Крест
Покайтесь, ибо Господь грядет судить
Проповедь Всемирного Покаяния. Сайт отца Олега Моленко - omolenko.com
  tolkovanie.com  
  omolenko.com  
  propovedi.com  
  Избранное Переписка Календарь Устав Аудио
  Имя Божие Ответы Богослужения Школа Видео
  Библиотека Проповеди Тайна ап.Иоанна Поэзия Фото
  Публицистика Дискуссии Библия История Фотокниги
  Апостасия Свидетельства Иконы Стихи о.Олега Вопросы
  Жития святых Книга отзывов Исповедь Архив Карта сайта
  Молитвы Слово батюшки Новомученики Пожертвования Контакты
Главная страница сайта Печать страницы Ответ на вопрос Пожертвования Видеоканал проповедей Вниз страницы Вверх страницы К предыдущей странице   К вышестоящей странице   К следующей странице Перевод
YouTube канал отца Олега   YouTube канал проповедей отца Олега   YouTube канал стихотворений Олега Урюпина   Facebook страничка  


ВКонтакт Facebook Twitter Blogger Livejournal Mail.Ru Liveinternet

Богослужения мирянским чином

Неделя Святой Пятидесятницы. День Святой Троицы

Утреня

Старший:
Молитвами Святых Отец наших, Господи Иисусе Христе Боже наш, помилуй нас.
Братия:
Аминь.

Чтец: 
Приидите, поклонимся Цареви нашему Богу. -поклон- 
Приидите, поклонимся и припадем Христу, Цареви нашему Богу. -поклон-
Приидите, поклонимся и припадем Самому Христу, Цареви и Богу нашему. -поклон-

Во время чтения псалмов старший совершает каждение.

Чтец читает псалом 19:
Услышит тя Господь в день печали, защитит тя имя Бога Иаковля.
Послет ти помощь от святаго, и от сиона заступит тя.
Помянет всяку жертву твою, и всесожжение твое тучно буди.
Даст ти Господь по сердцу твоему, и весь совет твой исполнит.
Возрадуемся о спасении твоем, и во имя Господа Бога нашего возвеличимся: исполнит Господь вся прошения твоя.
Ныне познах, яко спасе Господь христа своего: услышит его с небесе святаго своего: в силах спасение десницы его.
Сии на колесницах, и сии на конех: мы же во имя Господа Бога нашего призовем.
Тии спяти быша и падоша: мы же востахом и исправихомся.
Господи, спаси царя, и услыши ны, в оньже аще день призовем тя.

Чтец читает псалом 20:
Господи, силою твоею возвеселится царь, и о спасении твоем возрадуется зело.
Желание сердца его дал еси ему, и хотения устну его неси лишил его.
Яко предварил еси его благословением благостынным, положил еси на главе его венец от камене честна.
Живота просил есть у тебе, и дал еси ему долготу дний во век века.
Велия слава его спасением твоим: славу и велелепие возложиши на него.
Яко даси ему благословение во век века: возвеселиши его радостию с лицем твоим.
Яко царь уповает на Господа, и милостию вышняго не подвижится.
Да обрящется рука твоя всем врагом твоим, десница твоя да обрящет вся ненавидящыя тебе.
Яко положиши их яко пещь огненную во время лица твоего: Господь гневом своим смятет я, и снесть их огнь.
Плод их от земли погубиши, и семя их от сынов человеческих.
Яко уклониша на тя злая, помыслиша советы, ихже не возмогут составити.
Яко положиши я хребет: во избытцех твоих уготовиши лице их.
Вознесися, Господи, силою твоею: воспоем и поем силы твоя.

Старший:
Слава Отцу и Сыну и Святому Духу. И ныне и присно и во веки веков.
Аминь.

Чтец:
Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети, исцели немощи наша Имени Твоего ради.

Братия:
Господи, помилуй. Господи, помилуй. Господи, помилуй.

Старший:
Слава Отцу и Сыну и Святому Духу. И ныне и присно и во веки веков.
Братия:
Аминь.

Братия:
Отче наш! Иже еси на небесех. Да святитится имя Твое. Да приидет Царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, якоже и мы оставляем должником нашим. И не введи нас во искушение, но избави нас от лукавого.
Аминь.

Чтец читает тропарь Кресту:
Спаси Господи люди Твоя, и благослови достояние Твое, победы благоверному императору нашему Николаю Александровичу на сопротивныя даруя, и Твое сохраняя Крестом Твоим жительство.

Старший:
Слава Отцу и Сыну и Святому Духу.

Чтец читает кондак Кресту:
Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

Старший:
И ныне и присно и во веки веков.

Чтец читает Богородичен:
Предстательство страшное и непостыдное, не презри, благая, молитв наших, всепетая Богородице: утверди православных жительство, спаси благоверных царей, имже повелела еси царствовати, и подаждь им с небесе победу, зане родила еси Бога, едина благословенная.

Братия:
Господи, помилуй. (12 раз) – читается вместо ектеньи

-1-

Братия:
Слава в вышних Богу, и на земли мир, в человецех благоволение. -трижды-
Господи! устне мои отверзеши, и уста моя возвестят хвалу Твою -дважды-

Чтец читает псалом 3-й:
Господи, что ся умножиша стужающии ми!
Мнози востают на мя; мнози глаголют души моей: несть спасения ему в Бозе его.
Ты же, Господи, заступник мой еси, слава моя и возносяй главу мою.
Гласом моим ко Господу воззвах, и услыша мя от горы святыя Своея.
Аз уснух и спах, востах, яко Господь заступит мя.
Не убоюся от тем людей, окрест нападающих на мя.
Воскресни, Господи, спаси мя, Боже мой, яко Ты поразил еси вся враждующия ми всуе; зубы грешников сокрушил еси.
Господне есть спасение, и на людех Твоих благословение Твое.
Аз уснух и спах, востах, яко Господь заступит мя.

Чтец читает псалом 37-й:
Господи! да не яростию Твоею обличиши мене, ниже гневом Твоим накажеши мене:
Яко стрелы Твоя унзоша во мне и утвердил еси на мне руку Твою.
Несть исцеления в плоти моей от лица гнева Твоего, несть мира в костех моих от лица грех моих:
Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего.
Пострадах и слякохся до конца; весь день, сетуя, хождах, яко лядвия моя наполнишася поруганий, и несть исцеления в плоти моей.
Озлоблен бых, и смирихся до зела: рыках от воздыхания сердца моего.
Господи! пред Тобою все желание мое, и воздыхание мое от Тебе не утаися; сердце мое смятеся, остави мя сила моя, и свет очию моею, и той несть со мною.
Друзи мои и искренние мои прямо мне приближишася и сташа;
И ближнии мои отдалече мене сташа, и нуждахуся ищущии душу мою; и ищущии злая мне - глаголаху суетная, и льстивным весь день поучахуся.
Аз же, яко глух, не слышах, и яко нем - не отверзаяй уст своих;
И бых яко человек не слышай и не имый во устех своих обличения.
Яко на Тя, Господи, уповах; Ты услышиши, Господи, Боже мой.
Яко рех: да некогда порадуют ми ся врази мои, и внегда подвижатися ногам моим, на мя велеречеваша;
Яко аз на раны готов, и болезнь моя предо мною есть выну.
Яко беззаконие мое аз возвещу, и попекуся о гресе моем.
Врази же мои - живут, и укрепишася паче мене, и умножишася ненавидящии мя без правды.
Воздающии ми злая возблагая оболгаху мя, зане гонях благостыню.
Не остави мене, Господи, Боже мой, не отступи от мене.
Вонми в помощь мою. Господи спасения моего!
Не остави мене, Господи, Боже мой, не отступи от мене.
Вонми в помощь мою, Господи спасения моего!

Чтец читает псалом 62:
Боже, Боже мой, к тебе утреннюю, возжада тебе душа моя, коль множицею тебе плоть моя, в земли пусте и непроходне и безводне.
Тако со святем явихся тебе, видети силу твою и славу твою.
Яко лучши милость твоя паче живот, устне мои похвалите тя.
Тако благословлю тя в животе моем, о имени твоем воздежу руце мои.
Яко от тука и масти да исполнится душа моя, и устнама радости восхвалят тя уста моя.
Аще поминах тя на постели моей, на утренних поучахся в тя:
Яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.
Тии же всуе искаша душу мою, внидут в преисподняя земли.
Предадятся в руки оружия, части лисовом будут.
Царь же возвеселится о Бозе: похвалится всяк кленыйся им, яко заградишася уста глаголющих неправедная.
На утренних поучахся в тя, яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.
Слава Отцу и Сыну и Святому Духу.

Братия:
И ныне и присно и во веки веков.
Аминь.

Братия:
Аллилуиа, Аллилуиа, Аллилуиа, слава Тебе, Боже. -(трижды – без поклонов)-

Старший:
Слава Отцу и Сыну и Святому Духу.

Чтец читает псалом 87-й:
И ныне и присно и во веки веков.
Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему:
Яко исполнися зол душа моя и живот мой аду приближися.
Привменен бых с нисходящими в ров, бых яко человек без помощи, в мертвых свободь;
Яко язвении спящии во гробе, ихже не помянул еси ктому, и тии от руки Твоея отриновени быша.
Положиша мя в рове преисподнем, в темных и сени смертней.
На мне утвердися ярость Твоя, и вся волны Твоя навел ecu на мя.
Удалил еси знаемых моих от мене, положиша мя мерзость себе, предан бых, и не исхождах.
Очи мои изнемогосте от нищеты, воззвах к Тебе, Господи, весь день: воздех к Тебе руце мои.
Еда мертвыми твориши чудеса? или врачеве воскресят и исповедятся Тебе?
Еда повесть кто во гробе милость Твою, и истину Твою в погибели?
Еда познана будут во тме чудеса Твоя, и правда Твоя в земли забвенней?
И аз к Тебе, Господи, воззвах, и утро молитва моя предварит Тя.
Вскую, Господи, отрееши душу мою, отвращаеши лице Твое от мене?
Нищ есмь аз, и в трудех от юности моея, вознесжеся, смирихся и изнемогох.
На мне преидоша гневи Твои, устрашения Твоя возмутиша мя.
Обыдоша мя яко вода, весь день, одержаша мя вкупе.
Удалил еси от мене друга и искренняго и знаемых моих от страстей.
Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему!

Чтец читает псалом 102:
Благослови душе моя Господа, и вся внутренняя моя имя святое Его.
Благослови душе моя Господа, и не забывай всех воздаяний Его;
Очищающаго вся беззакония твоя, исцеляющаго вся недуги твоя;
Избавляющаго от истления живот твой, венчающаго тя милостию и щедротами;
Исполняющаго во благих желание твое: обновится яко орля юность твоя.
Творяй милостыни Господь, и судьбу всем обидимым.
Сказа пути Своя Моисеови, сыновом Исраилевым хотения Своя;
Щедр и милостив Господь, долготерпелив и многомилостив.
Не до конца прогневается, ниже во век враждует;
Не по беззаконием нашим сотворил есть нам, ниже по грехом нашым воздал есть нам.
Яко по высоте небесней от земли, утвердил есть Господь милость Свою на боявшихся Его.
Елико отстоят востоцы от запад, удалил есть от нас беззакония наша.
Якоже щедрит отец сыны, ущедри Господь боящихся Его.
Яко Той позна создание наше, помяну, яко персть есмы.
Человек, яко трава дние его, яко цвет сельный, тако оцветет;
Яко дух пройде в нем, и не будет, и не познает ктому места своего.
Милость же Господня от века и до века на боящихся Его.
И правда Его на сынех сынов, хранящих завет Его, и помнящих заповеди Его творити я.
Господь на небеси уготова Престол Свой, и Царство Его всеми обладает.
Благословите Господа вси Ангели Его, сильнии крепостию, творящии слово Его, услышати глас словес Его.
Благословите Господа вся силы Его, слуги Его, творящии волю Его.
Благословите Господа вся дела Его, на всяком месте владычества Его.

Благослови, душе моя, Господа. На всяком месте владычества Его, благослови, душе моя. Господа!

Чтец читает псалом 142-й:
Господи! услыши молитву мою, внуши моление мое во истине Твоей, услыши мя в правде Твоей,
И не вниди в суд с рабом Твоим! яко не оправдится пред Тобою всяк живый;
Яко погна враг душу мою, смирил есть в землю живот мой; посадил мя есть в темных, яко мертвыя века.
И уны во мне дух мой, во мне смятеся сердце мое.
Помянух дни древния, поучихся во всех делех Твоих, в творениих руку Твоею поучахся.
Воздех к Тебе руце моя, душа моя - яко земля безводная Тебе.
Скоро услыши мя, Господи: исчезе дух мой; не отврати лица Твоего от мене, и уподоблюся нисходящим в ров.
Слышану сотвори мне заутра милость Твою, яко на Тя уповах.
Скажи мне, Господи, путь, воньже пойду, яко к Тебе взях душу мою.
Изми мя от враг моих, Господи; к Тебе прибегох, научи мя творити волю Твою, яко Ты еси Бог мой.
Дух Твой благий наставит мя на землю праву!
Имене Твоего ради, Господи, живиши мя; правдою Твоею изведеши от печали душу мою;
И милостию Твоею потребиши враги моя, и погубиши вся стужающия души моей, яко аз раб Твой есмь.
Услыши мя, Господи, в правде Твоей, и не вниди в суд с рабом Твоим -дважды-
Дух Твой благий наставит мя на землю праву!
Слава Отцу и Сыну и Святому Духу.

Братия:
И ныне и присно и во веки веков.
Аминь.

Братия:
Аллилуиа, Аллилуиа, Аллилуиа. Слава Тебе Боже. -(Трижды – без поклонов)-

Братия:
Господи, помилуй. (12 раз) – читается вместо великой ектеньи -поклон-

В соответствии с Уставом зажигаются свечи.

Старший:
Бог Господь и явися нам, благословен Грядый во имя Господне.

Братия:
Бог Господь и явися нам, благословен Грядый во имя Господне.

Старший:
Исповедайтеся Господеви, яко благ, яко в век милость Его.

Братия:
Бог Господь и явися нам, благословен Грядый во имя Господне.

Старший:
Обышедше обыдоша мя, и именем Господним противляхся им.

Братия:
Бог Господь и явися нам, благословен Грядый во имя Господне.

Старший:
Не умру, но жив буду, и повем дела Господня.

Братия:
Бог Господь и явися нам, благословен Грядый во имя Господне.

Старший:
Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

Братия:
Бог Господь и явися нам, благословен Грядый во имя Господне.

Братия поет тропарь праздника (глас 8):
Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную, / Человеколюбче, слава Тебе. –дважды-

Старший:
Слава Отцу и Сыну и Святому Духу. И ныне и присно и во веки веков.

Братия:
Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную, / Человеколюбче, слава Тебе.

-2-

Стихословие Псалтири – кафизмы

Читаются 2-я и 3-я кафизмы (Типикон, гл. 17)

Чтец читает 2-ую кафизму (первое стихословие)

По исполнении перваго стихословия:
Господи, помилуй. (12 раз) – читается вместо малой ектеньи -поклон-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает седален 4-го гласа:
Попразднственный вернии, и конечный праздник празднуим светло, сей есть Пятдесятница, обещания исполнение и предложения: в сей бо огнь Утешителев сниде на землю, яко в виде язык, и ученики просвети, и сия неботаинники показа. Свет прииде Утешителя, и мир просвети.

Старший:
Слава Отцу и Сыну и Святому Духу, и ныне и присно и во веки веков.

Чтец:
Попразднственный вернии, и конечный праздник празднуим светло, сей есть Пятдесятница, обещания исполнение и предложения: в сей бо огнь Утешителев сниде на землю, яко в виде язык, и ученики просвети, и сия неботаинники показа. Свет прииде Утешителя, и мир просвети.

И бывает чтение в толковании Иоанна, Слово 8: В последний день: (половина)

Чтец читает 3-ую кафизму (второе стихословие)

По исполнении второго стихословия:
Господи, помилуй. (12 раз) – читается вместо малой ектеньи -поклон-

Старший:
Слава Отцу и Сыну и Святому Духу, и ныне и присно и во веки веков.
Аминь.

Чтец читает седален 4-го гласа:
Духа источник пришед на землю, во огненныя реки разделяяся мысленно, апостолы орошаше просвещая: и бысть им облак орошаяй огнь, просвещаяй тех, и одождяяй пламень, имиже мы прияхом благодать, огнем же и водою. Свет прииде Утешителя, и мир просвети.

Старший:
Слава Отцу и Сыну и Святому Духу, и ныне и присно и во веки веков.

Чтец:
Духа источник пришед на землю, во огненныя реки разделяяся мысленно, апостолы орошаше просвещая: и бысть им облак орошаяй огнь, просвещаяй тех, и одождяяй пламень, имиже мы прияхом благодать, огнем же и водою. Свет прииде Утешителя, и мир просвети.

И чтение в толковании Иоанна, Слово 8: (вторая половина)

Полиелей - песнь, составленная из стихов псалмов 134-го и 135-го, прославляющих милость Божию.

Посреди храма устанавливается аналой, на него возлагается икона праздника или святого. Во время полиелея весь храм должен быть освещен свечами. Старший во время пения кадит храм и молящихся:

Чтец:
Живот во гробе возлежаще и печать на камени надлежаще: яко Царя спяща воини стрежаху Христа, и враги Своя невидимо поразивый, Воскресе Господь!

Старший:
Хвалите имя Господне, хвалите раби Господа.
Братия:
Аллилуиа. - 1 или 3 раза

Чтец глаголет седален, глас 8-й (Подобен Повеленное тайно):
По востании Христе, еже из гроба, и еже к высоте небесной божественном вознесении, боговидцем славу Твою низпослал еси Щедре, Духа праваго обновивый учеником. Темже яко гусль мусикийская, всем уяснися божественным бряцалом тайно Спасе глашения, и смотрение Твое.

Старший:
Слава Отцу и Сыну и Святому Духу, и ныне и присно и во веки веков.

Чтец:
По востании Христе, еже из гроба, и еже к высоте небесной божественном вознесении, боговидцем славу Твою низпослал еси Щедре, Духа праваго обновивый учеником. Темже яко гусль мусикийская, всем уяснися божественным бряцалом тайно Спасе глашения, и смотрение Твое.

Старший:
Благословен Господь от Сиона, живый во Иерусалиме.
Братия:
Аллилуиа. - 1 или 3 раза

Старший:
Исповедайтеся Господеви, яко благ, яко в век милость Его.

Братия:
Аллилуиа.

Старший:
Исповедайтеся Богу небесному, яко в век милость Его.

Братия:
Аллилуиа.

Величание поется многократно, пока не закончится каждение храма.

Братия:
Величаем Тя, / Живодавче Христе / и чтем Всесвятаго Духа Твоего, / Егоже от Отца, / послал еси божественным учеником Твоим.

Чтец глаголет избранный псалом (псалмы, строки из которых читаются чтецом переменно с пением величания)

Небеса поведают славу Божию, творение же руку Его возвещает твердь. Пс 18:2
Духом уст Его вся сила их. Пс 32:6
С небесе призре Господь, виде вся сыны человеческия. Пс 32:13
Огнь пред Ним предидет, и окрест Его буря зелна. Пс 49:3Б
Углие возгореся от Него, и приклони небеса и сниде. Пс 17:9В–10А
От облистания пред Ним облацы проидоша. Пс 17:13
Помянутся и обратятся ко Господу вси концы земли. Пс 21:28А
И поклонятся пред Ним вся отечествия язык. Пс 21:28Б
Свидетельство Господне верно, умудряющее младенцы. Пс 18:8Б
Земля потрясеся, ибо небеса кануша от лица Бога Синаина. Пс 67: 9А
Дождь волен отлучиши, Боже, достоянию Твоему. Пс 67:10А
Поставиши их князи по всей земли. Пс 44:17Б
Во всю землю изыде вещание их, и в концы вселенныя глаголы их. Пс 18:5
Послеши Духа Твоего, и созиждутся, и обновиши лице земли. Пс 103:30
Дух Твой благий наставит мя на землю праву. Пс 142:10Б
Сердце чисто созижди во мне, Боже, и Дух Прав обнови во утробе моей. Пс 50:12
Не отвержи мене от лица Твоего и Духа Твоего Святаго не отъими от мене. Пс 50:13
Воздаждь ми радость спасения Твоего и Духом Владычним утверди мя. Пс 50:14
Господь даст глагол благовествующим силою многою. Пс 67:12
Господь крепость людем Своим даст, Господь благословит люди Своя миром. Пс 28:11

Старший:
Слава Отцу и Сыну и Святому Духу, и ныне и присно и во веки веков.

Братия:
Аллилуиа, Аллилуиа, Аллилуиа. Слава Тебе Боже. -(Трижды)-

Братия:
Господи, помилуй. (12 раз) – читается вместо малой ектеньи-поклон-
Степенна
Антифон 1-й

Братия:
От юности моея мнози борют мя страсти, но Сам мя заступи и спаси, Спасе мой! Ненавидящий Сиона посрамитеся от Господа: яко трава бо огнем будете изсохше!

Старший:
Слава Отцу и Сыну и Святому Духу. И ныне и присно и во веки веков.

Братия:
Святым Духом всяка душа живится и чистотою возвышается, светлеется Тройческим единством священнотайне.

Прокимен

Прокимен поется на 4-й глас; Поэтому существует практика на утрени не возглашать глас прокимна, кроме воскресных дней.

Чтец: Прокимен, Псалом Давидов,

Чтец:
Дух Твой Благий наставит мя на землю праву.

Братия:
Дух Твой Благий наставит мя на землю праву.

Чтец:
Господи, услыши молитву мою, внуши моление мое.

Братия:
Дух Твой Благий наставит мя на землю праву.

Чтец:
Дух Твой Благий.

Братия:
Наставит мя на землю праву.

Стаpший:
От Иоанна Святаго Евангелия чтение.
Братия:
Слава Тебе, Господи, слава Тебе. -поклон-

Стаpший:
Вонмем.

Старший читает Евангелие (зачало 65. Ин.20,19 –23):
Во время оно сущу позде во едину от суббот, и дверем затворенным, идеже бяху ученицы Его собрани страха ради иудейска, прииде Иисус и ста посреде и глагола им: мир вам. И сие рек, показа им руце (и нозе) и ребра Своя. Возрадовашася убо ученицы, видевше Господа. Рече же им Иисус паки: мир вам: якоже посла Мя Отец, и Аз посылаю вы. И сие рек, дуну и глагола им: приимите Дух Свят: Имже отпустите грехи, отпустятся им: и имже держите, держатся.
Братия:
Слава Тебе, Господи, слава Тебе. -поклон-

Чтец глаголет псалом 50-й:
Помилуй мя Боже, по велицей милости Твоей и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих, яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица Твоего, и Духа Твоего Святаго не отими от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы.

Старший:
Слава Отцу и Сыну и Святому Духу.

Братия:
Молитвами апостолов, Милостиве, очисти множества согрешений наших.

Старший:
И ныне и присно и во веки веков, аминь.

Братия:
Молитвами Богородицы, Милостиве, очисти множества согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое!

После "Помилуй мя, Боже…" в праздники Господние, Богородичные и храмовые, даже если они совпадают с воскресеньем, всегда поется стихира праздничная, но в праздники святых с бдением и полиелеем праздничная стихира поется только в седмичные дни.

Братия (глас 6-й):
Царю небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси Блаже души наша.

Старший:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго пророка, Предтечи и Крестителя Иоанна, святых славных и всехвальных апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николая, архиепископа Мир Ликийских, чудотворца: святых равноапостольных Мефодия и Кирилла, учителей Словенских: святаго равноапостольнаго великаго князя Владимира: иже во святых отец наших всея России чудотворцев, Михаила, Петра, Алексия, Ионы, Филиппа и Ермогена: святых славных и добропобедных мучеников, преподобных и богоносных отец наших, святых и праведных Богоотец Иоакима и Анны (и святаго, имя рек, егоже есть храм и егоже есть день) и всех святых: молим Тя, многомилостиво Господи, услыши нас, грешных, молящихся Тебе, и помилуй нас.

Братия:
Господи, помилуй. (12 раз)

-3-

Канона праздника два. Ирмосы обою канону по дважды, а тропари на 12. Последи же един лик, 1-й ирмос, а другий лик, другий ирмос )

Канон,

егоже краестрочие: Пятдесятницу празднуим

Песнь 1-ая (1- го канона, творение Космы монаха. Глас 7)

Ирмос:
Понтом покры фараона с колесницами сокрушаяй брани мышцею высокою, поим Ему, яко прославися. -дважды-

Припев:
Величай душе моя, Иже от Отца исходящаго Святаго Духа.

Делом, якоже древле учеником обещал еси, Утешителя Духа пославый Христе, возсиял еси миру свет Человеколюбче.

Припев:
Величай душе моя, Иже от Отца исходящаго Святаго Духа.

Законом древле проповеданное и пророки, исполнися: Божественнаго бо Духа днесь всем верным благодать излияся.

Песнь 1-ая (2-го канона иамвический, творение кир Иоанна Арклийского. Глас 4)

Ирмос:
Божественным покровен медленоязычный мраком, извитийствова богописанный закон: тину бо отряс очесе умнаго, видит Сущаго, и научается Духа разуму, хваля Божественными песньми -дважды-

Припев:
Величай душе моя, в Триех лицех сущее едино Божество.

Рекоша чистая и честная уста: разлучения вам не будет, о друзи! Аз бо на Отчем вышнем престоле соседя, излию Духа, возсияти желающим благодать независтную.

Припев:
Величай душе моя, в Триех лицех сущее едино Божество.

Предел прешедшее истиннейшее Слово, тихообразно совершает сердце: дело бо скончав, возвесели други, дыханием нужным и огненными языки, подав Духа Христос, якоже обещася.

Припев:
Величай душе моя, в Триех лицех сущее едино Божество.

Катавасия:
Понтом покры фараона с колесницами сокрушаяй брани мышцею высокою, поим Ему, яко прославися.

Катавасия:
Божественным покровен медленоязычный мраком, извитийствова богописанный закон: тину бо отряс очесе умнаго, видит Сущаго, и научается Духа разуму, хваля Божественными песньми

Песнь 3-ая (1- го канона)

Ирмос:
С высоты силою, учеником Христе, дондеже облецетеся, рекл еси, седите во Иерусалиме: Аз же яко Мене, Утешителя иного, Духа Моего же и Отча послю, в Немже утвердитеся. -дважды-

Припев:
Величай душе моя, Иже от Отца исходящаго Святаго Духа.

Божественнаго Духа нашедшая сила, раздельшийся древле глас, зле согласившихся, во едино приличие божественне совокупи, ведением Троицы вразумляющи верныя, в Нейже утвердихомся.

Припев:
Величай душе моя, Иже от Отца исходящаго Святаго Духа.

Песнь 3-ая (2-го канона)

Ирмос:
Разверзе утробы нечадствовавшия узы, досаду же неудоботерпиму благочадствующия, едина молитва пророчицы древле Анны, носящия дух сокрушен, к сильному и Богу разумов. -дважды-

Припев:
Величай душе моя, в Триех лицех сущее едино Божество

Непостижима есть Богоначальнейшая: ветия бо изъяви безкнижныя, рыбари премудрыя, заушающия словом, и от глубокия нощи изымающия люди безчисленны, блистанием Духа.

Припев:
Величай душе моя, в Триех лицех сущее едино Божество

Бяше исходен от нерожденна Света, всесильный сияющий Свет, Егоже Сыном Отеческия власти, ныне являет срасленное озарение, огненный глас в Сионе языком.

Катавасия:
С высоты силою, учеником Христе, дондеже облецетеся, рекл еси, седите во Иерусалиме: Аз же яко Мене, Утешителя иного, Духа Моего же и Отча послю, в Немже утвердитеся.

Катавасия:
Разверзе утробы нечадствовавшия узы, досаду же неудоботерпиму благочадствующия, едина молитва пророчицы древле Анны, носящия дух сокрушен, к сильному и Богу разумов.

Братия:
Господи, помилуй. (12 раз) – читается вместо ектеньи

Седален, глас 8 (Повеленное тайно):
Спасовы рачитилие радости исполнишася, и дерзновение прияша, прежде боящиеся: яко Дух Святый днесь свыше сниде на дом ученический, и ин иная глаголаше к людем. Языцы бо разсеяшася, видими яко огнь: и сих не опали, но паче ороси.

Слава Отцу и Сыну и Святому Духу, и ныне и присно и во веки веков.

Песнь 4-ая (1-го канона)

Ирмос:
Смотряяй пророк в последняя Твое Христе пришествие, вопияше: Твою услышах Господи силу, яко вся спасти помазанныя Твоя пришел еси. -дважды-

Припев:
Величай душе моя, Иже от Отца исходящаго Святаго Духа.

Во пророцех глаголавый, и законом проповеданный первее несовершенным, Бог Истинный Утешитель, Слова служителем и свидетелем познавается днесь.

Припев:
Величай душе моя, Иже от Отца исходящаго Святаго Духа.

Знамение Божества носяй, апостолом во огни Дух разделися, и странными языки являшеся, яко Отеческая Божественная сила грядущая есть, самоповелительная.

Песнь 4-ая (2-го канона)

Ирмос:
Царю царей, яковый от яковаго един Слове произшедый от Отца безвиновнаго, равномощнаго Твоего Духа апостолом истинно послал еси, яко Благодетеля поющим: слава державе Твоей Господи. -дважды-

Припев:
Величай душе моя, в Триех лицех сущее едино Божество

Баню Божественную пакибытия словом растворив, ссложенное естество, дождоточиши ми струю от нетленнопрободеннаго Твоего ребра, о Божий Слове, запечатлея теплотою Духа.

Припев:
Величай душе моя, в Триех лицех сущее едино Божество

Преклоняют вся Утешителю колена, Сыну же Отчу, Отцу срасленному, в Лицех бо видеша трегубых Существо истинное, неприкосновенное, безлетное, единое: возсия бо свет благодать Духа.

Припев:
Величай душе моя, в Триех лицех сущее едино Божество

Да исполнятся вси Богоначальнейшим, елицы служителие Трисветлаго Существа: паче естества бо совершает яко благодетель, и огнесветит Христос во спасение, всю дая благодать Духа.

Катавасия:
Смотряяй пророк в последняя Твое Христе пришествие, вопияше: Твою услышах Господи силу, яко вся спасти помазанныя Твоя пришел еси.

Катавасия:
Царю царей, яковый от яковаго един Слове произшедый от Отца безвиновнаго, равномощнаго Твоего Духа апостолом истинно послал еси, яко Благодетеля поющим: слава державе Твоей Господи.

Песнь 5-ая (1-го канона)

Ирмос:
Страха ради Твоего зачатый Господи во чреве пророков, и рожденный на земли Дух спасения, апостольская сердца созидает чиста и в верных правый обновляется: свет бо и мир зане Твоя повеления. -дважды-

Припев:
Величай душе моя, Иже от Отца исходящаго Святаго Духа.

Ншедшая сила днесь сия, Дух Благий, Дух премудрости Божия, Дух от Отца исходяй, и Сыном верным нам явлейся подавателен, в нихже вселяется естеством святыни, в нейже зрится.

Песнь 5-ая (2-го канона)

Ирмос:
Решительное очищение грехов, огнедухновенную приимите Духа росу, о чада светообразная церковная: ныне от Сиона бо изыде закон, языкоогнеобразная Духа благодать. -дважды-

Припев:
Величай душе моя, в Триех лицех сущее едино Божество

Якоже благоволи самовластно, необладанный исходит Дух от Отца, умудряя в языцех апостолы, печатлея живоносное Слово, Отчесильное, сообразное, Егоже Спас рече.

Припев:
Припев: Величай душе моя, в Триех лицех сущее едино Божество

Да исцелит убо смыслы от греха, и се устрояше апостолов, Бог Слово всеначальное, пречистый дом, в немже единомощнаго же и ссущественнаго ныне вселяется Духа свет.

Катавасия:
Страха ради Твоего зачатый Господи во чреве пророков, и рожденный на земли Дух спасения, апостольская сердца созидает чиста и в верных правый обновляется: свет бо и мир зане Твоя повеления.

Катавасия:
Решительное очищение грехов, огнедухновенную приимите Духа росу, о чада светообразная церковная: ныне от Сиона бо изыде закон, языкоогнеобразная Духа благодать.

Песнь 6-ая (1-го канона)

Ирмос:
Плавающего в молве житейских попечений с кораблем потопляема грехи, и душетленному зверю приметаема, яко Иона Христе, вопию Ти: из смертоносныя глубины возведи мя. -дважды-

Припев:
Величай душе моя, Иже от Отца исходящаго Святаго Духа.

От Духа Твоего на плоть всякую, якоже рекл еси, богатно излиял еси, и исполнишася всяческая Твоего ведения Господи, яко из Отца Сын нетленно родился еси, и Дух Нераздельный изыде.

Песнь 6-ая (2-го канона)

Ирмос:
Очищение нам Христе и спасение Владыко, возсиял еси от Девы, да яко пророка от зверя морскаго персей Иону, от тли исхитиши, всего Адама всеродна падшаго. -дважды-

Припев:
Величай душе моя, в Триех лицех сущее едино Божество

Истинный нам правый во утробах вечно приимшим Дух, да обновиши Отчеисходный, и всесовокупленно, вещества ненавистного палительный скверн, кала же смыслов чистительный, Вседержителю.

Припев:
Величай душе моя, в Триех лицех сущее едино Божество

Желательное достояние апостолом, сионяном чающим Твоего пришествия, познание Дух Отчерожденна Слова, речь жестокую языческих ласкательств скоро показав, огнедохновенно утверждаеши.

Катавасия:
Плавающего в молве житейских попечений с кораблем потопляема грехи, и душетленному зверю приметаема, яко Иона Христе, вопию Ти: из смертоносныя глубины возведи мя. -дважды-

Катавасия:
Очищение нам Христе и спасение Владыко, возсиял еси от Девы, да яко пророка от зверя морскаго персей Иону, от тли исхитиши, всего Адама всеродна падшаго. -дважды-

Братия:
Господи, помилуй. (12 раз) – читается вместо ктеньи

Кондак (самогласен, глас 8):
Егда снизшед языки слия,/ разделяше языки Вышний,/ егда же огненныя языки раздаяше,/ в соединение вся призва;/ и согласно славим Всесвятаго Духа.

Икос:
Скорое и известное даждь утешение рабом Твоим Иисусе, внегда унывати духом нашим, не разлучайся от душ наших в скорбех, не удаляйся от мыслей наших во обстояниих: но присно нас предвари; приближися нам, приближися везде Сый, якоже со апостолы Твоими всегда еси, сице и Тебе желающим соедини Себе Щедре: да совокуплени Тебе поем, и славословим Всесвятаго Духа Твоего.

Синаксарий, в Неделю Святыя Пентикостии.

Стихи:
Дыханием нужным, языкоогненно подает
Христос Божественнаго Духа апостолом.
Излияся в великом дни Дух pыбарем.

В сий день, в Неделю осмую по Пасце, Святую Пятдесятницу празднуим, и сию же прияхом от еврейских книг. Якоже бо они, яже у них Пятдесятницу празднуют, почитающе седмое число, и зане по Пасце пятдесят дний прешедше, закон прияша: тако и мы по Пасце, пятдесят дний празднующе, Всесвятаго Духа приемлем, законополагающаго и наставляющаго на всякую истину, и угодная Богу повелевающаго. Ведомо же да есть, яко у еврей три беша праздницы: Пасха, Пятдесятница и Скинопигиа, сиесть, сениц потчение. Пасху убо в воспоминание творяху преведения Чермнаго моря: пасха бо преведение толкуется. Являше же таковый праздник, наше еже от темнаго греха к раю паки преведение и возвращение. Пятдесятницу же праздноваху, в воспоминание еже в пустыни злострадания их, и како многими скорбьми в землю обетования введени быша: тогда бо и плода пшеницы и вина насладишася. И являше праздник сей наше озлобление от неверия, и в Церковь внитие: тогда бо и мы Владычняго причащаемся Тела и Крове. Ови убо тоя ради вины глаголют, яже у еврей Пятдесятнице праздноватися: ови же в честь якоже глаголют, пятидесятим днем, в няже постився Моисей, Богописанный закон прият, вкупе поминающим и тельца жрения, и иных, яже егда Моисей восходя на гору, и низходя содея. Другим же непщевася Пятдесятнице у еврей умыслитися, чести ради седмичнаго числа, якоже речеся: то бо о себе слагаемо, творит пятдесятное, единому оскудевающу дневи. Честь же седмочислия у еврей, не точию во днех есть, но и в лета достизающая, от нихже лет и еже у них творят иовилеон, сказуемо оставление. Уседморичаемым бо летом, сие бывает, егда и землю несеянную оставляют, и животным подают ослабу, и купленым рабом отходити повелевают. Третий же праздник, Скинопигиа, сиесть, сениц потчение, празднуемый по собрании плодов, еже есть по пятих месяцех праздника Пасхи. Совершаше же ся сей в память дне, воньже Моисей прежде потче сеницу на горе Синайстей виденную облаком, и уготованную от перводреводеля Веселиила: сени бо и сии творяще, сей праздник праздноваху и на селех пребывающе, и благодаряще Бога, плоды своих трудов собираху. В сий мнится и Давид яже о точилех надписовати псалмы. Образ же бе той из мертвых нашего воскресения, егда разрушившимся телесным сенем нашим, и паки слепленным, своих трудов плоды восприимем, торжествующе в вечных сенех. Подобает же ведати, яко в сий день Пятдесятницы совершаемыя, Дух Святый на ученики прииде. Елма же святии отцы изволиша разделяти праздники, ради величия Пресвятаго и Животворящаго Духа, яко Един есть Святыя и Живоначальныя Троицы. Се и мы речем воутрие, како Дух Святый прииде. Святых апостол молитвами Христе помилуй нас. Аминь.

Песнь 7-ая (1-го канона)

Ирмос:
В пещь огненную ввержени преподобнии отроцы, огнь в росу преложиша, воспеванием сице вопиюще: благословен еси Господи Боже отец наших. -дважды-

Припев:
Величай душе моя, Иже от Отца исходящаго Святаго Духа.

Ветующим Божественная величия апостолом, Духа действо непщевашеся пиянство неверствующим, имже Троица познавается, един Бог отец наших.

Припев:
Величай душе моя, Иже от Отца исходящаго Святаго Духа.

Нераздельное естество православно богословим Бога Отца Безначальнаго, тояжде власти Слова и Духа, благословен еси, зовуще, Боже отец наших.

Песнь 7-ая (2-го канона)

Ирмос:
Согласная возшуме органская песнь, почитати златосотворенный бездушный истукан: Утешителева же светоносная благодать почествует, еже вопити: Троице Единая, Равносильная, Безначальная, благословена еси. -дважды-

Припев:
Величай душе моя, в Триех лицех сущее едино Божество

Гласа пророковещательнаго не разумеваше, глаголаху безумнии виносотворенное пиянство, речи яко странны слышаша апостолов: благочестивии же Тебе вопием божественно: Богодетелю всех, благословен еси.

Припев:
Величай душе моя, в Триех лицех сущее едино Божество

Божественное учение возгреме видяй видения божественный Иоиль, Богоначальнейшаго, имже излию, рек, якоже Слова, Духа Моего свозопиющим: Естество Тривещанное Светлое, благословен еси.

Припев:
Величай душе моя, в Триех лицех сущее едино Божество.

Троичную убо раздели зря благодать, яко да явит три Ипостаси, почитати в простоте власти, но во едином ныне дни Господском, Сын, Отец и Дух благословен.

Катавасия:
В пещь огненную ввержени преподобнии отроцы, огнь в росу преложиша, воспеванием сице вопиюще: благословен еси Господи Боже отец наших.

Катавасия:
Согласная возшуме органская песнь, почитати златосотворенный бездушный истукан: Утешителева же светоносная благодать почествует, еже вопити: Троице Единая, Равносильная, Безначальная, благословена еси.

Песнь 8-ая (1-го канона)

Ирмос:
Неопальная огню в Синаи причащшаяся купина, Бога яви медленноязычному и гугнивому Моисеови, и отроки ревность Божия три непреоборимыя во огни певцы показа: вся дела Господня Господа пойте, и превозносите Его во вся веки. -дважды-

Припев:
Величай душе моя, Иже от Отца исходящаго Святаго Духа.

Животну свыше бурну носиму гласовне, Духа Всесвятаго дыханию рыбарем, огненных видом язык величия Божия ветийствоваху: вся дела Господа пойте и превозносите во вся веки.

Припев:
Величай душе моя, Иже от Отца исходящаго Святаго Духа.

Яко на некасаемую превосходяще гору, не боящеся огня страшаща, приидите и станем на горе Сионской, во граде Живаго Бога, духоносным учеником ныне сликующе: вся дела Господа пойте и превозносите во вся веки.

Песнь 8-ая (2-го канона)

Ирмос:
Разрешает узы и орошает пламень трисветлый богоначалия образ, поют отроцы, благословит же Единаго Спаса и Вседетеля, яко Благодетеля, сотворенная всяческая тварь. -дважды-

Припев:
Величай душе моя, в Триех лицех сущее едино Божество.

Память Христос человекоспасительных словес, яже от Отца слышав апостолом рече, Дух устрояет языкоогненным видением, посаждая благословенно усвоенную, учуженная же поет Тя тварь.

Припев:
Величай душе моя, в Триех лицех сущее едино Божество.

Спасительно самовладычный Един, Свет самосиятельный, и подательный света сый, пришел еси исполняя апостолы, честный яко верх Твоим рабом, насытительный же Дух подаваеши.

Припев:
Величай душе моя, в Триех лицех сущее едино Божество.

Пояху пророк духонасыщенная уста, Твое телесное, о Царю, пришествие, и Дух от недр Отчих произшедший, несозданный, зданнодетелен, сопрестолен Тебе, единаго вочеловечения верным честь.

Катавасия:
Неопальная огню в Синаи причащшаяся купина, Бога яви медленноязычному и гугнивому Моисеови, и отроки ревность Божия три непреоборимыя во огни певцы показа: вся дела Господня Господа пойте, и превозносите Его во вся веки.

Катавасия:
Разрешает узы и орошает пламень трисветлый богоначалия образ, поют отроцы, благословит же Единаго Спаса и Вседетеля, яко Благодетеля, сотворенная всяческая тварь.

Вместо "Честнейшую" на 9-й песни поются праздничные припевы:
Припев: Апостоли, сошествие Утешителя зряще, удивишася, како в виде огненных язык явися Дух Святый.

Песнь 9-ая (1- го канона)

Ирмос:
Не тления искушением рождшая, и Всехитрецу Слову плоть взаимодавшая, Мати Неискусомужная Дево Богородице, приятелище Нестерпимаго, село Невместимаго Зиждителя Твоего, Тя величаем. -дважды-

Припев:
Апостоли, сошествие Утешителя зряще, удивишася, како в виде огненных язык явися Дух Святый.

На палящей древле огненной колеснице, ревнитель и огнедохновенный радуяся носим, еже ныне возсиявшее дохновение свыше апостолом являше: от негоже освятившеся, Троицу всем сказаша.

Припев:
Апостоли, сошествие Утешителя зряще, удивишася, како в виде огненных язык явися Дух Святый.

Закона естеств кроме, странное слышашеся учеников: единому бо гласу гласящу Духа благодатию, различне оглашахуся людие, племена и языки божественная величия, Троицы ведения научающе.

Песнь 9-ая (2-го канона)

Ирмос:
Радуйся, Царице, матеродевственная славо: всяка бо удобообращательная благоглаголивая уста витийствовати не могут, Тебе пети достойно: низумевает же ум всяк Твое Рождество разумети. Темже Тя согласно славим. -дважды-

Припев:
Апостоли, сошествие Утешителя зряще, удивишася, како в виде огненных язык явися Дух Святый.

Пети подобаше естественножизненную Отроковицу: едина бо во чреве скры Слово, таящееся недугующаго человеческаго естества. Иже в десных странах ныне седяй Отчих, посла благодать Духа.

Припев:
Апостоли, сошествие Утешителя зряще, удивишася, како в виде огненных язык явися Дух Святый.

Елицем дхну боготочная благодать, светящеся, блистающе, изменяеми странным изменением благолепнейшим, равносильствующую несекомую уведевше премудрость, Трисветлое существо славим.

Катавасия:
Не тления искушением рождшая, и Всехитрецу Слову плоть взаимодавшая, Мати Неискусомужная Дево Богородице, приятелище Нестерпимаго, село Невместимаго Зиждителя Твоего, Тя величаем.

Катавасия:
Радуйся, Царице, матеродевственная славо: всяка бо удобообращательная благоглаголивая уста витийствовати не могут, Тебе пети достойно: низумевает же ум всяк Твое Рождество разумети. Темже Тя согласно славим.

Братия:
Господи, помилуй. (12 раз) – читается вместо малой ектеньи -поклон-

Чтец читает 1-й светилен:
Всесвятый Душе, исходяй из Отца и Сыном пришедый к безкнижным учеником, Тебе Бога познавших спаси и помилуй всех. -дважды-

Старший:
Слава Отцу и Сыну и Святому Духу. И ныне и присно и во веки веков.

Чтец читает 2-й светилен:
Свет Отец, Свет Слово, Свет и Св. Дух, Иже во языцех огненных апостолом послася. И Тем весь мир просвещается Троицу почитати Святую.

-4-

Хвалитны псалмы

Старший:
(150-й)

Всякое дыхание да хвалит Господа!
(148-й)
Хвалите Господа с небес, хвалите Его в вышних!

Припев:
Тебе подобает песнь, Богу!
Хвалите Его вси ангели Его, хвалите Его вся силы Его.

Припев:
Тебе подобает песнь, Богу!

Чтец:
Хвалите Его, солнце и луна, хвалите Его, вся звезды и свет. Хвалите Его, небеса небес и вода, яже превыше небес. Да восхвалят имя Господне: яко Той рече - и быша; Той повеле - и создашася. Постави я в век и в век века: повеление положи и немимо идет. Хвалите Господа от земли: змиеве и вся бездны, огнь, град, снег, голоть, дух бурен, творящая слово Его; горы и вси холми, древа плодоносна и вси кедри; зверие и вси скоти, гади и птицы пернаты; царие земстии и вси людие, князи и вси судии земстии; юноши и девы, старцы с юнотами да восхвалят имя Господне, яко вознесеся имя Того Единаго, исповедание Его на земли и на небеси и вознесет рог людей Своих. Песнь всем преподобным Его, сыновом Израилевым, людем приближающымся Ему.
(псалом 149-й)
Воспойте Господеви песнь нову: хваление Его в церкви преподобных! Да возвеселится Израиль о Сотворшем его и сынове Сиони возрадуются о Цари своем! Да восхвалят имя Его в лице; в тимпане и псалтири да поют Ему! Яко благоволит Господь в людех Своих и вознесет кроткия во спасение, Восхвалятся преподобнии во славе и возрадуются на ложах своих! Возношения Божия в гортани их и мечи обоюдуостры в руках их сотворити отмщение во языцех, обличения в людех! связати цари их - путы и славныя их - ручными оковы железными.

На 6

Старший:
1. Сотворити в них суд написан.

Братия:
Cлава сия будет всем преподобным Его!

Братия поет стихиру (глас 4)
Преславная днесь видеша вси языцы во граде Давидове, егда Дух сниде Святый во огненных языцех, якоже богоглаголивый Лука повествует, глаголет бо: собранным учеником Христовым, бысть шум, якоже носиму дыханию бурну, и исполни дом, идеже бяху седяще: и вси начаша глаголати странными глаголы, странными учении, странными повелении Святыя Троицы.

Старший:
2. Хвалите Бога во святых Его!

Братия:
Хвалите Его во утверждении силы Его!

Братия поет стихиру:
Преславная днесь видеша вси языцы во граде Давидове, егда Дух сниде Святый во огненных языцех, якоже богоглаголивый Лука повествует, глаголет бо: собранным учеником Христовым, бысть шум, якоже носиму дыханию бурну, и исполни дом, идеже бяху седяще: и вси начаша глаголати странными глаголы, странными учении, странными повелении Святыя Троицы.

На 4

Старший:
1. Хвалите Его на силах Eгo!

Братия:
Хвалите Его по множеству величествия Его!

Братия:
Дух Святый бе убо присно, и есть, и будет: ниже начинаемь, ниже престаяй, но присно Отцу и Сыну счинен и счисляемь: Живот, и животворяй: Свет, и света податель, самоблагий и источник благостыни: Имже Отец познавается, и Сын прославляется, и от всех познавается, едина сила, едино счетание, едино поклонение Святыя Троицы.

Старший:
2. Хвалите Его во гласе трубнем.

Братия:
Хвалите Его во псалтири и гуслех!

Братия поет стихиру:
Дух Святый бе убо присно, и есть, и будет: ниже начинаемь, ниже престаяй, но присно Отцу и Сыну счинен и счисляемь: Живот, и животворяй: Свет, и света податель, самоблагий и источник благостыни: Имже Отец познавается, и Сын прославляется, и от всех познавается, едина сила, едино счетание, едино поклонение Святыя Троицы.

На 2

Старший:
1. Хвалите Его в тимпане и лице.

Братия:
Хвалите Его во струнах и органе.

Братия:
Дух Святый Свет и Живот, и живый источник умный, Дух премудрости, Дух разума, благий, правый, умный: обладаяй, очищаяй прегрешения: Бог и боготворяй, Огнь и от Огня происходяй: глаголяй, деяй, разделяяй дарования, Имже пророцы вси, и божественнии апостоли с мученики венчашася, странное слышание, странное видение, огнь разделяяйся в подаяние дарований.

Старший:
2. Хвалите Его в кимвалех доброгласных, хвалите Его в кимвалех восклицания.

Братия:
Всякое дыхание да хвалит Господа.

Братия поет стихиру:
Дух Святый Свет и Живот, и живый источник умный, Дух премудрости, Дух разума, благий, правый, умный: обладаяй, очищаяй прегрешения: Бог и боготворяй, Огнь и от Огня происходяй: глаголяй, деяй, разделяяй дарования, Имже пророцы вси, и божественнии апостоли с мученики венчашася, странное слышание, странное видение, огнь разделяяйся в подаяние дарований.

Старший:
Слава Отцу и Сыну и Святому Духу. И ныне и присно и во веки веков.

Братия:
Царю небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси Блаже души наша.

Великое славословие

Слава в вышних Богу,/ и на земли мир,/ в человецех благоволение. /Хвалим Тя, благословим Тя,/ кланяем Ти ся, славословим Тя, благодарим Тя/ великия ради славы Твоея.
Господи, Царю Небесный, Боже, Отче Вседержителю,/ Господи Сыне Единородный, Иисусе Христе, и Святый Душе./ Господи Боже, Агнче Божий, Сыне Отечь,/ вземляй грехи мира, помилуй нас.
Вземляй грехи мира, приими молитву нашу./ Седяй одесную Отца, помилуй нас./ Яко Ты еси Един Свят;/ Ты еси Един Господь, Иисус Христос, в славу Бога Отца, аминь.
На всяк день благословлю Тя и восхвалю имя Твое во веки, и в век века.
Сподоби, Господи, в день сей без греха сохранитися нам!/ Благословен еси, Господи Боже отец наших,/ и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим -трижды-
Господи! прибежище был еси нам в род и род./ Аз рех: Господи! помилуй мя, исцели душу мою, яко согреших Тебе.
Господи! к Тебе прибегох: научи мя творити волю Твою, яко Ты еси Бог мой,/ яко у Тебе источник живота,/ во свете Твоем узрим свет./ Пробави милость Твою ведущим Тя!
Святый Боже, Святый Крепкий, Святый Безсмертный, помилуй нас! -трижды-
Слава Отцу и Сыну и Святому Духу, и ныне и присно и во веки веков, аминь.
Святый Безсмертный, помилуй нас. Святый Боже, Святый Крепкий, Святый Безсмертный, помилуй нас!

Чтец (тропарь праздника)
Благословен еси, Христе Боже наш, / Иже премудры ловцы явлей, / низпослав им Духа Святаго, / и теми уловлей вселенную, / Человеколюбче, слава Тебе.

Братия:
Господи, помилуй. (12 раз) – читается вместо сугубой ектеньи -поклон-

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем!

Слава Отцу и Сыну и Святому Духу, и ныне и присно и во веки веков, аминь. Господи, помилуй, Господи, помилуй, Господи, помилуй. Благослови.

Старший говорит отпуст:
Иже в виде огненных язык, с небесе низпославый Пресвятаго Духа на святыя Своя ученики и апостолы, Христос истинный Бог наш, молитвами Пречистыя Своея Матере, святаго Апостола и Евангелиста Иоанна Богослова и прочих святых славных и всехвальных апостол: святых славных и добропобедных мучеников: преподобных и богоносных отец наших святых и праведных богоотец Иоакима и Анны и всех святых, помилует и спасет нас, яко Благ и Человеколюбец.


Главная страница сайта Печать страницы Ответ на вопрос Пожертвования Персональный видеоканал отца Олега Вниз страницы Вверх страницы К предыдущей странице   К вышестоящей странице   К следующей странице Перевод
Код баннера
Сайт отца Олега (Моленко)

 
© 2000-2019 Церковь Иоанна Богослова