоя со ангельскими воинствы, просвещение ми даруй, озаряющее души моея омрачение, яко да восхвалю радуюся твою, всеблаженне, память.

Прославляяй вся Господь Того славящия, тя верным прибежище даде, напастей избавляюща притекающия к твоему крову, Николае, и призывающия тя верою и любовию, преславне.

Богородичен:

Сравнитися желание ми вложив змий вселукавый, Содетелю, яко пленника восхити. Тобою же, Всечистая, воззван бых, обожився истиннейше: Ты бо, о Богомати, мене обожившаго родила еси.

Другий канон по алфавиту, кроме Троичнов и Богородичнов. Глас 1.

Песнь 1. Ирмос:

Христос раждается, славите. Христос с небес, срящите. Христос на земли, возноситеся. Пойте Господеви вся земля, и веселием воспойте людие: яко прославися.

Недоуменным языком и устнами, похваление малое и моление принести твоему, Николае, приидох богоподражанному преизяществу: но яко богатодавец, Спаса и Бога милостива подаждь ми.

Человек сый Небесный, равноангелен на земли явился еси, вдов защитник готовый, и утруждаемых отмститель, и всем скорбящим в бедах помощник, отче Николае.

Сказует вся подсолнечная, Николае треблаженне, чудес твоих добродетелей пучину: нищии предстателя, и сироты и вдовы питателя, и слепии путевожда, вси же поборника.

Троичен:

Троицу чествую несозданную, Отца и Сына со Духом, существо просто, Божество, Естество несекомое существенне, три Ипостаси, разделяя лично и по Ипостаси.

Богородичен:

Безсеменно Слово зачала еси, Единаго от Троицы, Всенепорочная, и Сего плотию родила еси, пребывши по рождестве Дева яко и прежде: Сего яко Сына Твоего и Бога о нас присно моли.

Катавасиа: Христос раждается:

Песнь 3. Ирмос:

Да утвердится сердце мое в воли Твоей, Христе Боже, Иже над водами небо утверждей второе, и основавый на водах землю Всесильне.

Небес чистейшее Царево обителище, благодатно дышущий воистинну и благовонный рай, надежду христиан, Богородительницу мою воспеваю.

Словом Слово породила еси, словом все к существу приведшаго словесное естество, купно и безсловесное, безсловесия избавляющаго человеки, Всеблагословенная.

Ин. Ирмос:

Процвела есть пустыня, яко крин, Господи, языческая неплодящая церковь, пришествием Твоим, в нейже утвердися мое сердце.

Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.

Очисти рабы Твоя, грехов оставление яко благ даруя, Николаа Твоего угодника, яже к Тебе ходатайствы, Многомилостиве.

Богородичен:

Утоли смущение души моея, Пречистая, и жизнь окорми, Всесвятая, Бога рождшая, в Немже утвердися сердце мое.

Ин. Ирмос:

Прежде век от Отца рожденному нетленно Сыну, и в последняя от Девы воплощенному безсеменно, Христу Богу возопиим: вознесый рог наш, Свят еси, Господи.

Скрижаль в сердцы стяжав богомудре многих добродетелей, написану безсмертным и пречистым перстом Христа Бога, Николае, паче меда и сота сладость точиши из устен твоих.

Показа благодать на тебе, преславне, чудеса, Николае: чистое бо житие твое воистинну злата светлейши, облистает мрачныя души зарею Божественнаго Духа.

Живеши и по смерти, во снех яве являяся, и юноши от смерти преславно избавил еси, вопия яве царю: не обиди мужей, суетною завистию оклеветанных.

Троичен:

Милостива буди мне, Всесвятая Троице Боже наш, безмерными прегрешении осквернившему житие, Отче, Сыне, и Душе Живый, соблюдающи мя отвсюду, и присно неуязвлена от скорби.

Богородичен:

Даеши Богородице спасения надежду рабом Твоим, и в нуждах и напастех скоротечными молитвами соблюдати, и помогати предстани: Ты бо еси похвала нам верным, Приснодево.

Катавасиа: Прежде век:

Седален, глас 8. Подобен: Премудрости:

Возшед на высоту добродетелей и Божественными оттуду, отче, озарився сиянии чудес, пресветел воистинну явился еси мирови пастырь, нам в напастех сый предстатель непобедимь: темже преславно врага победив, лжу отгнал еси, и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.

Слава, другий седален, глас тойже:

Реку исцелений обильне изливающую, и источник тя чудес неоскудный показа, Николае, милости бездна: тяжкими бо недугами горце дручимии, и злоключеньми жития люте мучимии, всякия скорби целебную воистинну обретают лечбу, теплое твое защищение. Сего ради вопием ти: молися Христу Богу, прегрешений оставление даровати празднующим любовию святую память твою.

И ныне, Богородичен:

Яко Деву и едину в женах, Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко Младенца доиши Зиждителя и Господа. Тем ангельский и человеческий род достойно славим Пресвятое Рождество Твое, и согласно вопием Ти: моли Христа Бога, согрешений оставление даровати, покланяющимся верою Пресвятому Рождеству Твоему.

Песнь 4. Ирмос:

Духом провидя пророче Аввакуме, Словесе воплощение, проповедал еси вопия: внегда приближитися летом, познаешися, внегда приити времени, покажешися. Слава силе Твоей, Господи.

Смерти убо вина земным Ева бысть, советом змия: Ты же Дево Чистая, рождшая словом Слово, безсмертия и жизни ходатаица явилася еси. Темже достойно поем Тя.

Духом пророцы предзряще Тя Чистая, гору, дверь, трапезу, святый кивот, свещник, престол жизни, стамну и одр, Божию Матерь в гаданиих Тя проявиша: ихже мы зрим сбытие.

Ин. Ирмос:

Пришел еси от Девы, ни ходатай, ни ангел, но Сам Господи, воплощься, и спасл еси всего мя человека. Тем зову Ти: слава силе Твоей, Господи.

Приближився чисте зарям духовным, светоносец был еси, мира просвещая концы, всем предстательствуя, и вся спасая верою к тебе притекающия.

Избавляя от смерти, яко явился еси первее, Николае, юноши преподобне: тако и ныне мя спаси от всякаго обстояния, и напастей и бед, всеблаженне.

Облистал еси добродетелей сияньми всеблаженне, подражатель преизряднейший твоего Владыки быв, спасаеши же призываемь, благоговением и любовию тя славящия.

Богородичен:

Найде на Тя Владыка твари воплощаемь, и спасая яко благоутробен всего мя, человека: темже вернии Богородицу Тя славим.

Ин. Ирмос:

Жезл из корене Иессеова, и цвет от него Христе, от Девы прозябл еси, из горы хвальный приосененныя чащи, пришел еси воплощься от неискусомужныя невещественный и Боже, слава силе Твоей, Господи.

Именование твое едино воистинну призываемо, от всех вражиих совет скоро избавляет зовущия тебе тепле, священне Николае: яко первее воеводы избавил еси, спаси и нас от всякаго лютаго обстояния.

Престолу предстоя Божию, молити прилежно, мудре, не престай, о всех нас твоих верных рабех, чудне Николае: да огня вечнаго избавимся, и от врагов, языка лукаваго, и озлобления.

Врачевания точиши всюду верою к тебе притекающим, и от уз избавляеши вся. Темже печаль нашу в радость преложи, твоими богоприятными молитвами, Николае пресветле, низлагая гордость врагов наших.

Троичен:

Безначальнаго Божества начало Отца, и Сына чту, и Духа почитаю Всесвятаго: всяческих вседетельное, единственное, несекомое, треми характиры и Лицы разделяемое присно, едино Царство нераздельное.

Богородичен:

Ты воистинну паче земных и небесных честнейши, едина еси, Богородительнице, всех бо Творца во утробе зачала еси, плотию вещною одеяна, рождши без семене. О новолепнаго зрения!

Катавасиа: Жезл из корене Иессеова:

Песнь 5. Ирмос:

Светлый нам возсияй свет присносущный, утренюющим о судьбах заповедей Твоих, Владыко Человеколюбче Христе Боже наш.

Яко кивот честная священия, и яко огнеобразный престол свят, и яко палата освященная, Владыце, вместила еси Бога Вседержителя.

Мати неискусомужная в девах, ты паки Дева в матерех, едина Пречистая, явилася еси! Бога бо неизреченно родила еси естество воздающаго.

Ин. Ирмос:

Просвещение во тьме лежащих, спасение отчаянных, Христе Спасе мой, к Тебе утренюю Царю мира, просвети мя сиянием Твоим: иного бо разве Тебе бога не знаю.

Боголепным житием треблаженне просвещаемь, осужденныя неправедным изречением умрети, представ, избавил еси, Владыце Христу зовущия: иного бо разве Тебе бога не знаем.

На Небесех присносущную славу ныне зря, и неизглаголанныя и Божественныя зари светлейшими наслаждаяся сиянии, покрый мя предстательством твоим преподобне, угодниче Христов всечестне.

Богородичен:

Да Твой взыщеши образ погребенный страстьми, Спасе, небесных утаився сил воплощься из Девы, явился еси Тебе зовущим: иного разве Тебе бога не знаем.

Ин. Ирмос:

Бог сый мира, Отец щедрот, великаго совета Твоего Ангела, мир подавающа послал еси нам: тем богоразумия к свету наставльшеся, от нощи утренююще, славословим Тя, Человеколюбче.

Проповедует твоя, отче, чудеса, ныне Мир величайшая митрополиа, и Ликийская епархия, и вся отечествия твоя чудодейства: имиже вся от болезней и скорбей избавляеши, богоблаженне Николае.

Питатель вдов, и отец сирот, помощник сущим в скорбех всеизряднейший, плачущим утешение, пастырь и путевождь всех блудящих, Николае, сый, и нас твоими молитвами от бед избави.

Преставился еси от земли к невещественным обителем, идеже зриши доброту неизреченную Христову, и ангельским воинством собеседник явился еси. Темже со апостолы и с мученки ликуя, прилежно Владыце всех, отче Николае, о нас молися.

Троичен:

Собезначальная три, единопрестольная, нераздельнаго же Единаго Божества славлю самовластная Лица яве, имже из не сущаго приведохся во еже быти, со ангелы зовый: Свят, Свят, Свят еси, Господи.

Богородичен:

Человеком спасение всем и упование, яже предваряющи едина и спасающи, помози и ныне нам вопиющим Тебе, Чистая, и призывающим Тя присно во обстоянии лютых: предстательницы бо иныя разве Тебе по Бозе не имамы.

Катавасиа: Бог сый мира:

Песнь 6. Ирмос:

Пророка Иону подражая, вопию: живот мой, Блаже, свободи из тли, и спаси мя, Спасе мира, зовуща: слава Тебе.

Заступление верных, и печальных радостное веселие, радостию обогати духовною рабы Твоя, желающия заступления Твоего.

Небо словесное, храм пречистый, святый кивот, краснейший Божий рай, в немже древо жизни моея, да поется.

Ин. Ирмос:

В бездне греховней валяяся, неизследную милосердия Твоего призываю бездну: от тли, Боже, мя возведи.

Иже победы, Николае, венец на твоем версе достойно положися: яко победитель убо изряднейший, тя призывающия спаси.

умерщвлена мя, блаженне, прегрешеньми, и страстей треволненьми погружаема, явився спаси ко пристанищу Божественныя воли.

Богородичен:

На Тя надежды возложих, Мати Приснодево, спасения моего, и Тя предстательницу полагаю жизни, тверду же и непоколебиму.

Ин. Ирмос:

Из утробы Иону младенца изблева морский зверь, якова прият: в Деву же всельшееся Слово, и плоть приемшее, пройде сохраншее нетленну. Егоже бо не пострада истления, рождшую сохрани неврежденну.

Новый явился еси Авраам, Николае, яко единородна бо ныне привел еси сына Владыце твоему, безкровныя жертвы принося присно. От нюдуже благословился еси яко страннолюбец отче, и Троицы был еси обитель божественна и непорочна.

Странна и ужасна содеваеши чудеса, Николае, по всей земли, и в море далече бедствующим скоротечными молитвами предстательствуя, немощным врач, и нищим питатель, победы на враги, тезоименит, людем верным являяся.

Оком умным провидя будущая, учений правых наполнил еси вся концы: единосущна Отцу Сына возвещая нам, Ариево неистовство потребил еси, столп православныя веры, честная твоя предложив исправления.

Троичен:

Чту и почитаю Троицу нераздельную, треми Лицы разделяемую присно, соединяемую же существом и естеством, яко едино начало, Отца, и Сына, и Духа Святаго, всеми державно владычествующую, и вся соблюдающую, яко хощет.

Богородичен:

Весь воплощься во утробе Твоей, Пречистая, Христос Бог, без семене родися: не стерпе бо своих рук создание зрети от льстиваго мучимо, прииде рабозрачным образом человеческий род избавити.

Катавасиа: Бог сый мира:

Кондак, глас 3: Подобен: Из утробы Иону:

В Мирех, святе, священнодействитель показался еси, Христово бо, преподобне, Евангелие исполнив: положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати.

Икос:

Воспоим ныне святителя песньми, Мирским людем пастыря и учителя, да молитвами его просветимся: се бо явися чист весь, нетленен духом, Христу принося жертву непорочну, чисту, Богу благоприятну. Яко святитель очищен и душею и телом. Темже сый истинно Церкве предстатель и поборник сея, яко великий таинник Божия благодати.

Песнь 7. Ирмос:

Пещь, Спасе, орошашеся, отроцы же ликующе пояху: отцев Боже, благословен еси.

Высочайший, небо тя одушевленное, чертог же Чистая благодатно окружен, златообразную порфиру, и рай показа.

Утверди ума моего вращение, помышление мятежно укрепи на недвижимом камени, покровом Твоим, Мати Дево.

Ин. Ирмос:

Образу златому на поле Деире служиму, трие Твои отроцы небрегоша безбожнаго веления: посреде же огня ввержени, орошаеми пояху: благословен еси, Боже отец наших.

Острому искушению впадох, и люте пострекаемь, и ко вратом ада приближихся, скорбьми поражаемь, спаси мя молитвами твоими, блаженне, и возстави поюща: благословен еси, Боже отец наших.

Незаходимаго света невещественными лучами облистаемь, сущия во тьме скорбей озлобленныя исхити, и к просвещению веселия настави поющия: благословен еси, Боже отец наших.

Богородичен:

Моли Христа Сына Твоего и Бога, Дево Богородительнице, проданныя лютыми прегрешеньми и лестьми змииными, кровию Его честною избавитися поющим: благословен еси, Боже отец наших.

Ин. Ирмос:

Отроцы благочестию совоспитани, злочестиваго веления небрегше, огненнаго прещения не убояшася: но посреди пламене стояще пояху: отцев Боже, благословен еси.

Всяких лютых недуг врач всеизряднейший, отче Николае, явився, души моея немощь исцелив, подаждь ми благоздравие, вопити: отцев Боже, благословен еси.

Избавив древле воеводы от смерти, святе, и тыя воздвигл еси пети и славити Спаса Христа с верою теплою, иже и взываху: отцев Боже, благословен еси.

Премудрости чаши приближився таинственно, устнами твоими, отче Николае, капли одождения почерпл еси, паче меда и сота, людем повелевая вопити: отцев Боже, благословен еси.

Троичен:

Троице, Тя воспеваем Единице трисиятельнейшая единосущная, Отче, Сыне и Душе Святый: в Нихже вси крестившеся воспеваем: отцев Боже, благословен еси.

Богородичен:

яко всех тварей вышши еси, Богородице, молися Твоему Сыну и Богу, избавитися муки чествующим Тя воистинну, и славящим: отцев Боже, благословен еси.

Катавасиа: Отроцы благочестию совоспитани:

Песнь 8. Ирмос:

Егоже ужасаются ангели, и вся воинства, яко Творца и Господа, пойте священницы, прославите отроцы, благословите людие, и превозносите во вся веки.

Еко одушевленный чертог, и вдохновенная червленица хламида червленошарная всех Царя явилася еси, Дево, и порфира, из Неяже плоть сопросия Богочеловека Слова.

Зачала еси, Пречистая, всю тварь горстию содержащаго, яко Зиждителя и Бога, неизреченно, непостижно, нас ради по нам Человека бывша, и еже бе не отступльша.

Ин. Ирмос:

В пещь огненную ко отроком еврейским снизшедшаго, и пламень в росу преложшаго Бога, пойте дела яко Господа, и превозносите во вся веки.

Яко благ и сострадателен, во глубине напастей люте содержимыя свободи, блаженне Николае, от содержащих лютых разрешение подая молитвами твоими, яже ко Спасу Христу, священнотаинниче.

Тайновождь сущих паче ума, святых служитель и небесных сый, богомудре, архиерей же верен, прегрешений оставления проси от Спаса нашего, священноявленне.

Богородичен:

Изнемогает мой ныне ум во глубину впад безчестия, яко отвсюду различными объят есмь злыми: но Ты, Дево, исцели, безстрастия светом одевающи.

Ин. Ирмос:

Чуда преестественнаго росодательная изобрази пещь образ: не бо яже прият палит юныя, яко ниже огнь Божества Девы, в нюже вниде утробу. Тем воспевающе воспоем: да благословит тварь вся Господа, и превозносит во вся веки.

Чини патриархов, и апостолов, и священномучеников собори, и пророков сословие, весь собор постнический блажат божественное житие твое, с нимиже и мы вопием. Да благословит тварь вся Господа, и превозносит Его во веки.

Высочайший Всецарю, великодержавне, молитвами преподобнаго пастыря, жизнь умири всех, Слове, христиан поборствуя на варвары благочестивому императору нашему, да с ним Тебе Христу зовем: да благословит тварь вся Господа, и превозносит во вся веки.

Светом просвещься неприступным, отче, души сущих в скорби озаряеши, разоряя всю мрачную тьму напастей, облистав же веселием сердца наша, имиже далечесиятельно просвещаеми, вопием: да благословит тварь вся Господа, и превозносит во вся веки.

Троичен:

Живот и животы, и Един и Три светы, Троицу верно воспеваем, отеческим возследующе божественным истинно учением, Отца, Сына, Духа Святаго. С нимиже благочествующе воспоим: да благословит тварь вся Господа, и превозносит во вся веки.

Богородичен:

Чудо страннолепно, купина образ прообрази Чистая Отроковице, горящи неопальна древле на горе Синайстей, тайну Рождества Твоего прописующи: огнь бо в Тя Божества вселивыйся невредну Тя соблюде, Егоже воспеваем во вся веки.

Катавасиа: Чуда преестественнаго:

Песнь 9. Ирмос:

Живоприемный источник приснотекущий, светоносный светильник благодати, храм одушевленный, сень пречистую, небесе и земли пространнейшую, Богородицу вернии величаем.

Струю благодати Твоея источи ми, пламенем злоключений опаляему, и люте истаяваему, источниче благодатно точащий, рождшая реку благодатей: из неяже пияй, вжаждется никогдаже.

Яко Жениха Тя красный чертог, яко владычню палату одушевленну, яко порфиру всезлатую, яко краснейшее обителище Христово, Владычице всех, умоляющаго Тя спаси мя.

Ин. Ирмос:

Безначальна Родителя Сын, Бог и Господь, воплощься от Девы нам явися, омраченная просветити, собрати расточенная. Тем Всепетую Богородицу величаем.

Свещами благодати, богомудре, просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.

Иже в раи сладости ныне водворяяся, и неизреченную славу ясно зря, от небесных круг певцы твоя назираеши, от страстей избавляя, богоносе, всеблаженне.

Богородичен:

Премудрость, и силу, и Слово Ипостасное Отчее, Богомати, Чистая, родила еси от Твоих пречистых кровей Свой храм приимшую, и Сему по соединению соединившуюся нераздельно.

Ин. Ирмос:

Таинство странное вижу и преславное: небо, вертеп: престол херувимский, Деву: ясли, вместилище, в нихже возлеже невместимый Христос Бог, Егоже воспевающе величаем.

Ликовствуем духовно вси празднолюбцы, небеса веселитеся, горы же и холми, Церкви и дев лицы, и постников светлость, в памяти всеблаженнаго: в нейже сошедшеся Спаса величаем.

Да поют песньми непрестанно вси концы, похвальными венцы верх Николаа украшающе яве, угодника Христа Бога: егоже молитвами от страстей же и бед да избавимся.

Яко достойное приими пение, Николае, малаго труда сего, якоже Христос прият вдовы два лепта: не возгнушайся окаяннаго страстьми, не гордяся бо, треблаженне, дерзнух.

Троичен:

Соединяется единосущною волею Троица: разделяется же паки лично нераздельне, соблюдающи державу присно, Отец, Сын и Дух Живый, един Триипостасный Бог, Егоже величаем.

Богородичен:

Потребися всяка печаль Рождеством Твоим, и отъят Господь рыдание и плач, и всяку слезу от всякаго лица земнородных, Чистая Богородице Неискусобрачная: о Тебе и мы долги исполняем.

Катавасиа: Таинство странное:

Светилен. Подобен: Жены услышите:

Великаго архипастыря и иерарха вси, председателя Мирлиийскаго, Николая восхвалим: многи бо мужы спасе неправедно умрети имущия: и царю является со Авлавием во сне, реша неправедный суд.

Слава:

Вельми тя прослави в чудесех Господь, и жива и по конце, иерарше Николае: кто бо от любве веры токмо святое твое имя призовет, и не абие услышан, тепла тя предстателя обретает?

И ныне, Богородичен:

Мудрость Ипостасную, и Слово пресущественное, и врача всех Христа рождши, Дево, гноения и язвы души моея исцели лютыя и многовременныя, и сердца моего страстная помышления умертви

На хвалитех стихиры, на 6, глас 1. Самогласны:

Воззрев неуклонно на высоту разума, и узрев неявленно премудрости глубину, твоими ученьми мир обогатил еси отче, о нас присно молися Христу, святителю Николае.

Человече Божий и верный угодниче, и строителю Того Таин, и мужу желаний духовных, столпе одушевленный, и вдохновенный образ: яко Божественное бо сокровище тя Мирская Церковь чудящися прияла есть, и молитвенника о душах наших.

Ины стихиры, глас тойже: Подобен: Небесных чинов:

Церковныя цветы облетая, якоже птенец вышняго гнезда ангельскаго, Николае треблаженне, зовеши присно к Богу о всех нас, иже в нужных бедах и искушениих, и избавляеши молитвами твоими.

Священныя одежды красоту, деятельными соделал еси добродетельми светлейшую, отче богоносе. Темже нам священнодействуеши дивная, славных чудес священнодетелю, лютых избавляя ны.

Невидимых доброты проходя, страшную ону разумел еси славу святых, святе. Темже нам небесная словеса, присноживотных оных видений являеши, священнейший отче.

Яко во сне предстал еси благочестивому царю, и узники, отче, от смерти избавил еси: молися непрестанно, яко да и ныне молитвами твоими, избавимся от искушений и бед и болезней, достойно благохвалящии тя.

Слава, глас 5. Самогласен:

Вострубим трубою песней, взыграем празднственная, и ликовствуем радующеся в молебное торжество богоноснаго отца. Цари и князи да стекутся, и иже сонным страшным явлением царя препирающа, неповинно держимыя три отпустити воеводы, да воспоют. Пастырие и учителие добраго Пастыря, подобноревнительна пастыря, сошедшеся восхвалим. Иже в недузех врача, и иже в бедах избавителя, грешнии заступника, нищии сокровище, и иже в скорбех утешителя, спутника путешествующии, на мори сущии правителя, и вси везде тепле предваряюща, великаго святителя восхваляюще, сице рцем: пресвятый Николае, предвари и избави ны от настоящия беды, и спаси стадо твое молитвами твоими

И ныне, Богородичен, подобен. Творение патриарха Германа:

Вострубим трубою песней: приникши бо свыше Всецарица Мати Дева, благословеньми венчевает воспевающия Ю. Царие и князи да стекутся, и Царице да восплещут в песнех, Царя рождшей, иже смертию держимыя первее, разрешити человеколюбно благоволившаго: пастырие и учитилие, добраго Пастыря Пречистую Матерь сошедшеся восхвалим. свещник златозарный, светоносный облак, небес пространнейшу, одушевленный кивот, огнезрачный Владычень престол, манноприемную златую стамну, затворенную Слова дверь, всех христиан прибежище, песньми богогласными похваляюще, сице рцем: палато Слова, сподоби смиренных нас Небеснаго Царствия: ничтоже бо невозможно ходатайству Твоему.

Славословие великое. И отпуст. Дается же и елей братии от кандила святаго. И час 1.


Главная страница сайта Печать страницы Ответ на вопрос Пожертвования Персональный видеоканал отца Олега Вниз страницы Вверх страницы К предыдущей странице   К вышестоящей странице   К следующей странице Перевод
Код баннера
Сайт отца Олега (Моленко)

 
© 2000-2019 Церковь Иоанна Богослова