Богослужения мирянским чином. Святых славных и всехвальных и первоверховных апостол Петра и Павла. Утреня

Слава в вышних Богу, и на земли мир, в человецех благоволение (Трижды).
Господи! устне мои отверзеши, и уста моя возвестят хвалу Твою (Дважды).

Господи, что ся умножиша стужающии ми!
Мнози востают на мя; мнози глаголют души моей: несть спасения ему в Бозе его.
Ты же. Господи, заступник мой еси, слава моя и возносяй главу мою.
Гласом моим ко Господу воззвах, и услыша мя от горы святыя Своея.
Аз уснух и спах, востах, яко Господь заступит мя.
Не убоюся от тем людей, окрест нападающих на мя.
Воскресни, Господи, спаси мя, Боже мой, яко Ты поразил еси вся враждующия ми всуе; зубы грешников сокрушил еси.
Господне есть спасение, и на людех Твоих благословение Твое.
Аз уснух и спах, востах, яко Господь заступит мя.

Господи! да не яростию Твоею обличиши мене, ниже гневом Твоим накажеши мене:

Яко стрелы Твоя унзоша во мне и утвердил еси на мне руку Твою.

Несть исцеления в плоти моей от лица гнева Твоего, несть мира в костех моих от лица грех моих:

Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего.

Пострадах и слякохся до конца; весь день, сетуя, хождах, яко лядвия моя наполнишася поруганий, и несть исцеления в плоти моей.

Озлоблен бых, и смирихся до зела: рыках от воздыхания сердца моего.

Господи! пред Тобою все желание мое, и воздыхание мое от Тебе не утаися; сердце мое смятеся, остави мя сила моя, и свет очию моею, и той несть со мною.

Друзи мои и искренние мои прямо мне приближишася и сташа;

И ближнии мои отдалече мене сташа, и нуждахуся ищущии душу мою; и ищущии злая мне - глаголаху суетная, и льстивным весь день поучахуся.

Аз же, яко глух, не слышах, и яко нем - не отверзаяй уст своих;

И бых яко человек не слышай и не имый во устех своих обличения.

Яко на Тя, Господи, уповах; Ты услышиши, Господи, Боже мой.

Яко рех: да некогда порадуют ми ся врази мои, и внегда подвижатися ногам моим, на мя велеречеваша;

Яко аз на раны готов, и болезнь моя предо мною есть выну.

Яко беззаконие мое аз возвещу, и попекуся о гресе моем.

Врази же мои - живут, и укрепишася паче мене, и умножишася ненавидящии мя без правды.

Воздающии ми злая возблагая оболгаху мя, зане гонях благостыню.

Не остави мене, Господи, Боже мой, не отступи от мене.

Боже, Боже мой, к тебе утреннюю, возжада тебе душа моя, коль множицею тебе плоть моя, в земли пусте и непроходне и безводне.

Тако со святем явихся тебе, видети силу твою и славу твою.

Яко лучши милость твоя паче живот, устне мои похвалите тя.

Тако благословлю тя в животе моем, о имени твоем воздежу руце мои.

Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя:

Яко был еси помощник мой, и в крове крилу твоею возрадуюся.

Прильпе душа моя по тебе, мене же прият десница твоя.

Тии же всуе искаша душу мою, внидут в преисподняя земли.

Предадятся в руки оружия, части лисовом будут.

Царь же возвеселится о Бозе: похвалится всяк кленыйся им, яко заградишася уста глаголющих неправедная.
На утренних поучахся в тя, яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.
Слава Отцу и Сыну и Святому Духу.

Братия:
Аллилуиа, Аллилуиа, Аллилуиа. Слава Тебе Боже. (Трижды – без поклонов)

Господи, Боже спасения моего! во дни воззвах, и в нощи пред Тобою.

Да внидет пред Тя молитва моя, приклони ухо Твое к молению моему:

Яко исполнися зол душа моя и живот мой аду приближися.

Привменен бых с нисходящими в ров, бых яко человек без помощи, в мертвых свободь;

Яко язвении спящии во гробе, ихже не помянул еси ктому, и тии от руки Твоея отриновени быша.

Положиша мя в рове преисподнем, в темных и сени смертней.

На мне утвердися ярость Твоя, и вся волны Твоя навел ecu на мя.

Удалил еси знаемых моих от мене, положиша мя мерзость себе, предан бых, и не исхождах.

Очи мои изнемогосте от нищеты, воззвах к Тебе, Господи, весь день: воздех к Тебе руце мои.

Еда мертвыми твориши чудеса? или врачеве воскресят и исповедятся Тебе?

Еда повесть кто во гробе милость Твою, и истину Твою в погибели?

Еда познана будут во тме чудеса Твоя, и правда Твоя в земли забвенней?

И аз к Тебе, Господи, воззвах, и утро молитва моя предварит Тя.

Вскую, Господи, отрееши душу мою, отвращаеши лице Твое от мене?

Нищ есмь аз, и в трудех от юности моея, вознесжеся, смирихся и изнемогох.

На мне преидоша гневи Твои, устрашения Твоя возмутиша мя.

Обыдоша мя яко вода, весь день, одержаша мя вкупе.

Удалил еси от мене друга и искренняго и знаемых моих от страстей.

Господи, Боже спасения моего! во дни воззвах, и в нощи пред Тобою.

Да внидет пред Тя молитва моя, приклони ухо Твое к молению моему!

Благослови душе моя Господа, и вся внутренняя моя имя святое Его.
Благослови душе моя Господа, и не забывай всех воздаяний Его;
Очищающаго вся беззакония твоя, исцеляющаго вся недуги твоя;
Избавляющаго от истления живот твой, венчающаго тя милостию и щедротами;
Исполняющаго во благих желание твое: обновится яко орля юность твоя.
Творяй милостыни Господь, и судьбу всем обидимым.
Сказа пути Своя Моисеови, сыновом Израилевым хотения Своя;
Щедр и милостив Господь, долготерпелив и многомилостив.
Не до конца прогневается, ниже во век враждует;
Не по беззаконием нашим сотворил есть нам, ниже по грехом нашым воздал есть нам.
Яко по высоте небесней от земли, утвердил есть Господь милость Свою на боявшихся Его.
Елико отстоят востоцы от запад, удалил есть от нас беззакония наша.
Якоже щедрит отец сыны, ущедри Господь боящихся Его.
Яко Той позна создание наше, помяну, яко персть есмы.
Человек, яко трава дние его, яко цвет сельный, тако оцветет;
Яко дух пройде в нем, и не будет, и не познает ктому места своего.
Милость же Господня от века и до века на боящихся Его.
И правда Его на сынех сынов, хранящих завет Его, и помнящих заповеди Его творити я.
Господь на небеси уготова Престол Свой, и Царство Его всеми обладает.
Благословите Господа вси Ангели Его, сильнии крепостию, творящии слово Его, услышати глас словес Его.
Благословите Господа вся силы Его, слуги Его, творящии волю Его.
Благословите Господа вся дела Его, на всяком месте владычества Его.

Благослови, душе моя, Господа. На всяком месте владычества Его, благослови, душе моя. Господа!

Господи! услыши молитву мою, внуши моление мое во истине Твоей, услыши мя в правде Твоей,

И не вниди в суд с рабом Твоим! яко не оправдится пред Тобою всяк живый;

Яко погна враг душу мою, смирил есть в землю живот мой; посадил мя есть в темных, яко мертвыя века.

И уны во мне дух мой, во мне смятеся сердце мое.

Помянух дни древния, поучихся во всех делех Твоих, в творениих руку Твоею поучахся.

Воздех к Тебе руце моя, душа моя - яко земля безводная Тебе.

Скоро услыши мя, Господи: исчезе дух мой; не отврати лица Твоего от мене, и уподоблюся нисходящим в ров.

Слышану сотвори мне заутра милость Твою, яко на Тя уповах.

Скажи мне, Господи, путь, воньже пойду, яко к Тебе взях душу мою.

Изми мя от враг моих, Господи; к Тебе прибегох, научи мя творити волю Твою, яко Ты еси Бог мой.

Имене Твоего ради, Господи, живиши мя; правдою Твоею изведеши от печали душу мою;

И милостию Твоею потребиши враги моя, и погубиши вся стужающия души моей, яко аз раб Твой есмь.

Услыши мя, Господи, в правде Твоей, и не вниди в суд с рабом Твоим (дважды).

Братия:
Аллилуиа, Аллилуиа, Аллилуиа. Слава Тебе Боже. (Трижды – без поклонов)

Братия:
Господи, помилуй. (12 раз) – читается вместо великой ектеньи -поклон-

В соответствии с Уставом зажигаются свечи в ознаменование того, что с явлением в мир Господа воссиял людям свет велий (Исаия).

Старший:
Бог Господь и явися нам, благословен Грядый во имя Господне.

Братия:
Бог Господь и явися нам, благословен Грядый во имя Господне.

Старший:
Исповедайтеся Господеви, яко благ, яко в век милость Его.

Братия:
Бог Господь и явися нам, благословен Грядый во имя Господне.

Старший:
Обышедше обыдоша мя, и именем Господним противляхся им.

Братия:
Бог Господь и явися нам, благословен Грядый во имя Господне.

Старший:
Не умру, но жив буду, и повем дела Господня.

Братия:
Бог Господь и явися нам, благословен Грядый во имя Господне.

Старший:
Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

Братия:
Бог Господь и явися нам, благословен Грядый во имя Господне.

Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость. –дважды-

Старший:
Слава Отцу и Сыну и Святому Духу. И ныне и присно и во веки веков.

Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

Читаются 13-я и 14-я кафизмы

По исполнении перваго стихословия:

Господи, помилуй. (12 раз) – читается вместо малой ектеньи, если она положена -поклон-

Старший:

Слава Отцу и Сыну и Святому Духу, и ныне и присно и во веки веков.
Аминь.

Чтец читает седален 8-го гласа: Подобен: Премудрости:

Глубину ловления оставль, с небесе прием от Отца Божественное откровение, Слова воплощения: и со дерзновением верно вопиял еси Зиждителю твоему: Божия Тя вем Сына Единосущна. Темже по достоянию воистинну показался еси камень веры, и ключарь благодати, Петре апостоле, моли Христа Бога, грехов оставление даровати, празднующим любовию святую память твою.

Старший: глас 1:

Слава Отцу и Сыну и Святому Духу

Чтец читает седален: Подобен: Камени запечатану:

Церковнаго каменя, всехвальнаго Петра, и поборника Павла, мiрскую мрежу, достойно восхвалим, вернии, яко имуща ключи небесныя: от них бо просветися вселенная, верою Троическою. Слава Прославльшему вас: слава Укрепльшему вы: слава Даровавшему вас ради жизнь вечную.

Старший:

И ныне и присно и во веки веков. Аминь.

Чтец читает Богородичен:

Руце Твои божественнии, имиже Создателя понесла еси, Дево Пресвятая, воплощшагося благостынею, простерши умоли Его, избавити нас от искушений, и страстей и бед, хвалящих Тя любовию, и вопиющих: слава Всельшемуся в Тя, слава Прошедшему из Тебе, слава Избавльшему нас Рождеством Твоим.

По исполнении второго стихословия:

Господи, помилуй. (12 раз) – читается вместо малой ектеньи, если она положена -поклон-

Старший:

Слава Отцу и Сыну и Святому Духу, и ныне и присно и во веки веков.
Аминь.

Чтец читает седален 8-го гласа Подобен: Премудрости:

С небесе звание от Христа приим, явился еси проповедник Света, всех благодати озарил еси ученьми, закона бо служение писмене изстругав, верным облистал еси разум Духа. Темже и в третие небо достойне взятся превыспренно, и в рай достигл еси, Павле апостоле, моли Христа Бога согрешений оставление даровати, празднующим любовию святую память твою.

Старший:

Слава Отцу и Сыну и Святому Духу:

Чтец: Подобен: Явился еси днесь:

Светолучными сиянии, якоже звезды, земныя концы просвещаете учении святыя проповеди, небеснии таинницы Господни апостоли.

Старший:

И ныне и присно и во веки веков. Аминь

Чтец читает Богородичен:

Теплое Заступление сущим в бедах, и Помощницу нашу, и к Богу пременение, Еюже тли избавихомся, Богородицу вернии ублажаем.

Полиелей - песнь, составленная из стихов псалмов 134-го и 135-го, прославляющих милость Божию.

Посреди храма устанавливается аналой, на него возлагается икона праздника или святого. Во время полиелея весь храм должен быть освещен свечами. Старший во время пения кадит храм и молящихся:

Чтец:
Живот во гробе возлежаще и печать на камени надлежаще: яко Царя спяща воини стрежаху Христа, и враги Своя невидимо поразивый, Воскресе Господь!

Старший:
Хвалите имя Господне, хвалите раби Господа.

Чтец глаголет седален, глас 8-й (Подобен Премудрости):

Верховныя явльшияся от ученик, великия светильники и светлыя, Петра да восхвалим и премудраго Павла: огнем бо Божественнаго просиявшия Духа, мглу прелести попалиша всю. Темже и Вышняго Царствия оружницы достойне показашася и благодати сопрестольницы. Сего ради вопием: апостоли Христа Бога, прегрешений оставление испросите, празднующим любовию святую память вашу. [Дважды]

Слава Отцу и Сыну и Святому Духу, и ныне и присно и во веки веков.

Яко Всенепорочная Невесто Творцу, яко Неискусомужная Мати Избавителя, Приятелище яко сущи Утешителя Препетая, беззаконию мя суще скверное обителище, и бесом игралище в разуме бывша, потщися от тех злодейства мя избавити, и светлое жилище добродетелей соверши, светоносная Нетленная: отжени облак страстей, и Вышняго причастия сподоби, и Света Невечерняго молитвами Твоими.

Старший:
Благословен Господь от Сиона, живый во Иерусалиме.

Братия:
Аллилуиа. – припев поется 1 или 3 раза

Исповедайтеся Господеви, яко благ, яко в век милость Его.

Исповедайтеся Богу небесному, яко в век милость Его.

Величание поется многократно, пока не закончится каждение храма.

Величаем вас, / апостоли Христовы Петре и Павле, / весь мир ученьми своими просветившия / и вся концы ко Христу приведшия.

Чтец глаголет избранный псалом (псалмы, строки из которых читаются чтецом переменно с пением величания)

Небеса поведают славу Божию, творение же руку Его возвещает твердь. Пс 18:2

Исповедят небеса чудеса Твоя Господи. Пс 88:6А

Вместо отец Твоих быша сынове Твои. Пс 44:17А

Бог богов Господь глаголя и призва землю. Пс 49:1А

От восток солнца до запад, хвально имя Господне. Пс 112:3

Велий и страшен есть над всеми окрестными Его. Пс 88:8

Рцыте во языцех, яко Господь воцарися. Пс 95:10А

Возвестите во языцех славу Его, во всех людех чудеса Его. Пс 95:3

Покори люди нам, и языки под ноги наша. Пс 46:4

Велий Господь наш, и велия крепость Его. Пс 146:5А

Той даст силу и державу людем Своим: Благословен Бог. Пс 67:36

Старший:
Слава Отцу и Сыну и Святому Духу, и ныне и присно и во веки веков.

Братия:
Аллилуиа, Аллилуиа, Аллилуиа. Слава Тебе Боже. -(Трижды)-

Братия:
Господи, помилуй. (12 раз) – читается вместо малой ектеньи -поклон-

От юности моея мнози борют мя страсти, но Сам мя заступи и спаси, Спасе мой! Ненавидящий Сиона посрамитеся от Господа: яко трава бо огнем будете изсохше!

Старший:
Слава Отцу и Сыну и Святому Духу. И ныне и присно и во веки веков.

Святым Духом всяка душа живится и чистотою возвышается, светлеется Тройческим единством священнотайне.

Прокимен поется на 4-й глас; Поэтому существует практика на утрени не возглашать глас прокимна, кроме воскресных дней. В Чтец:
Прокимен, Псалом Давидов,

Чтец:
Во всю землю изыде вещание их, и в концы вселенныя глаголы их.

Во всю землю изыде вещание их, и в концы вселенныя глаголы их.

Чтец:
Небеса поведают славу Божию, творение же руку Его возвещает твердь.

Братия:
Во всю землю изыде вещание их, и в концы вселенныя глаголы их.

Стаpший:
От Иоанна Святаго Евангелия чтение.
Братия:
Слава Тебе, Господи, слава Тебе. -поклон-

Старший читает Евангелие от Иоанна, зачало 67. [Ин. 21, 15 – 25.]

Егда же обедоваше, глагола Симону Петру Иисус: Симоне Ионин, любиши ли Мя паче сих? Глагола Ему: ей, Господи, Ты веси, яко люблю Тя. Глагола ему: паси агнцы Моя.	Когда же они обедали, Иисус говорит Симону Петру: Симон Ионин! любишь ли ты Меня больше, нежели они? Петр говорит Ему: так, Господи! Ты знаешь, что я люблю Тебя. Иисус говорит ему: паси агнцев Моих.
Глагола ему паки второе: Симоне Ионин, любиши ли Мя? Глагола Ему: ей, Господи, Ты веси, яко люблю Тя. Глагола ему: паси oвцы Моя.	Еще говорит ему в другой раз: Симон Ионин! любишь ли ты Меня? Петр говорит Ему: так, Господи! Ты знаешь, что я люблю Тебя. Иисус говорит ему: паси овец Моих.
Глагола ему третие: Симоне Ионин, любиши ли Мя? Оскорбе же Петр, яко рече ему третие: любиши ли Мя? и глагола Ему: Господи, Ты вся веси: Ты веси, яко люблю Тя. Глагола ему Иисус: паси oвцы Моя.	Говорит ему в третий раз: Симон Ионин! любишь ли ты Меня? Петр опечалился, что в третий раз спросил его: любишь ли Меня? и сказал Ему: Господи! Ты все знаешь; Ты знаешь, что я люблю Тебя. Иисус говорит ему: паси овец Моих.
Аминь, аминь глаголю тебе: егда был еси юн, поясался еси сам, и ходил еси, аможе хотел еси: егда же состареешися, воздежеши руце твои, и ин тя пояшет, и ведет, аможе не хощеши.	Истинно, истинно говорю тебе: когда ты был молод, то препоясывался сам и ходил, куда хотел; а когда состаришься, то прострешь руки твои, и другой препояшет тебя, и поведет, куда не хочешь.
Сие же рече, назнаменуя, коею смертию прославит Бога. И сия рек, глагола ему: иди по Мне.	Сказал же это, давая разуметь, какою смертью Петр прославит Бога. И, сказав сие, говорит ему: иди за Мною.
Обращься же Петр виде ученика, егоже любляше Иисус, вослед идуща, иже и возлеже на вечери на перси Его и рече: Господи, кто есть предаяй Тя?	Петр же, обратившись, видит идущего за ним ученика, которого любил Иисус и который на вечери, приклонившись к груди Его, сказал: Господи! кто предаст Тебя?
Сего видев Петр, глагола Иисусови: Господи, сей же что?	Его увидев, Петр говорит Иисусу: Господи! а он что?
Глагола ему Иисус: аще хощу, да той пребывает, дондеже прииду, что к тебе? ты по Мне гряди.	Иисус говорит ему: если Я хочу, чтобы он пребыл, пока приду, что тебе до того? ты иди за Мною.
Изыде же слово се в братию, яко ученик той не умрет. И не рече ему Иисус, яко не умрет, но: аще хощу тому пребывати, дондеже прииду, что к тебе?	И пронеслось это слово между братиями, что ученик тот не умрет. Но Иисус не сказал ему, что не умрет, но: если Я хочу, чтобы он пребыл, пока приду, что тебе до того?
Сей есть ученик свидетельствуяй о сих, иже и написа сия: и вем, яко истинно есть свидетельство его.	Сей ученик и свидетельствует о сем, и написал сие; и знаем, что истинно свидетельство его.
Суть же и ина многа, яже сотвори Иисус, яже аще бы по единому писана быша, ни самому мню всему миру вместити пишемых книг. Аминь.	Многое и другое сотворил Иисус; но, если бы писать о том подробно, то, думаю, и самому миру не вместить бы написанных книг. Аминь.

Братия:
Слава Тебе, Господи, слава Тебе. -поклон-

Помилуй мя Боже, по велицей милости Твоей и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих, яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица Твоего, и Духа Твоего Святаго не отими от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы.

Братия:
Молитвами святых первоверховных апостолов Петра и Павла, Милостиве, очисти множества согрешений наших.

Старший:
И ныне и присно и во веки веков, аминь.

Молитвами Богородицы, Милостиве, очисти множества согрешений наших.

Старший:
Помилуй мя, Боже, по велицей милости Твоей и по множеству щедрот Твоих очисти беззаконие мое!

Благочестия истинныя проповедники, и церкве пресветлыя звезды, песньми похвальными почтим, Петра каменя веры, и Павла истиннаго учителя, и таинника Христова: сии бо истинное слово всеявше в сердца верных, всем плодоносие дарующа, и молят Христа Бога, спастися душам нашим.

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго пророка, Предтечи и Крестителя Иоанна, святых славных и всехвальных апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николая, архиепископа Мир Ликийских, чудотворца: святых равноапостольных Мефодия и Кирилла, учителей Словенских: святаго равноапостольнаго великаго князя Владимира: иже во святых отец наших всея России чудотворцев, Михаила, Петра, Алексия, Ионы, Филиппа и Ермогена: святых славных и добропобедных мучеников, преподобных и богоносных отец наших, святых и праведных Богоотец Иоакима и Анны (и святаго, имя рек, егоже есть храм и егоже есть день) и всех святых: молим Тя, многомилостиво Господи, услыши нас, грешных, молящихся Тебе, и помилуй нас.

Каноны

Первый святаго апостола Петра, глас 4, со ирмосом на 8: ирмос по дважды, тропари на 7.

Ирмос: Несть Тебе подобен, Препрославленный Господи, рукою бо крепкою избавил еси люди, яже стяжал еси, Человеколюбче. (дважды)

Припев: Святии Апостоли Петре и Павле, молите Бога о нас!

Верховнейшаго апостолов днесь, яко первозваннаго Христова, богодохновенными песньми достойно воспоим.

Припев: Святии Апостоли Петре и Павле, молите Бога о нас!

Тя Предвечный проуведев предустави, всеблаженне Петре, яко предстателя Своея церкве, и первопрестольника.

Слава Отцу и Сыну и Святому Духу: Ни плоть, ниже кровь тебе, но Отец вдохну, Христа богословити Сына Истиннаго Бога Вышняго, апостоле.

И ныне и присно и во веки веков. Аминь: Гору святую, превышнее носило, Матерь Божию, и Деву Истинную по Рождестве воспоем.

Ин канон святаго апостола Павла, тропари на 6. Глас 8:

Ирмос: Посеченый несекомаго пресече, и виде солнце землю, юже не виде: лютаго врага вода потопи, и непроходимое пройде Израиль. Песнь же воспевашеся: Господеви поим, славно бо прославися. (дважды)

Припев: Святии Апостоли Петре и Павле, молите Бога о нас!

Якоже сущая нарицая не сущая, Христос Божественным разумом, Павле всеблаженне, Той из матерня чрева тя избра, понести пред языки Божественное Его Имя, еже паче всякаго имене: славно во прославися.

Припев: Святии Апостоли Петре и Павле, молите Бога о нас!

Будущее возвещая тебе сияние, благочестия Павле, и лести очищение, Христос явлься на горе молниезрачен, очи убо помрачает плотския, душевныя же вразумляет Троическим разумом: славно бо прославися.

Слава Отцу и Сыну и Святому Духу: Обрезание убо совершая осмодневное, и ревнитель отеческих, Павле, преданий, от семене еврейска, колена Вениаминова, по закону же фарисей явлься, вменил еси вся уметы, и Христа приобрел еси: славно бо прославися.

И ныне и присно и во веки веков. Аминь: Чистая Мати Бога Вседержителя, от царскаго колена, Владычице, израстши, и Едина Бога всеми царствующаго рождшая плотию паче естества, от бед мя Спаси, Сыну Твоему поюща: славно бо прославися.

Катавасия(Глас 4-й): Отверзу уста моя,/ и наполнятся духа,/ и слово отрыгну Царице Матери,/ и явлюся светло торжествуя,// и воспою радуяся Тоя чудеса.

Ирмос: Не мудростию и силою, и богатством хвалимся, но Тобою, Отчею Ипостасною мудростию, Христе: несть бо свят, паче Тебе, Человеколюбче. (дважды)

Припев: Святии Апостоли Петре и Павле, молите Бога о нас!

Тя блаженна, сладкая уста Христа Бога, и сокровище твердо Царствия показаша: темже воспеваем Тя, Петре апостоле.

Припев: Святии Апостоли Петре и Павле, молите Бога о нас!

На камени Твоего богословия, водрузи Владыка Иисус церковь непреклонну: в нейже тя, апостоле Петре, славим.

Слава Отцу и Сыну и Святому Духу: Яко пребольши ангел, Петр в телеси: во светлом бо пришествии сего Христос Бог, судию же и соседателя быти рече.

И ныне и присно и во веки веков. Аминь: Неискусобрачная Бога плотию рождшая, страстными прилоги преклонена мя утверди: несть бо Чистая, разве Тебе помощницы.

Ирмос: Ты еси Утверждение притекающих к Тебе, Господи, Ты еси Свет омраченных, и поет Тя дух мой. (дважды)

Припев: Святии Апостоли Петре и Павле, молите Бога о нас!

Ты камень основания верным душам положился еси, многоценен, краеуголен, Спаса и Господа.

Припев: Святии Апостоли Петре и Павле, молите Бога о нас!

Павле всеблаженне, на основании твоем, молися, добродетелей всехвальных назидатися светлости.

Слава Отцу и Сыну и Святому Духу: Всегда мертвость Иисусову, на твоем теле совершенно, Павле, обносяй, сподобился еси истинныя жизни.

И ныне и присно и во веки веков. Аминь: Тя вси стяжахом прибежище, и стену нашу Христиане: Тя славословим немолчно, Безневестная.

Катавасия: Твоя песнословцы, Богородице,/ живый и независтный источниче,/ лик себе совокупльшия духовно утверди/ в Божественней Твоей славе,// венцев славы сподоби.

Братия:
Господи, помилуй. (12 раз) – читается вместо ектеньи

Кая темница не име тебе юзника? кая же церковь не имать тя витию? Дамаск великомудрствует о тебе, Павле: веде бо тя запята светом: Рим твою кровь приемый, и той хвалится: но и Тарс множае радуется, и любит почитая твои пелены. Петре веры каменю, Павле похвало вселенныя, от Рима сошедшеся утвердите нас.

Ирмос: Сей Бог наш, от Девы воплощься, и естество обожив, Егоже воспевающе вопием: слава силе Твоей, Господи. (дважды)

Припев: Святии Апостоли Петре и Павле, молите Бога о нас!

Человеком ловца тя, якоже обеща Христос, содела Божественна, своея Церкве, первому вручив кормила.

Припев: Святии Апостоли Петре и Павле, молите Бога о нас!

Тобою умоляемь Жизнодавец Иисус, вязати же и решити давый тебе власть, Петре, да будет ми милостив.

Слава Отцу и Сыну и Святому Духу: Христово Царствие отверсти, прилежно молися, Петре, Божественную твою память, верою несумненною чтущим.

И ныне и присно и во веки веков. Аминь: Госпоже Всепетая Богородительнице, моя помышления Твоими молитвами очистивши, покажи мя благоплодна, Мати всех Бога.

Ирмос: Всел еси на кони, апостолы Твоя Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи. (дважды)

Припев: Святии Апостоли Петре и Павле, молите Бога о нас!

Вседе якоже лев, яровидно погубляя Христову церковь, Савл иногда, ят же быв Божественным гласом Агнца Божия, Егоже гоняше, стадо яко пастырю вручает.

Припев: Святии Апостоли Петре и Павле, молите Бога о нас!

Хотяй просветити вселенную омрачается: Ананиа же к сему послася, душевное же просвещение даяй и телесное, от Божественнаго явления, сосуд избран показав того.

Слава Отцу и Сыну и Святому Духу: Павлом достойно Дамаск напояется: от сего бо якоже от рая иногда, вод Божественных сей произыде великий источник, и упои всю богоразумием независтно землю.

И ныне и присно и во веки веков. Аминь: Низложи сильныя со престол Господь, Дева и Мати якоже рече: алчущия же Божественных благ исполни, верою зовущия: слава силе Твоей, Господи.

Катавасия: Седяй в славе/ на престоле Божества,/ во облаце легце,/ прииди Иисус пребожественный,/ нетленною дланию,/ и спасе зовущия:// слава, Христе, силе Твоей.

Ирмос: Стяжавый ны избранныя люди, кровию Твоею, Господи, Твой мир даждь нам, во единомыслии сохраняя стадо Твое. (дважды)

Припев: Святии Апостоли Петре и Павле, молите Бога о нас!

Иже от любве приим дерзновение к Богу, достойно чудимь бываше, ловец и невежда, чудодействуя преславно благодатию.

Припев: Святии Апостоли Петре и Павле, молите Бога о нас!

Не злато Тебе ради, ни сребро, Христе, Божественный Твой апостол, но добродетель стяжав, чудес обогатися силою.

Слава Отцу и Сыну и Святому Духу: Исправляхуся стопы и глезне хромых, действенным твоим глаголом: Божественным бо Духом совершахуся преславныя вещи.

И ныне и присно и во веки веков. Аминь: Воплотися Бог по Ипостаси, Чистая, из Тебе плотию соединяемь, пребыв неизменен, по Божественному существу безплотен.

Ирмос: Просвети нас повелении Твоими, Господи, и мышцею Твоею высокою, Твой мир подаждь нам, Человеколюбче. (дважды)

Припев: Святии Апостоли Петре и Павле, молите Бога о нас!

Ты истинную избрал еси, Павле, похвалу, крест Царя Христа присно нося, якоже победу, апостоле.

Припев: Святии Апостоли Петре и Павле, молите Бога о нас!

Тебе еже жити, Христос, и еже умрети, приобретение изрядно: любовию бо сраспялся еси Распеншемуся нас ради, Павле преславне.

Слава Отцу и Сыну и Святому Духу: Радуешися воистинну о Господе, Павле честный, изшед из телесе, и отшед ко Христу Жизнодавцу Богу.

И ныне и присно и во веки веков. Аминь: Моли присно Сына Твоего и Бога нашего, Неискусобрачная, Марие Чистая, послати нам верным милость.

Катавасия: Ужасошася всяческая/ о Божественней славе Твоей:/ Ты бо, неискусобрачная Дево,/ имела еси во утробе над всеми Бога,/ и родила еси безлетного Сына,/ всем воспевающим Тя/ мир подавающая.

Ирмос: В ките, Христе, тридневновав Иона, прописа Тя Безсмертнаго, яко мертва волею, в сердце земнем тридневновавша. (дважды)

Припев: Святии Апостоли Петре и Павле, молите Бога о нас!

Якоже древле, Христе, десницею Твоею по воде пеша ходяща, Петра спасл еси: и мене потопляема бурею лютых напастей Спаси, яко милосерд.

Припев: Святии Апостоли Петре и Павле, молите Бога о нас!

Оставил еси, о Петре! не сущая, и сущая достигл еси, якоже некий купец: и яве уловил еси бисер, Христа, многоценный.

Слава Отцу и Сыну и Святому Духу: Искушати безумно покусившияся Духа Пресвятаго, Петре, умертвил еси: Егоже богословил еси ты первее, яве исповедав Бога, всеблаженне.

И ныне и присно и во веки веков. Аминь: Всякаго вышша существа, Слово Божие родила еси, воплощенно нам: темже Богородицу Тя устнами же и душею проповедуем.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли Боже, возведи мя. (дважды)

Припев: Святии Апостоли Петре и Павле, молите Бога о нас!

Вся пренебрег красная мiра, уязвен Владычнею любовию, и общаго спасения желанием, свидетельствовати тому изволив, о Павле блаженне! и ныне о вселенней молися.

Припев: Святии Апостоли Петре и Павле, молите Бога о нас!

Яко изрядный Владыце подобник, и в Того одеян Павле, воистинну всем был еси всяк, да вся приобрящеши, и спасеши люди: и спасл еси, яко воистинну Христу уловив концы.

Слава Отцу и Сыну и Святому Духу: Достойно тебе дарова Христос житие апостоле Павле на небесех: пребывающаго бо зде не возжелал еси града, блаженне, верен служитель быв, и строитель таин Его.

И ныне и присно и во веки веков. Аминь: Призре на Тя Господь, мое обновляя существо, яко Силен, величия сотворь, Богородительнице, якоже рекла еси Всенепорочная: и Спасе мя Тобою из тли Бог мой, яко Милосерд.

Катавасия: Божественное сие и всечестное/ совершающе празднество,/ богомудрии, Богоматере,/ приидите руками восплещим,/ от Нея рождшагося Бога славим.

Братия:
Господи, помилуй. (12 раз) – читается вместо ектеньи

Твердыя и боговещанныя проповедатели, верх апостолов Твоих, Господи, приял еси, в наслаждение благих Твоих и покой: болезни бо онех и смерть приял еси, паче всякаго всеплодия, Едине Сведый сердечная.

Икос: Уясни мой язык, Спасе мой, разширив моя уста, и исполнив я, умили сердце мое, да яже глаголю, последую, и яже убо учу, сотворю первее: всяк бо творя и учя, рече, сей велик есть. Аще бо глаголю, и не творю, яко медь звенящая вменюся: темже рещи ми подобная, и творити полезная даруй, Едине Сведый сердечная.

Ирмос: В начале Безначальное Слово, со Отцем и Духом, Сын Единородный, благословен еси и превозносимый, Боже отец наших. (дважды)

Припев: Святии Апостоли Петре и Павле, молите Бога о нас!

Милостивному, Божественным промыслом Христовым наказуемь подобитися, попущен был еси прежде страсти, Петре, отвержения подпасти волнению.

Припев: Святии Апостоли Петре и Павле, молите Бога о нас!

Тебе Христос, первозванному и зело возлюбленному, яко председателю благославну апостолов первому является, воскрес от гроба.

Припев: Святии Апостоли Петре и Павле, молите Бога о нас!

Твое трикратное, еже прежде страсти, исцеляя отвержение Владыка, трикратным боговещанным, Петре, вопрошением утверждает любовь.

Слава Отцу и Сыну и Святому Духу: Еже ко Христу, Петре, любления предлагал еси свидетеля, и Всевидящаго яко Бога Слова: темже и любимое вручает тебе стадо.

И ныне и присно и во веки веков. Аминь: Яже во утробе Превечнаго, от Отца Возсиявша, Бога Слова плотию заченшую, вси ублажаем, яко Матерь всех Бога.

Ирмос: На поле Деире иногда мучитель пещь постави на мучение богоносных, в нейже три отроки песнословяху единаго Бога, Троично воспеваху глаголюще: Отец Боже благословен еси. (дважды)

Припев: Святии Апостоли Петре и Павле, молите Бога о нас!

Бысть, Христе, печать и венец апостолов Твоих, иже на последок званный времен, тщанием же всех превозшед. С нимже людие церковнии поют Тебе: отец наших, Боже, благословен еси.

Припев: Святии Апостоли Петре и Павле, молите Бога о нас!

Аще и гонив первее Церковь Твою Павел узник, но премину древнюю дерзость Твоею ревностию последи. Собра бо, Христе, языки зовущия: отец наших Боже, благословен еси.

Припев: Святии Апостоли Петре и Павле, молите Бога о нас!

Ты из Иерусалима проповедав всем Евангелие, объят же окрест всю землю Павле, даже до конец Иллирика учя, взывал еси: отец наших Боже благословен еси.

Слава Отцу и Сыну и Святому Духу: Во ужасе взят быв, третие достигл еси небо пребогате, и услышав неизглаголанная словеса, вопиеши: слава Превышнему Отцу, и Сыну, сияние же сопрестольно испытающаго яве Духа Божия глубины.

И ныне и присно и во веки веков. Аминь: Якоже на руно дождь на Тя сниде Дево Христос Бог, и Плотоносец из Тебе пройде, соединяя прежде разстоящая, мир на земли и на небеси даруя: отец наших Боже благословен еси.

Катавасия: Не послужиша твари богомудрии/ паче Создавшаго,/ но огненное прещение мужески поправше,/ радовахуся поюще:/ препетый отцев Господь и Бог, благословен еси.

Ирмос: Всяческая носяй неприступною Твоею силою, Христе, преподобныя Твоя отроки в пламени оросил еси, зовущия: благословите вся дела Господня Господа. (дважды)

Припев: Святии Апостоли Петре и Павле, молите Бога о нас!

Воздежут твои руце, и ко кресту тя препояшут, Владыка предрек, Петре, повелевает последовати зовущу: благословите вся дела Господня Господа.

Припев: Святии Апостоли Петре и Павле, молите Бога о нас!

Благодати словом, Енеа убо разслабленна люте, Тавифу же умершую, чудодействуя воскресил еси зовущия: благословите вся дела Господня, Господа.

Слава Отцу и Сыну и Святому Духу: Иже Петру языки очищены поведав, Христе, духовною зарею, и мне помышления очисти, зовущу: благословите вся дела Господня Господа.

И ныне и присно и во веки веков. Аминь: Всесвятая Дево, яже Бога Слова рождшая плотию, души моея мрак Твоими молитвами отгнавши, просвети взывающа: благословите вся дела Господня Господа.

Ирмос: На горе святей Прославльшася, и в купине огнем Приснодевы Моисеови тайну Явльшаго, Господа пойте и превозносите во вся веки. (дважды)

Припев: Святии Апостоли Петре и Павле, молите Бога о нас!

Срастворися любовию Твоею, Павел, добрым же изменением изступи: не себе бо живяше славный, имяше же, Щедре, живуща Тя в себе во вся веки.

Припев: Святии Апостоли Петре и Павле, молите Бога о нас!

Ты обручил еси якоже невесту представити, Жениху Христу Церковь: невестовождь бо сея показался еси, Павле Богоносе. Темже тя славит во вся веки.

Слава Отцу и Сыну и Святому Духу: Подвизался еси добрым подвигом, и скончав течение твое законно, сокровище веры соблюл еси: темже венцев, Павле, сподобился еси правды.

И ныне и присно и во веки веков. Аминь: Радуйся Престоле огнезрачный Господень: радуйся Невесто Неневестная, Дево. Радуйся, облаче, Солнца возсиявшая правды: Егоже превозносим во вся веки.

Благословим Отца и Сына и Святаго Духа Господа.

Хвалим, благословим, покланяемся Господеви, поюще и превозносяще во вся веки.

Катавасия: Отроки благочестивыя в пещи/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте дела,/ и превозносите Его во вся веки.

Старший став пред иконою Божией Матери, кадит, возглашая:

Богородицу и Матерь Света в песнех возвеличим!

Величит душа Моя Господа,/ и возрадовася дух Мой о Бозе, Спасе Моем.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Яко призре на смирение рабы Своея,/ се бо отныне ублажат Мя вси роди.

Яко сотвори Мне величие Сильный/ и, свято имя Его, и милость Его в роды родов боящимся Его.

Сотвори державу мышцею Своею,/ расточи гордыя мыслию сердца их.

Низложи сильныя со престол, и вознесе смиренныя;/ алчущия исполни благ и богатящияся отпусти тщи.

Восприят Израиля, отрока Своего,/ помянути милости, якоже глагола ко отцем нашим, Аврааму и семени его даже до века.

Ирмос: Тя Преславную Невесту, и Всесвятую Богородицу, Зиждителя рождшую невидимых же и всех видимых, песньми величаем. (дважды)

Припев: Святии Апостоли Петре и Павле, молите Бога о нас!

Твоя преизящная благодать славится достойно, сени бо твоей страсти немощных, Петре, отгоняющей: темже тя величаем.

Припев: Святии Апостоли Петре и Павле, молите Бога о нас!

Мечтаньми Симона волхва богоборца, взята к воздушней высоте, низложив неизглаголанною Божественною силою, Петр ублажается.

Припев: Святии Апостоли Петре и Павле, молите Бога о нас!

Согрешений разрешение, молитвами твоими подаждь, просвещение же сердца, и веселие Духа, поющим память твою, апостоле.

Слава Отцу и Сыну и Святому Духу: Твоя вся исполнена славы, освящения же и чудес: словеса, мощи, персть, и верою, Петре, покланяемыя и любовию Божественныя вериги.

И ныне и присно и во веки веков. Аминь: Твое имя плод чрева, содея ликовника песнь пети Тебе. Яже радость рождши, велегласно радуйся провещавающа.

Ирмос: Уставы прешла еси естества, Содетеля заченши и Господа, и дверь Спасения мiрови была еси. Тем Тя Богородице, непрестанно величаем. (дважды)

Припев: Святии Апостоли Петре и Павле, молите Бога о нас!

Твоим покланяемся веригам, яже за Христа яко злодей носил еси: язвы же Павле облобызаем, яже на славнем твоем и победоноснем носиши телеси.

Припев: Святии Апостоли Петре и Павле, молите Бога о нас!

Ныне разрешился еси, апостоле, ко Иже тобою непрестанно Желаемому: с Нимже яко служитель водворяяся, непрестанными мольбами, твоя рабы к себе привлецы.

Слава Отцу и Сыну и Святому Духу: Ныне никакоже в гаданиих, ниже в зерцале Христос тебе зримь есть: лицем же паче зрится к лицу совершенне тебе разум открывая Божества.

И ныне и присно и во веки веков. Аминь: Ты, Пресвятая Богомати, похвала Христовых апостолов была еси, мученков же слава, и пророков основание: темже вернии Тя вси достодолжно величаем.

Катавасия: Всяк земнородный/ да взыграется, духом просвещаемь,/ да торжествует же безплотных умов естество,/ почитающее священное торжество Богоматере,/ и да вопиет:/ радуйся, Всеблаженная,/ Богородице чистая Приснодево.

Чтец читает 1-й светилен: Подобен: Жены услышите:

Апостолов вси верх воспоем, Петра и Павла божественныя, вселенныя светильники, проповедники веры, богословныя трубы, учений сказатели, церковныя столпы, и разорители лести. [Дважды]

Старший:
Слава Отцу и Сыну и Святому Духу, и ныне и присно и во веки веков.

Велико и преславно Рождества Твоего таинство, Богорадованная Отроковице, и Богомати Дево, пророцы проповедаша, апостоли научиша, мученицы исповедаша: ангели же воспевают, и человецы покланяются.

Старший:
(150-й) Всякое дыхание да хвалит Господа!
(148-й) Хвалите Господа с небес, хвалите Его в вышних!
Припев: Тебе подобает песнь, Богу!
Хвалите Его вси ангели Его, хвалите Его вся силы Его.
Припев: Тебе подобает песнь, Богу!

Чтец:
Хвалите его солнце и луна, хвалите его вся звезды и свет. Хвалите его небеса небес, и вода яже превыше небес. Да восхвалят имя господне: яко той рече, и быша: той повеле, и создашася. Постави я в век и в век века: повеление положи, и не мимо идет. Хвалите Господа от земли, змиееве, и вся бездны: огнь, град, снег, голоть, дух бурен, творящая слово его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да восхвалят имя господне, яко вознесеся имя того единаго: исповедание его на земли и на небеси. И вознесет рог людей своих: песнь всем преподобным его, сыновом исраилевым, людем приближающымся ему.
(149-й) Воспойте Господеви песнь нову, хваление его в церкви преподобных. Да возвеселится Исраиль о сотворшем его, и сынове Сиони возрадуются о царе своем: Да восхвалят имя его в лице, в тимпане и псалтири да поют ему. Яко благоволит Господь в людех своих, и вознесет кроткия во спасение. Восхвалятся преподобнии во славе, и возрадуются на ложах своих. Возношение божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

Братия:
Хвалите Его по множеству величествия Его!

Чтец:
С небесе благодать прием, егда вопрошение учеником Спас, дванадесяточисленным рече апостолом: кого Мя глаголют человецы быти? тогда убо лучший апостолов Петр, богословствуя отвеща, ясно возопив: Ты еси Христос Живаго Бога Сын. Темже достойно ублажается, яко свыше прием откровение, вязати же и решити праведно прием.

Чтец:
Иже от Отца явлься Божие Слово, кого Мя непщуете вопрошающу Христу, Ты Живаго Отца Сын, яко всем уста богогласуя, абие возопил еси: темже и блажен еси Симоне вар Иона, возмездие приял еси. Ибо славит Бог сего верно славящия, и к восприятию богатно призывает, и каменя тебе непостыдна Церкви водружение и основание положи.

Братия:
Свыше зван быв, а не от человек, егда земная тьма помрачи очи телесныя, нечестия обличая сетование: тогда небесный свет облиста мысленнии очи, благочестия открывая красоту. Темже познал еси Изводящаго свет из тьмы, Христа Бога нашего: Егоже моли, спасти и просветити души наша.

Старший:
2. Хвалите Его в кимвалех доброгласных, хвалите Его в кимвалех восклицания.

Христопроповедник сый, крестную похвалу носяй, ты, многорачительную Божественную любовь, яко зрящих связующую к желаемому, воистинну паче всех проразсудил еси. Темже и узник прозвался еси Христов, напастей неудобство, яко сладчайшее пищи всякия изволивый, и честныя кончины разрешения сподобился еси, живый Владыце твоему: Егоже моли, спасти и просветити души наша.

Старший (глас 6-й):
Слава Отцу и Сыну и Святому Духу.

Чтец:
[Космы монаха:] Всечестный апостолов приспе праздник Церкви Христове, ходатайствующий спасение всем нам. Тайно убо восплескавше, к сим рцем: радуйтеся светильницы, сущим во тьме мысленнаго солнца зари облистающии. Радуйтеся, Петре и Павле, учений Божественных основания незыблема, друзи Христовы, сосуди честнии: приидите посреди нас невидимо, сподобляюще даров невещественных, ваш праздник восхваляющих песньми.

Старший (глас 6-й):
И ныне и присно и во веки веков.

Чтец:
Богородице, ты еси Лоза истинная, возрастившая нам Плод Живота, Тебе молимся, молися, Владычице, со святыми апостолы, помиловати души наша.

Слава в вышних Богу,/ и на земли мир,/ в человецех благоволение. /Хвалим Тя, благословим Тя,/ кланяем Ти ся, славословим Тя, благодарим Тя/ великия ради славы Твоея.
Господи, Царю Небесный, Боже, Отче Вседержителю,/ Господи Сыне Единородный, Иисусе Христе, и Святый Душе./ Господи Боже, Агнче Божий, Сыне Отечь,/ вземляй грехи мира, помилуй нас.
Вземляй грехи мира, приими молитву нашу./ Седяй одесную Отца, помилуй нас./ Яко Ты еси Един Свят;/ Ты еси Един Господь, Иисус Христос, в славу Бога Отца, аминь.
На всяк день благословлю Тя и восхвалю имя Твое во веки, и в век века.

Сподоби, Господи, в день сей без греха сохранитися нам!/ Благословен еси, Господи Боже отец наших,/ и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим (трижды).
Господи! прибежище был еси нам в род и род./ Аз рех: Господи! помилуй мя, исцели душу мою, яко согреших Тебе.
Господи! к Тебе прибегох: научи мя творити волю Твою, яко Ты еси Бог мой,/ яко у Тебе источник живота,/ во свете Твоем узрим свет./ Пробави милость Твою ведущим Тя!
Святый Боже, Святый Крепкий, Святый Безсмертный, помилуй нас! (трижды).
Слава Отцу и Сыну и Святому Духу, и ныне и присно и во веки веков, аминь.
Святый Безсмертный, помилуй нас. Святый Боже, Святый Крепкий, Святый Безсмертный, помилуй нас!

Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость.

Слава Отцу и Сыну и Святому Духу, и ныне и присно и во веки веков.

Братия:
Господи, помилуй. (12 раз) – читается вместо сугубой ектеньи -поклон-

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем!

Слава Отцу и Сыну и Святому Духу, и ныне и присно и во веки веков, аминь. Господи, помилуй, Господи, помилуй, Господи, помилуй. Благослови.

Господи Иисусе Христе Сыне Божий, молитвами Пречистыя Своея Матере, святых славных и всехвальных верховных апостол Петра и Павла, и всех святых, помилуй и спаси нас, яко Благ и Человеколюбец.
Братия:
Аминь.

Богослужения мирянским чином

Святых славных и всехвальных и первоверховных апостол Петра и Павла.

Утреня

-2-

Стихословие Псалтири – кафизмы

Читаются 13-я и 14-я кафизмы

Чтец глаголет избранный псалом (псалмы, строки из которых читаются чтецом переменно с пением величания)

Каноны